ތިލަފުށިން ބިދޭސީންނަށް ދިގު މުއްދަތަކަށް ބިން ވިއްކާގޮތަށް ހަމަޖައްސާފައިވާތީ މޯލްޑިވްސް ނެޝަނަލް ޕާޓީ (އެމްއެންޕީ) އިން ކަންބޮޑުވުން ފާޅުކޮށްފިއެވެ.

ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) މިދިޔަ ބުރާސްފަތި ދުވަހު ނެރުނު ބަޔާނެއްގައި ވަނީ ބީލަމުގެ އުސޫލުން ތިލަފުށިން ބިން ވިއްކާނެ އުސޫލު އާއްމުކޮށްފައެވެ. އެގޮތުން ދިވެހިންނާއި ބޭރު ފަރާތްތައް ހިމެނޭހެން އަމިއްލަ ފަރުދަކަށް ނުވަތަ ކުންފުންޏަކަށް ވެސް ބީލަން ހުށަހެޅިދާނެ ކަމަށާއި ބީލަން ކާމިޔާބު ކުރާ ފަރާތަކީ ދިވެހި ފަރުދެއް ނުވަތަ ކުންފުންޏެއްނަމަ އެ ފަރާތަކަށް ބިން މިލްކު ކުރެވޭނެ ގޮތަށް އަދި ބޭރުގެ ފަރާތްތަކަށް ބިން ކުއްޔަށް ދޫކުރާނީ 99 އަހަރަށް ކަމަށް ވަނީ ކަނޑައަޅައިފައެވެ.

މި ނިންމުމާ ގުޅިގެން ހޯމަ ދުވަހު އެމްއެންޕީން ނެރުނު ބަޔާނެއްގައި ބުނީ މާލެއަކީ ރާއްޖޭގެ ސިނާއީ ހަބް ކަމުގައިވާއިރު، ތިލަފުއްޓަކީ މާލޭގެ ސިނާއީ ތަރައްގީގެ ވަރަށް މުހިންމު ބައެއް ކަމަށެވެ. އަދި މާލެ ސަރަހައްދަކީ ބިމުގެ ގޮތުން ދަތި ސަރަހައްދަކަށްވާއިރު، މާލޭގެ ސިނާއީ ބޭނުންތަކަށް ބިން ކަނޑައަޅާފައިވާ ސަރަހައްދަކުން، ބޭރުގެ ފަރާތްތަކަށް ބިން ވިއްކަން 99 އަހަރަށް ދިނުމަށް ހުޅުވާލުމަކީ ކަންބޮޑުވާ ކަމެއް ކަމަށް ވަނީ ބުނެފައެވެ.

ކުދި އަދި މެދު ފަންތީގެ ވިޔަފާރި ކުރާ ފަރާތްތަކަށް ބޭރުގެ މީހުންނާއެކު ވާދަކޮށްގެން ބިން ހޯދުމުގެ ވާދަވެރިކަމަކަށް ވަންނަން ޖެހުމަކީ ކުދި އަދި މެދު ފަންތީގެ ވިޔަފާރިތަކަށް ވަރަށް ބޮޑެތި ނޭދެވޭ އަސަރުކުރާނޭ ކަމެއްކަމުގައި ދެކޭކަމަށް ވެސް އެމްއެންޕީން ވަނީ ބުނެފައެވެ. އަދި ކޮވިޑްގެ ގެއްލުންތަކުން ވިޔަފާރިތަކަށް މުޅިން އަރައިނުގަނެވިގެން އުޅެނިކޮށް، ދިވެހި ވިޔަފާރިވެރިންނަށް ހުރި ރައްކާތެރިކަމުގެ އުސޫލުތައް ނިގުޅައިގަތުމަކީ ބަލައިގަނެވޭނޭ ކަމެއްނޫން ކަމަށް ވެސް އެ ޕާޓީން ބުނެއެވެ.

މީގެ އިތުރުން މީގެ ސަބަބުން ރާއްޖޭގެ އިގްތިސާދަށާއި އަދި އާއިލާތަކުގެ މާލީ ހާލަތަށް ސީދާ ގެއްލުންވާނެ ކަމަށް ވެސް އެމްއެންޕީއިން ބުނެއެވެ.

ތިލަފުށީގެ ސިނާއީ ސަރަޙައްދުން ބޭރުމީހުންނަށް ބިންވިއްކުމަށް ނިންމާފައިވާ ނިންމުން ބަދަލުކުރުމަށް އެމްއެންޕީން ވަނީ ސަރުކާރަށް ގޮވާލައިފައެވެ.