ވިލިމާލޭގައި ސްޓެލްކޯ އިން ބޭނުންކުރަމުންދާ ސައިކަލެއް އެ އަވަށުން ބޭރުކުރަން އަންގައިފި
ސައިކަލު ބޭރުކުރަން އެންގީ ތިމާވެއްޓާ ރަށްޓެހި ސިޔާސަތުގެ ދަށުން
ޥިލިމާލެ: ޕަބްލިކް ޓްރާންސްޕޯޓަށް ބޭނުންކުރަނީ ބަގީ
ވިލިމާލޭގައި ސްޓެލްކޯއިން ބޭނުންކުރަމުންދާ ސައިކަލެއް އެ އަވަށުން ބޭރުކުރުމަށް ހައުސިންގ މިނިސްޓްރީން އަންގައިފި އެވެ.
ހައުސިންގ މިނިސްޓްރީން ހޮނިހިރު ދުވަހު ސްޓެލްކޯ އަށް ފޮނުވި ސިޓީއެއްގައި ބުނެފައިވަނީ ފެށުނީއްސުރެ ވިލިމާލެއަކީ އިންޖީނުލީ ވެހިކަލް ކޮންޓްރޯލް ކުރެވިފައިވާ ސަރަހައްދަކަށް ވާތީ އާއި މިހާރު ބެޓެރީ ވެހިކަލް ޕަބްލިކް ޓްރާންސްޕޯޓަށް ބޭނުންކުރާތީވެ، އިންޖީނުލީ ވެހިކަލް މަދުކުރުމަށް ނިންމާފައިވާ ކަމަށެވެ.
އެ ސިޓީގައި ބުނެފައިވަނީ، މިމަހުގެ 11 ވަނަ ދުވަހު މަގުތަކާ ބެހޭ ލަފާދޭ ކޮމެޓީގެ ބައްދަލުވުމުގައި ވިލިމާލޭގައި ދުއްވާ ވެހިކަލްތަކާ ގުޅޭ ގޮތުން މަޝްވަރާކޮށް، އިންޖީނުލީ މޮޓޯ ސައިކަލް ބޭނުން ނުކުރުމަށް ނިންމާފައިވާ ކަމަށެވެ.
އެހެންކަމުން، ސްޓެލްކޯ އިން ބޭނުންކުރަމުންދާ ސައިކަލް މިހިނގާ ޖެނުއަރީ މަހުގެ ނިޔަލަށް ވިލިމާލެއިން ބޭރުކުރުމަށާއި، އެ ސައިކަލުގެ ބަދަލުގައި ބެޓެރީ ސައިކަލް ބޭނުންކުރުމަށް ވަނީ އަންގާފަ އެވެ.
ހައުސިންގ މިނިސްޓްރީއިން ވިލިމާލެއަށް ކަނޑައަޅުއްވާފައި ހުންނަވާ ކޯޑިނޭޓަރު އަބްދުﷲ ޝާމް ވިދާޅުވީ ވިލިމާލެއަކީ ފާއިތުވި ތިން ވެރިކަމުގައި ވެސް ކާބަން ނިއުޓްރަލް ރަށެއް ކަމުގައި ކަނޑައަޅާފައިވާ ރަށެއް ކަމަށެވެ.
ޝާމް ވިދާޅުވީ އެގޮތުގެ މަތިން ވިލިމާލޭގައި ތިމާވެއްޓާ ރަށްޓެހި ވެހިކަލް ބޭނުންކުރާ ގޮތަށް މި ސަރުކާރުން ވެސް ނިންމާފައިވާ ކަމަށެވެ. އަދި ސްޓެލްކޯ އިން ބޭނުންކުރަމުންދިޔަ ޕެޓްރޯލް ސައިކަލް ވިލިމާލެއިން ބޭރުކުރުމަށް އެންގީ، އެ ސިޔާސަތުގެ މަތިން ކަމަށް އޭނާ ވިދާޅުވި އެވެ.
މީގެ އިތުރުން، އޭނާ ވިދާޅުވީ ވިލިމާލޭގައި މިހާރު ބޭނުންކުރަމުންދާ އެހެނިހެން އިންޖީނުލީ ވެހިކަލްތަކާ މެދު ވަރަށް އަވަހަށް ގޮތެއް ނިންމާނެ ކަމަށާއި، އެކަންތައްތައް ބަލަމުންދާ ކަމަށެވެ.
