ރެއާލް ދޫކޮށްލުމަށްފަހު ޕެޕޭ ޗައިނާ ލީގަށް ބަދަލުވަނީ!

ރެއާލް މެޑްރިޑް ދޫކޮށްލުމަށްފަހު, ޕޯޗުގަލް ޑިފެންޑަރު ޕެޕޭ ޗައިނާ ލީގަށް ބަދަލުވާން އެޅޭ ކަމަށް ރިޕޯޓްތައް ބުނެފި އެވެ.

ގޯލްޑޮޓްކޮމް އިން ބުނީ ޗައިނީޒް ސުޕާ ލީގުގެ ހިބެއި ފޯޗިއުން އިން ޕެޕޭ ހޯދުމަށް ޝައުގުވެރިވާ ކަމަށާއި، އެގޮތުން 15 މިލިއަން ޔޫރޯގެ ހުށަހެޅުމަށް ޕެޕޭ އަށް އެޓީމުން ވަނީ ހުށަހަޅާފައިވާ ކަމަށެވެ.

މެންޗެސްޓާ ޔުނައިޓެޑް އަދި ޔުވަންޓަސް އިންވެސް ހޯދުމަށް ޝައުގުވެރިވާ ޕެޕޭ މި ސީޒަނަށްފަހު އެޓީމް ދޫކޮށްލާނެކަމަށް ރިޕޯޓްތައް ބުނާއިރު، ޖެނުއަރީ ޓްރާންސްފާގައިވެސް ބައެއް ކްލަބްތަކުން އޭނާ ހޯދުމަށް މަސައްކަތްކުރަމުން އަންނަ ކަމަށްވެސް ރިޕޯޓްތައް ވަނީ ބުނެފައެވެ.

ޕޯޓޯ އިން 2007 ވަނަ އަހަރު ރެއާލް އަށް ބަދަލުވި ޕެޕޭ ވަނީ އެޓީމަށް މިހާތަނަށް ކުޅުނު 10 ސީޒަނުގައި 327 މެޗު ކުޅެދީ 14 ލަނޑު ކާމިޔާބުކޮށްފައެވެ. މީގެއިތުރުން އޭނާ ވަނީ އެޓީމާއެކު ޔުއެފާ ޗެމްޕިއަންސް ލިގު، ޔުއެފާ ސުޕާކަޕް، ފީފާ ކްލަބް ވޯލްޑްކަޕް، ސްޕެނިޝް ލަލީގާ، ކޮޕާޑެލްރޭ އަދި ސްޕެނިޝް ސުޕާ ކަޕް ކާމިޔާބުކޮށްފަ އެވެ.

މީގެއިތުރުން އޭނާ ވަނީ ޕޯޗުގަލް ޓީމާއެކު ނިމިގެންދިޔަ ޔޫރޯ ފުޓުބޯޅަ މުބާރާތުގައި ކުޅެ އެ މުބާރާތް އެޓީމާއެކު ކާމިޔާބުކޮށްފައެވެ. އެ މުބާރާތަކީ ޕޯޗުގަލް އިން އެޓީމުގެ ފުޓުބޯޅަ ތާރީހުގައި ކާމިޔާބުކުރި ފުރަތަމަ ބައިނަލްއަގުވާމީ ތައްޓެވެ.