އަންނަ ސީޒަންގެ ޔޫއެފާ ޗެމްޕިއަންސް ލީގަށް ދާނެ ގޮތަކާ މެދު ވިސްނަމުންދާ ކަމަށް މެންޗެސްޓަރ ޔުނައިޓެޑްގެ ކޯޗް ހޯޒޭ މޮރީނިއޯ ބުނެފިއެވެ.

ނޫސްވެރިންނާއި ވާހަކަ ދައްކަމުން މޮރީނީއޯ ބުނީ އިނގިރޭސި ލީގުގައި ކުރިއަށް ވަރަށް މުހިންމު މެޗުތަކެއް ހުރުމުން އެމެޗުތަކަށް ފަހު ޗެމްޕިއަންސް ލީގަށް ދިޔުމަށް އިތުރު ސަމާލު ކަމެއް ދޭނެ ކަމަށެވެ.

އިނގިރޭސި ލީގުގެ ފަސްވަނައިގައި މިވަގުތު ޔުނައިޓެޑް އަންނަ ސީނުގެ ޗެމްޕިއަންސް ލީގަށް ދެވިދާނެ ދެ މަގެއް އެބައޮތެވެ. އެގޮތުން ޕްރިމިއާ ލީގުގެ ގަދަ ހަތަރަކުން ޖާގަ ހޯދައިގެން ކޮލިފައިވުމުގެ ފުރުސަތު އޮތް އިރު ޔޫރޮޕާ ލީގުގެ ޗެމްޕިއަންކަން ހޯދައިގެން ވެސް ޗެމްޕިއަންސް ލީގަށް ކޮލިފައިވުމުގެ ފުރުސަތު އެބައޮތެވެ.

ޕްރެމިއަރ ލީގުގެ ތާވަލުގެ ފަސްވަނައިގައި ޔުނައިޓެޑް އޮތީ 28 މެޗުން 53 ޕޮއިންޓް ހޯދައިގެންނެވެ. ލީގުގެ ހަތަރު ވަނަގައި އޮތް މެންޗެސްޓަރ ސިޓީ، އެއް މެޗު އިތުރަށް ކުޅެގެން ލިބިފައިވަނީ 58 އެވެ. އެހެން ދެޓީމުގެ މެދުގައި 5 ޕޮއިންޓްގެ ފަރަޤު އަދި އެބައޮތެވެ.

ޔޫރޮޕާ ކަޕްގައި ޔުނައިޓެޑް އޮތީ ކުއާޓާ ފައިނަލުގައެވެ. ކުއާޓާ ފައިނަލްގައި ޔުނައިޓެޑް ނުކުންނަން ޖެހޭނީ ބެލްޖިއަމްގެ ރޯޔަލް ސްޕޯޓިން ކުލަބް އަންޑަލެކްއާ ދެކޮޅަށެވެ. މި ކުއާޓަރ ފައިނަލްގައި މި ދެޓީމު ބައްދަލުކުރާ ފުރަތަމަ ލެގުގެ މެޗު އޮންނާނީ މިމަހުގެ 14 ވަނަ ދުވަހު އަންޑަލެކްގެ ދަނޑުގައެވެ.

މޮރީނިއޯ ބުނެފައިވަނީ ޗެމްޕިއަންސް ލީގަށް ކޮލިފައިވުމަށް ޔުނައިޓެޑަށް އޮތް ދެމަގުވެސް ވަރަށް އުނގޫ ކަމަށެވެ. ނަމަވެސް ނަތީޖާ ނެރެންޖެހޭތީ އެމުބާރާތަށް ދެވޭނެ މަގަކާ މެދު ވިސްނަން ޖެހޭ ކަމަށް އޭނާ ބުނެފައި ވެއެވެ.

ޕްރެމިއާ ލީގުގައި އެންމެ ފަހުން ޔުނައިޓެޑުން ކުޅުނު މެޗު ވަނީ އެއްވަރުވެފައެވެ. ލީގުގައި ދެން ޔުނައިޓެޑް ކުޅޭނީ އަންގާރަ ދުވަހުގެ ރެއެވެ. އެމެޗުގައި ޔުނައިޓެޑް ނުކުންނާނީ އެވަޓަންއާ ދެކޮޅަށެވެ.

އަންގާރަ ދުވަގެ ރޭގެ މެޗަށް ޔުނައިޓެޑުން ނުކުންނައިރު، ސަސްޕެންޝަނުގެ ސަބަބުން ލީގުގައި ނުކުޅެވުނު ޒަލަޓަން އިބްރަހިމޮވިޗަށް މި މެޗުގައި ކުޅެވޭނެއެވެ. އިބްރަހިމޮވިޗަށް ސަސްޕެންޝަނާއި ކުރިމަތިލާންޖެހުނީ ބޯންމައުތާއި 1-1 އެއްވަރުވި މެޗުގައި ބޯންމައުތްގެ ޓައިރަން މިންގްސްއަށް އުޅޮބޮށިން ހަމަލާ ދިނުމުންނެވެ.

މީގެ އިތުރުން އަނިޔާގައި ހުރި ފައުލް ޕޮގްބާ މިރޭގެ މެޗުގައި ފެނުމުގެ ފުރުސަތު އެބައޮތް ކަމަށް މޮރީނިއޯ ވަނީ ބުނެފަ އެވެ.