މާލޭގައި ސައިކަލް ޓެކްސީގެ ޚިދުމަތް އަންނަ ހަފްތާގައި ފަށަނީ

މާލޭގައި ފުރަތަމަ ފަހަރަށް ސައިކަލް ޓެކްސީގެ ޚިދުމަތް އަންނަ ހަފްތާގައި ފެށޭނެ ކަމަށް މިނިސްޓްރީ އޮފް އިކޮނޮމިކް ޑިވެލޮޕްމަންޓުން ބުނެފިއެވެ.

ރާއްޖެ އެމްވީއަށް މައުލޫމާތު ދެއްވަމުން އިކޮނޮމިކް މިނިސްޓްރީގެ ނެޝަނަލް މެރިޓައިމް ކޮންސަލްޓެންޓް މުހައްމަދު އިމްތިޔާޒް ވިދާޅުވީ މާލޭގައި ސައިކަލް ޓެކްސީގެ ޚިދުމަތް ދިނުމަށް ހުއްދަ ދީފައިވާ ދެ ކުންފުނީގެ ތެރެއިން އަނުއާ ޓެކްސީ ސެންޓަރ ގެ ޚިދުމަތް އަންނަ ހަފްތާގައި ފަށާނެ ކަމަށެވެ.

އަންނަ އާދިއްތަ ދުވަހު ސަރުކާރު ހުޅުވުމުން ސައިކްލަ ތަކަށް ޓެކްސީ ބޯޑު ހަވާލު ކުރުމާއި ޑްރައިވިން ލައިސެންސް ހަވާލު ކުރަން ފެށޭނެ ކަމަށް އިމްތިޔާޒް ވިދާޅުވިއެވެ.

މިހާރު ކުރިއަށް ދަނީ ޑްރައިވަރުންގެ މެޑިކަލް ޗެކަޕް ހެދުމާއި ޕޮލިސް ރިޕޯޓް ދެގުން ފަދަ ކަންތައްތައް ކަމަށް އޭނާ ވިދާޅުވިއެވެ.

އިމްތިޔާޒް ވިދާޅުވީ ސައިކަލް ޓެކްސީގެ ޚިދުމަތް ދިނުމަށް ހުއްދަ ދީފައިވާ ދެ ކުންފުނީގެ ތެރެއިން އަނެއް ކުންފުނިން ޚިދުމަތް ފެށޭނެ ދުވަހެއް އަދި ނޭނގޭ ކަމަށެވެ.