ދިގު މެދު ކެނޑުމަކަށް ފަހު އަންނަ ސީޒަނުގެ ޕްރިމިއަރ ލީގަށް ބްރައިޓަން އެންޑް ހޯވް އަލްބިއަން ޕްރޮމޯޓްވެއްޖެއެވެ.

އިނގިރޭސި ޗެމްޕިއަންޝިޕްގެ އެއްވަނައިގައި އޮތް ބްރައިޓަން ޕްރެމިއަރ ލީގަށް ޕްރޮމޯޓްވެފައި ވަނީ ހޯމަ ދުވަހުގެ ރޭ ވިގެން އެތުލެޓިކާއި ބައްދަލުކުރި މެޗު 1-2 ގެ ނަތީޖާއަކުން ކާމިޔާބުކުރުމާ ގުޅިގެންނެވެ.

އަނެއްކޮޅުން ވާދަވެރި ނިއުކާސަލް ޔުނައިޓެޑް ކުޅުނު މެޗުން އިސްޕްވިޗް ޓައުން އަތުން 3-1 އިން ބަލިވުމަކީ ބްރައިޓަންއަށް ޕްރެމިއަރ ލީގަށް އެރުނުކަން ކަށަވަރުވި އެއް ސަބަބެވެ.

ބްރައިޓަން ޕްރެމިއަރ ލީގަށް ޕްރޮމޯޓްވެފައި މިވަނީ 34 އަހަރުގެ މެދުކެނޑުމަކަށް ފަހު އެވެ. އެ ކުލަބުން އެންމެ ފަހުން ޕްރެމިއަރ ލީގުގައި ކުޅެފައިވަނީ 1982-83 ގެ ސީޒަނުގައެވެ.

ޗެމްޕިއަންޝިޕްގެ ޕޮއިންޓް ތާވަލަށް ބަލާއިރު ބްރައިޓަން އެއްވަނައިގައި އޮތީ، 92 ޕޮއިންޓާއެކުއެވެ. ދެވަނައިގައި ނިއުކާސަލް ޔުނައިޓެޑް އޮތީ 85 ޕޮއިންޓާއެކުއެވެ. 79 ޕޮއިންޓާއެކު ތިންނަވައިގައި އޮތީ ރެޑިންގ އެވެ.

ޗެމްޕިއަންޝިޕްގައި ކުޅޭ ޓީމުތަކުގެ ތެރެއިން، އޮޓެމެޓިކުން ޕްރިމިއަރ ލީގަށް ކޮލިފައިވަނީ، އެއްވަނަ އަދި ދެވަނަ ހޯދާ ޓީމެވެ.

ބްރައިޓަންއަށް ޗެމްޕިއަންޝިޕް ޓައިޓަލް އުފުލާލުމަށް މިހާރު ބޭނުން ވަނީ އެންމެ ތިން ޕޮއިންޓެވެ. ހުކުރު ދުވަހު ނޯވިޗް ސިޓީއާ ދެކޮޅަށް ކުޅޭ މެޗުން މޮޅުވެއްޖެ ނަމަ ބްރައިޓަންއަށް ހަމަޖެހިލައިގެން ޕްރެމިއަރ ލީގަށް ތައްޔާރުވާން ވަގުތު ލިބޭނެއެވެ.