ރޮނަލްޑޯ އެންމެފަހުން ސައޫދީ ލީގަށް ބަދަލުވެއްޖެ!

ޕޯޗްގަލްގެ ކެޕްޓަން ކްރިސްޓިއާނޯ ރޮނަލްޑޯ އެންމެފަހުން ސައޫދީ އަރަބިރާގެ އަލް ނަސްރަށް ބަދަލުވެއްޖެއެވެ. އޭނާ އެކްލަބަށް ސޮއިކުރިކަން ކްލަބުން ވަނީ އިއުލާންކޮށްފައެވެ.

ރޮނަލްޑޯ އަލް ނަސްރަށް ސޮއިކުރީ ދެ އަހަރުދުވަހުގެ އެއްބަސްވުމެއްގެ ދަށުން 2025 ގެ ނިޔަލަށެވެ. ރިޕޯރޓްތައް ބުނާގޮތުން ރޮނަލްޑޯ އެކްލަބަށް ސޮއިކުރީ ފުޓްބޯޅަ ތާރީޚުގައިވެސް އެންމެ މުސާރަ ބޮޑު ކުޅުންތެރިޔާގެ ގޮތުގައެވެ. ރޮނަލްޑޯގެ މުސާރަ އަހަރަކު 214 މިލިއަން ޑޮލަރަށްވުރެ ބޮޑުކަމަށް ބައެއް ރިޕޯރޓްތައް ބުނެއެވެ. އަލް ނަސްރަށް ސޮއިކުރުމަށްފަހު 37 އަހަރުގެ ރޮނަލްޑޯ ބުނީ އާ ގައުމެއްގެ އާލީގެއްގައި ތަޖުރިބާކުރަން ތައްޔާރަށް ހުރިކަމަށެވެ. އަދި ޔޫރަޕްގައި ހުރިހާ ކާމިޔާބީއެއް ލިބިއްޖެ ކަމަށާއި, މިއީ އޭޝިޔާގައި ތަޖުރިބާކުރަން އެންމެ ރަނގަޅު ވަގުތުކަމަށް ދެކޭކަމަށް ރޮނަލްޑޯ ބުނެފައިވެއެވެ.

ނުވަ ފަހަރު ސައުދީ ޕްރޯ ލީގު ކާމިޔާބުކޮށްފައިވާ އަލް ނަސްރުން ދެކެނީ ރޮނަލްޑޯ އެކްލަބަށް ސޮއިކުރުމަކީ ތާރީޚު ބަދަލުކޮށްލުން ކަމަށެވެ. އަދި މިއީ އެކްލަބާއި, އެގައުމާއި, އެގައުމުގެ ކުރިމަގަށް ނިކުންނަން ތިބި ކުޅުންތެރިންނަށްވެސް ހިތްވަރެއްކަމަށެވެ. މީގެކުރިން މިސީޒަންގައި ރޮނަލްޑޯ ވަނީ ސައުދީގެ އަލްހިލާލްގެ ހުށަހެޅުމަށް ނޫނެކޭ ބުނެފައެވެ. އޭރު އެކްލަބަށް ނޫނެކޭ ބުނީ މެންޗެސްޓަރ ޔުނައިޓެޑްގައި މަޑުކުރުމަށެވެ. އެކަމަކު ޔުނައިޓެޑާ މައްސަލަޖެހި ވަރލްޑްކަޕް ފެށެން ވެފައިވަނިކޮށް, އެކްލަބްގެ އެއްބަސްވުން ނިމުމަކަށް ގެނައުމުން ރޮނަލްޑޯ ހުރީ ދާނެ ކްލަބެއް ނެތިފައެވެ.

ރޮނަލްޑޯ ޔުނައިޓެޑް ދޫކޮށްލިއިރު އޭނާއަށް ދެ މެޗުގެ ސަސްޕެންޝަނެއް އެބައޮތެވެ. އެއީ މެޗަކަށްފަހު އެވަޓަން ސަޕޯޓަރެއްގެ ފޯނު އެއްލާލި މައްސަލައިގައެވެ. ލޯކަލް ލީގުގައި އަލް ނަސްރުގައި އެސަސްޕެންޝަން ރޮނަލްޑޯ ފުރިހަމަކުރަން ޖެހޭނެއެވެ.