ރާއްޖެ ޓްރާންސްޕޯޓް ލިންކް (އާރުޓީއެލް) ގެ ދަށުން ދެމުން އަންނަ ބަހުގެ ޚިުދމަތް ވިލިމާލެއަށް ތައާރަފު ކުރަން ތައްޔާރު ވެއްޖެއެވެ.

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުނީ އާރުޓީއެލް ބަހުގެ ޚިދުމަތް މާލެ ސިޓީއަށް ފޯރުކޮށްދިނުމަށް އެ ކުންފުނިން ކުރަމުންދާ މަސައްކަތުގެ ތެރެއިން، މާލެ އަދި ހުޅުމާލެ އާއި އެއްފަސްގަނޑަކުން މިވަގުތު ގުޅިފައި ނެތް ނަމަވެސް ވިލިމާލެއަށް އެ ޚިދުމަތް ދޭން ތައްޔާރުވަމުން އަންނަ ކަމަށެވެ. އެގޮތުން ވިލިމާލޭގައި މިކުންފުނިން ފޯރުކޮށްދިނުމަށް ތައްޔާރުވަމުންދާ ބަހުގެ ޚިދުމަތުގައި ބޭނުންކުރާނީ ތިމާވަށްޓާއި ރައްޓެހި ހަ އިލެކްޓްރޯނިކް ބަސް ނުވަތަ ތިމާވެއްޓާ ރައްޓެހި ބަސްތައް ކަމަށް ވެސް އެ ކުންފުނިން ބުނެފައިވެއެވެ.

މި ބަސްތަކުގައި 11 މީހުންނަށް އިށީންދެ ތިބެވޭނެހެން ސީޓު ހުންނާނެއެވެ. އަދި، 4 މީހުންނަށް ކޮޅަށްތިބެވޭނެ ޖާގަވެސް އޮންނާނެއެވެ. އެހެންކަމުން ޖުމްލަ އެއްފަހަރާ 15 މީހުންނަށް ބަހެއްގައި ދަތުރުކުރެވޭނެއެވެ.

ބަހުގެ ޚިދުމަތް ވިލިމާލެއަށް ފުޅާކުރުމަށް ވާންޖެހޭ އެންމެހާ ތައްޔާރިތައް ވަމުން އަންނަކަން ފާހަގަކޮށް އެމްޓީސީސީން ބުނީ އެ ކުންފުނީގެ އުންމީދަކީ މިހިނގާ ޖަނަވަރީ މަސް ނިމުމުގެ ކުރިން ވިލިމާލޭގައި ބަހުގެ ޚިދުމަތް ފެށުންކަމަށެވެ. އަދި އާރުޓީއެލް ވިލިމާލެ ބަހުގެ ޚިދުމަތާ ގުޅޭ ރޫޓް މެޕާއި ޝެޑިއުލްގެ މަޢުލޫމާތު ކުރިއަށް އޮތް ދުވަސްތަކުގައި ހާމަކުރާނެ ކަމަށް ވެސް މައުލޫމާތުދީފައި ވެއެވެ.

ރާއްޖޭގައި ދަތުރުފަތުރުގެ ޚިދުމަތް ފޯރުކޮށްދޭ އެންމެ ބޮޑު ކުންފުނީގެ ހައިސިއްޔަތުން، އެމްޓީސީސީގެ މަގުސަދަކީ އެކަށީގެންވާ އަގުގައި ލުއިފަސޭހަކަމާއެކު ބޭނުންކުރެވޭ، ކަނޑާއި އެއްގަމުގެ ދަތުރުފަތުރުގެ ޚިދުމަތެއް ރައްޔިތުންނަށް ފޯރުކޮށްދިނުން ކަމަށް އެމްޓީސީސީން ބުނެއެވެ.

އެމްޓީސީސީން ވިލިމާލޭގައި ބަހުގެ ޚިދުމަތް ދޭން ތައްޔާރުވަމުން އަންނައިރު މާލެ ސިޓީ ކައުންސިލުން ވެސް ވަނީ ވިލިމާލޭގައި ބަގީގެ ޚިދުމަތް ދޭން ތައްޔާރުވެފައިވާ ކަމަށް ބުނެފައެވެ. ނަމަވެސް ފާއިތުވި ދުވަސްތަކުގައި ބަގީގެ ޚިދުމަތް ހުއްޓި ދަތުރު ކުރެވޭނެ ވަސީލަތެއް ނެތިވެސް ގިނަ ދުވަސްތަކެއް ވެފައިވުމުން އެކަމުގެ ކަންބޮޑުވުން ވިލިމާލެ ރައްޔިތުން ވަނީ ފާޅުކޮށްފައެވެ.