ފެލިކްސް އެތުލެޓިކޯގައި މަޑުކުރާނެ ކަމުގެ އުންމީދު ބޮޑު

އެތުލެޓިކޯ މެޑްރިޑަށް ކުޅެމުން އަންނަ ޕޯޗުގަލްގެ ޒުވާން ފޯވާޑް ޔާއޯ ފެލިކްސް އެ ކުލަބުގައި މަޑުކުރާނެ ކަމުގެ އުންމީދު ބޮޑު ކަމަށް ކުލަބުގެ ރައީސް އެންރީކޭ ސެރެޒޯ ބުނެފި އެވެ.

ޒުވާން ކުޅުންތެރިޔާ ޕޯޗުގަލްގެ ބެންފީކާ ދޫކޮށް އެތުލެޓިކޯ އަށް ބަދަލުވީ 2019 ވަނަ އަހަރު އެވެ. އެތުލެޓިކޯ އިން ފެލިކްސް ހޯދީ އެ ކުލަބަގެ ރެކޯޑު އަގަކަށެވެ. އެއީ 113 މިލިއަން ޕައުންޑަށެވެ. އެތުލެޓިކޯ އަށް ބަދަލުވެ ފެލިކްސް މޮޅު ކުޅުމެއް ދައްކަމުން އައި ނަމަވެސް، މިހާރު އޭނާގެ އަސްލު ކުޅުން ނުދެއްކޭ ކަމަށް ގިނަ ބަޔަކު ބުނެ އެވެ. އެހެންކަމުން ފެލިކްސް ބޭނުންވަނީ އެ ޓީމު ދޫކޮށް، އެހެން ޓީމަކާ ގުޅެން ކަމަށް ވެސް ރިޕޯޓުތައް ބުނެ އެވެ. ބޭރުގެ މީޑިއާ ރިޕޯޓުތައް ބުނާ ގޮތުން ޕްރިމިއާ ލީގުގެ އާސެނަލް އާއި މެންޗެސްޓަރ ޔުނައިޓެޑުގެ ޝައުޤުވެރިކަން ފެލިކްސް އަށް އެބަ އޮތެވެ.

ފެލިކްސް ހޯދަން ބޭނުންވާ ކުލަބަކުން އޭނާ ގެންދިޔުމަށް 100 މިލިއަން ޑޮލަރަށްވުރެ ބޮޑު އަދަދެއް ދައްކަން ޖެހޭނެ ކަމަށް ރިޕޯޓުތައް ބުނެ އެވެ. އެހެންކަމުން އެވަރުގެ އަގެއް ކުލަބަކުން ނުދައްކައިފި ނަމަ، ލޯނު އެެއްބަސްވުމެއްގެ ދަށުން އޭނާ އެހެން ކުލަބަކަަށް ބަދަލުވުމުގެ ފުރުސަތު އޮތް ކަމަށް ވެސް ރިޕޯޓުތައް ބުނެ އެވެ. ނަމަވެސް މިވާހަކަތަކާ ގުޅިގެން އެތުލެޓިކޯގެ ރައީސް ސެރެޒޯ ވިދާޅުވީ، ދިއިރުޅުމުގައި އެއްވެސް ކަމަކީ ނުވާނެ ކަމެއް ނޫން ކަމަށެވެ. އޭނާ ވިދާޅުވީ، ފެލިކްސް އެތުލެޓިކޯގައި މަޑުކުރުމަކީ އާދައިގެ ކަމެއް ކަމާއި، އެކަމުގެ އުންމީދު އޮތް ކަމަށެވެ. ސެރެޒޯ ވިދާޅުވީ ފުޓުބޯޅައިގައި ކަންކަން ވެގެންދާނީ މީހުން ހީވެސް ނުކުރާ ގޮތަކަށް ކަމަށެވެ.

އެތުލެޓިކޯ އަށް ބަދަލުވެ އެ ކުލަބަކަށް މިހާތަނަށް ކުޅެދިން 130 މެޗުން ފެލިކްސް ވަނީ 34 ލަނޑު ޖަހަައިފަ އެވެ. އެ ކުލަބާއެކު އޭނާ ވަނީ 21-2020 ވަނަ އަހަރުގެ ސްޕެނިޝް ލީގު ކާމިޔާބުކޮށްފަ އެވެ.