ރައީސް ޔާމީންގެ ބަހުގެ ހޫނު ހަމަލާތަކެއް ރައީސް ނަޝީދަށް

ރައީސުލް ޖުމްހޫރީއްޔާ އަބްދުﷲ ޔާމީން އަބްދުލް ގައްޔޫމް އަށް ތާއިދު ނެތް ކަމަށް ވިދާޅުވެ ކުރީގެ ރައީސް މުހައްމަދު ނަޝީދު ދެއްކެވި ވާހަކަފުޅުތަކަށް ރައީސް އަބްދުﷲ ޔާމީން ރައްދު ދެއްވައިފިއެވެ.

ސްރީލަންކާގައި ނޫސްވެރިންނަށް މައުލޫމާތު ދެއްވަމުން ރައީސް ނަޝީދު ވިދާޅުވެފައި ވަނީ ރައީސް ޔާމީން އަށް ތާއިދު ނެތުމަކީ އެބޭފުޅާގެ ކޫށެއް ނޫން ކަމަށާއި އަދި ރައީސް ޔާމީންގެ ޕާޓީ ތެރެއިން ވެސް ރައީސް ޔާމީން އަށް ތާއިދު ނެތީތީ ވަރަށް ދެރަވާ ކަމަށް ރައީސް ނަޝީދު ވިދާޅުވެފައިވެއެވެ.

ޕީޕީއެމްގެ އޮފީސް ރަސްމީކޮށް ހުޅުވުމަށް ބޭއްވި ރަސްމީއްޔާތުގައި ރައީސް ނަޝީދުގެ އެ ވާހަކަފުޅުތަކަށް ރައްދު ދެއްވަމުން ރައީސް ޔާމީން ވިދާޅުވީ ރައީސް ނަޝީދުގެ ކުށަކީ އެމަނިކުފާނަށް ތާއިދު ނެތުން ނޫން ކަމަށާއި އެއަށްވުރެ ރައީސް ނަޝީދުގެ ކުށް މާ ބޮޑު ކަމަށެވެ.

ރައީސް ޔާމީން ވިދާޅުވީ، ރައީސް ނަޝީދު ކުރެއްވީ ވަރަށް ބޮޑު ކުށެއް ކަމަށާއި އެކުށަކީ ޑިމޮކްރަސީގެ ޗެމްޕިއަނެއްގެ ގޮތުގައި ވަކާލާތު ކުރައްވައި ވެރިކަމާ ހަވާލުވެވަޑައިގަތުމަށްފަހު ހުދުމުތާރުކޮށް އަމަލުތައް ކުރެއްވުން ކަމަށެވެ.

ރައިސް ޔާމީން ވިދާޅުވީ ސިޔާސީ ގޮތުން އެމަނިކުފާނާއި "ޖަދަލުކުރާ" ފަރާތްތަކުން އެމަނިކުފާނަށް ތާއިދު ނެތް ކަމަށް ވިދާޅުވުމަކީ އެބޭފުޅުންގެ ކުށެއް ނޫންކަމަށާއި އެފަދަ ޚުދުމުޚުތާރު މީހުން ދައްކާ ވާހަކަތަކަށް އެމެރިކާގެ ރައީސް ބަރަކް އޮބާމާ ރައްދު ދެއްވާފައި ކަމަށް ރައީސް ޔާމީން ވިދާޅުވިއެވެ.

"އޮބާމާގެ ރިޔާސީ ދައުރު ނިންމާލައްވަމުން ވިދާޅުވި ފަދައިން އެންމެ ގަދައަށް ޑިމޮކްރަސީގެ ވާހަކަ ދައްކަވާ ޗެމްޕިއަނުންނަކީ މަގާމު ލިބުމާއެކު ޑިމޮކްރަސީ ކަތިލައި، ރައްޔިތުންނަށް ހުދުމުހުތާރު ވެރިއަކަށްވުން،" ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ ޑިމޮކުރެސީގެ ވާހަކަ އެންމެ ގަދަޔަށް ދައްކާ މީހުން ވެރިކަމަށް އާދެވުމުން ޑިމޮކުރެސީ ކަތިލާ އެންމެ ރަހުމް ކުޑަކޮށް ރައްޔިތުންގެ ހައްގުތަކަށް އަރައިގަނަ މީހުންނަކީ ޑިމޮކްރެސީގެ ނަމުގައި ހުދުމުހުތާރު ވެރިކަން ކުރައްވާ ބޭފުޅުން ކަމަށެވެ. އަދި ރައީސް ނަޝީދުގެ ތިން އަހަރުގެ ވެރިކަމުގައި ފެނިގެން ދިޔައީ ހުދުމުހުތާރު ވެރިކަމެއް ކަމަށް ރައީސް ޔާމީން ވިދާޅުވިއެވެ.

އެމަނިކުފާން ވިދާޅުވީ ރައީސް ނަޝީދުގެ ވެރިކަމާ ދެކޮޅަށް ނުކުތީ އެހެން ވެގެން ކަމަށެވެ. އަދި ރައީސް ނަޝީދުގެ ވެރިކަން ބަދަލު ކުރެއްވުމަށް އޭރު ކުރި މަސައްކަތަކީ އެއްގޮތަކަށް ވެސް ސިފައިންނާ ފުލުހުންނާ ދެކޮޅަށް ހިންގި ކަންތައްތަކެއް ނޫން ކަމަށް ވެސް ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ ރާއްޖޭގެ ކަންކަން ނިންމާނީ ދިވެހިން ބޭނުންވާ ގޮތަށް ކަމަށާއި އެހެން ބައަކު ބޭނުންވާ ގޮތަށް ނޫން ކަމަށެވެ.

އެމަނިކުފާން ވިދާޅުވީ މިއީ ހުރިހައި ދިވެހިރައްޔިތުންގެ ރާއްޖެ ކަމަށާއި ރާއްޖޭގެ ކަންކަން ނިންމާނީ ދިވެހިންގެ ގިނަ ބައަކު ބޭނުންވާ ގޮތަށް ކަމަށެވެ. އަދި ރައީސް ނަޝީދު ވިދާޅުވަމުން ގެންދަވާ އަނެއް ދިވެހިރާއްޖެ ދާނީ އެހެން ދިވެހިން ކަމަށްވެސް ރައިސް ޔާމީން ވިދާޅުވިއެވެ.

ރައީސް ވިދާޅުވީ މީގެކުރިން ވެސް ޕްރައިމަރީއެއް ބާއްވައިގެން ރިޔާސީ ކެނޑިޑޭޓެއް ނެރުނީ ޕީޕީއެމުން ކަމަށާއި އަދި ކުރިއަށް އޮތްތާ ވެސް އެހެން ޕާޓީއަކަށް ޕްރައިމަރީއެއް ބާއްވައިގެން ކެނޑިޑޭޓެއް ނެރެން ނުކުރޭނެ ކަމަށެވެ.