ޕްރިމިއާ ލީގަށް އަމާޒުހިފާ ތިނަދޫ އަށް ސްޕެއިންގެ ތިން ކުޅުންތެރިން ގެނެސްފި

ދިވެހި ޕްރިމިއާ ލީގަށް އަމާޒު ހިފާ ގދ.ތިނަދޫ ޓީމަށް ސްޕެއިންގެ ތިން ކުޅުންތެރިން ގެނެސްފި އެވެ.

ހޯމަ ދުވަހު ކިންގްސް ކޯނާ ރެސްޓޯރެންޓުގައި ބޭއްވި ކުޑަ ހަފްލާއެއްގައި ތިނަދޫއަށް ގެނެސްފައިވަނީ ސްޕެއިންގައި ކުޅެމުން އައި ޑެފެންޑަރެއް، ސްޓްރައިކަރެއް އަދި މިޑްފިލްޑަރެކެވެ.

ސޮއިކުރުމުގެ ރަސްމިއްޔާތަށްފަހު ނޫސްވެރިންނާ ވާހަކަދައްކަމުން ރައްޔަތުންގެ މަޖިލީހުގެ ތިނަދޫ ދާއިރާގެ މެމްބަރު އަބްދުﷲ އަހުމަދު ވިދާޅުވީ، ތިނަދޫގެ ފުޓުބޯޅަ އިތުރު ހަރުފަތަކަށް ގެނައުމަށް ކުރަމުންދާ މަސައްކަތުގެ ތެރެއިން މިއަދު މިކުރެވުނީ ވަރަށް ބޮޑު މަސައްކަތެއް ކަމަށާއި، މީގެ ފައިދާ ރަށުގެ ކުޅުންތެރިންނަށް ކުރާނެ ކަމަށެވެ.

އަބްދުﷲ ވިދާޅުވީ، ޓީމުގެ ސްޕެއިންގެ ކޯޗުގެ އެދުމަށް ގެނައި ތިން ކުޅުންތެރިންނަކީ ވަރަށް ހުނަރުވެރި ތިން ކުޅުންތެރިން ކަމަށެވެ. އެގޮތުން އެ ކުޅުންތެރިންނާއެކު ތިނަދޫ ޓީމުގެ ޓާގެޓް ހާސިލްވާނެ ކަމަށް ގަބޫލުކުރާމަށްވެސް އޭނާ ވަނީ ވިދާޅުވެފައެވެ.

ޔޫރަޕް ތިން ކުޅުންތެރިން ތިނަދޫ ޓީމަށް ގެނެސްފައިވާއިރު، އަބްދުﷲ ވިދާޅުވީ އޭޝިއާގެ ކުޅުންތެރިޔަކުވެސް އެޓީމަށް ގެންނަން މަސައްކަތްކުރާ ކަމަށެވެ. އެގޮތުން ސްރީލަންކާގެ ކީޕަރެއް މި ހަފްތާ ތެރޭގައި ޓީމާ ގުޅޭނެ ކަމަށްވެސް އޭނާ ވިދާޅުވި އެވެ.

ތިނަދޫ ޓީމަށް ގެނައި މިޑްފިލްޑަރު އަދި ޑިފެންޑަރު ސްޕެއިންގެ ދެވަނަ ޑިވިޝަން އަދި ތިންވަނަ ޑިވިޝަނަށް ކުޅެފައިވާއިރު، ސްޓްރައިކަރު ވަނީ ރެއާލް ސޮސައިޑާޑްއާ އެކު ޔޫތް ޗެމްޕިއަންޝިޕް ކުޅެފައި ކަމަށް އަބްދުﷲ ވިދާޅުވި އެވެ.

މިނިވަން ޗެމްޕިއަންޝިޕްގައި ވާދަކުރާ ތިނަދޫ ޓީމު ހިމެނޭ އަތޮޅު މުބާރާތް ފަށާނީ އަންނަ މެއި މަހުއެވެ. އެގޮތުން އެޓީމަށް ޕްރިމިއާ ލީގުން ޖާގަ ލިބޭނީ އަތޮޅު މުބާރާތުގެ ޗެމްޕިއަންކަން ހޯދުމުގެ އިތުރުން ޒޯން މުބާރާތުގެ ޗެމްޕިއަންކަން ހޯދާ އަދި ހުރިހާ ޒޯން ޗެމްޕިއަނުންގެ މެދުގައި ކުޅޭ މުބާރާތުގެ ގަދަ ހަތަރެއްގައި ހިމެނިގެންނެވެ.