ޕްރައިމަރީގައި ވާދަވެރިކަމެއް ނެތި ނާޒިމަށް އެމްއެންޕީގެ ރިޔާސީ ޓިކެޓް

މޯލްޑިވްސް ނޭޝަނަލް ޕާޓީ (އެމްއެންޕީ)ގެ ރިޔާސީ ޕްރައިމަރީއަށް ވާދަކުރުމަށް ހުޅުވާލުމުން އެކަމަށް އެޕާޓީގެ ރައީސް އަދި ދަނގެތި ދާއިރާގެ މެންބަރު މުހައްމަދު ނާޒިމް އެކަނި ކުރިމަތިލެއްވުމުން ޕްރައިމަރީއަކާއި ނުލާ އޭނާއަށް އެމްއެންޕީގެ ރިޔާސީ ޓިކެޓް ލިބިވަޑައިގެންފިއެވެ.

އިދިކޮޅު ޕާޓީއެއްގެ ގޮތުގައި މަސައްކަތްކުރުމަށް ނިންމާފައިވާ އެމްއެންޕީގެ ރިޔާސީ ޕްރައިމަރީގައި ވާދަކުރުމަށް ހުޅުވާލީ ޑިސެމްބަރު 1 ވަނަ ދުވަހުއެވެ. ވާދަކުރުމުގެ ފުރުސަތު ޑިސެމްބަރު 14 ވަނަ ދުވަހުގެ މެންދުރު 2 ޖެހުމާ ހަމައަށް ހުޅުވާލިއެވެ. ރިޔާސީ ޕްރައިމަރީގައި ވާދަކުރުމަށް ހުޅުވާލުމުން އެކަމަށް އެދި ހުށަހެޅުއްވީ ނާޒިމް އެކަންޏެވެ. އެހެންކަމުން އެމްއެންޕީގެ އަސާސީ ގަވާއިދުގައިވާ ގޮތުގެ މަތިން ނާޒިމަށް ވަނީ ރިޔާސީ ޓިކެޓް ލިބިވަޑައިގަންނަވާފައެވެ.

ޕާޓީގެ އަސާސީ ގަވާއިދު ބުނާގޮތުން ރިޔާސީ ޕްރައިމަރީއަށް އެކަކު ކުރިމަތިލައިފިނަމަ އިންތިޚާބެއް ބާއްވާކަށް ނުޖެހެއެވެ.

އެމްއެންޕީގެ ރިޔާސީ ޓިކެޓް ނާޒިމަށް ލިބިވަޑައިގަންނަވާފައިވާކަން އެޕާޓީން ހާމަކޮށްފައިވާއިރު ރަސްމީކޮށް ޓިކެޓް ހަވާލުކުރުން އޮންނާނެ ތާރީޚެއް އަދި އެޕާޓީން ހާމައެއް ނުކުރެއެވެ.

އަންނަ އަހަރު އޮންނަ ރިޔާސީ އިންތިޚާބުގައި ވާދަކުރުމަށް މިހާތަނަށް ރިޔާސީ ޓިކެޓް ރަސްމީކޮށް ހަވާލުކޮށްފައިވަނީ އިދިކޮޅު ޕީޕީއެމް /ޕީއެންސީންނެވެ. އެއީ ކުރީގެ ރައީސް އަބްދުﷲ ޔާމީނަށެވެ.