ރާއްޖޭގައި ފުރަތަމަ ފަހަރަށް ޓާވީ ޕްރޮސީޖަރ ހަދައިފި
މި ޕްރޮސީޖަރ އާންމުގޮތެއްގައި ހަދަނީ 70 އަހަރުން މަތީގެ އުމުރުން ދުވަސްވެފައިވާ މީހުންގެ
ރާއްޖޭގައި ޓާވީ ޕްރޮސީޖަރގެ ޚިދުމަތް ފަށާފައިވަނީ އޭޑީކޭ ހޮސްޕިޓަލުން
ބޮޑެތި ހިތުގެ ބަލިތައް ހުންނަ ފަރާތްތަކަށް ފަރުވާދިނުމަށް ހަދާ ޓްރާންސްކޭތިޓަރ އެއޯރޓިކް ވޭލް އިމްޕްލިމެންޓޭޝަން (ޓާވީ) ޕްރޮސީޖަރ ރާއްޖޭގައި ފުރަތަމަ ފަހަރަށް ހަދައިފިއެވެ.
މި ޕްރޮސީޖަރ ހަދާފައިވަނީ އޭޑީކޭ ހޮސްޕިޓަލުގައި މިދިޔަ ހުކުރު ދުވަހުއެވެ. މިއީ ރާއްޖޭގައި މި އޮޕަރޭޝަން ކުރެވުނު ފުރަތަމަ ފަހަރެވެ. އޭޑިކޭ ހޮސްޕިޓަލުގައި ހުކުރު ދުވަހު މި ޕްރޮސީޖަރ ހަދާފައިވަނީ އުމުރުން 82 އަހަރުގެ ފިރިހެނެއްގެއެވެ.
މި ޕްރޮސީޖަރ އަކީ މީހާގެ ދިރިއުޅުން ބަދަލުކޮށްލާފަދަ ޕްރޮސީޖަރއެއްކަން ފާހަގަކުރައްވާ، މި އޮޕަރޭޝަންގައި އިސްކޮށް ހަރަކާތްތެރިވި އިންޑިއާގެ ޑޮކްޓަރު ސާއީ ވިދާޅުވީ ހުކުރު ދުވަހު ކުރެވިގެން ދިޔައީ ކުޑަ އޮޕަރޭޝަނެއް ނޫން ކަމަށެވެ. އަދި މި ޕްރޮސީޖަރ ހަދާފައިވަނީ ސިއްހީ ހާލަތު ވަރަށް ދެރަ މީހެއްގެ ކަމަށާއި، މިއީ ގިނަ ދުވަހު މި މަސައްކަތް ކޮށްފައިވާ ތަޖުރިބާކާރު ޑޮކްޓަރުންނަށްވެސް ކުރަން އުނދަގޫވާނެފަދަ ކޭސްއެއްކަމަށް ވިދާޅުވިއެވެ. ނަމަވެސް މި ޕްރޮސީޖަރ ކާމިޔާބު ކަމާއެކު ނިންމާލެވިފައިވާ ކަމަށާއި، ބަލިމީހާގެ ހާލު ރަނގަޅުވަމުން އަންނަނަކަމަށްވެސް ވިދާޅުވިއެވެ.
މި އޮޕަރޭޝަން ކުރަނީ ހިތުގެ ވޭލްއެއް ތާށިވުމުގެ ސަބަބުން ދިމާވާ މައްސަލަތައް ހައްލުކުރުމަށެވެ. އެގޮތުން މި ޕްރޮސީޖަރ އާންމުގޮތެއްގައި ހަދަނީ 70 އަހަރުން މަތީގެ އުމުރުން ދުވަސްވެފައިވާ މީހުންގެއެވެ.
ބަލިމީހާގެ ފައިވަޅުން ހޮޅި ލައްވައިގެން ހިތުގެ ތާށިވެފައިވާ ވޭލްއާއި ހަމައަށް ގެންގޮސް އެވޭލްގެ ތެރެއަށް ޑިވައިސްއެއް ލައްވައިގެން ކުރާ މި ޕްރޮސީޖަރގެ ސަބަބުން މީހާގެ ހަށިގަނޑުން ބައެއް ފަޅާލައިގެން ކުރާ ސާޖަރީތަކުގެ ސަބަބުން ކުރިމަތިވާ ސްޓްރެސް ކުޑަކޮށްދޭނެއެވެ. އަދި ބަލިމީހާ ރަނގަޅުވުމަށް ނަގާ މުއްދަތުވެސް ކުރުވެގެންދާނެއެވެ. އެގޮތުން ހަށިގަނޑުން ބައެއް ފަޅާލައިގެން ކުރާ އޮޕަރޭޝަންއަށްފަހު ހަފްތާއެއްހާ ދުވަހު ބަލިމީހާ ހޮސްޕިޓަލުގައި ބާއްވަން ޖެހޭއިރު، މި ޕްރޮސީޖާ ހަދާފައި ދެ ދުވަސްތެރޭގައި ބަލިމީހާ ދޫކޮށްލެވޭނެއެވެ.
ރާއްޖޭގައި ފުރަތަމަ ފަހަރަށް މި ޕްރޮސީޖަރ ހެދުނުއިރު، މިއީ މި ސަރަހައްދުގައިވެސް ވަރަށް މަދު ގައުމެއްގައި ކުރެވޭ އޮޕަރޭޝަނެކެވެ. މި ސަރަހައްދުގައި މިހާރު މި އޮޕަރޭޝަން ހެދެނީ ރާއްޖެ ފިޔަވާ އިންޑިއާ އަދި ބަންގްލަދޭޝްގައެވެ. އިންޑިއާގައި މި ޕްރޮސީޖަރ ހަދަން ފަށާފައިވަނީ 2015 ވަނަ އަހަރުއެވެ. މި ޕްރޮސީޖަރ ބަންގްލަދޭޝަށް ތައާރަފްކުރީ މީގެ ދެމަސް ކުރިންނެވެ.
މި ޕްރޮސީޖަރ އާއި ގުޅޭގޮތުން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަމުން އޭޑީކޭ ހޮސްޕިޓަލުގެ މެނޭޖިންގ ޑިރެކްޓަރ އަހުމަދު އައްފާލް ވިދާޅުވީ، މި ޕްރޮސީޖަރ ރާއްޖޭގައި ހެދުމަކީ ފަޚުރުވެރިވާން ޖެހޭ ކަމެއް ކަމަށެވެ. އަދި މި ޕްރޮސީޖަރ ނުހެދި މީގެ ކުރިން މަޑުޖެހިފައި އޮތީ މިކަމަށް ބޭނުންވާ އިންތިޒާމުތައް ފުރިހަމަކުރުމުގައި ދަތިތަކަކާއި ކުރިމަތިލާން ޖެހުމުންކަމަށް އައްފާލް ވިދާޅުވިއެވެ.
މި ޚިދުމަތް ރާއްޖެއަށް ތައާރަފް ކުރުމުގެ ކުރިން މިކަމަށް ބޭނުންވާ ވަސީލަތްތައް ހޯދުމާއި މީހުން ތަމްރީނު ކުރުމުގައި ދަތިތަކެއް ހުރިކަން އައްފާލް ފާހަގަކުރެއްވިއެވެ. އެގޮތުން މި ޕްރޮސީޖަރ ހެދުމަށް އެންމެ އެކަށޭނަ ވަސީލަތްތައް ހޯދުމާއި، މިކަމަށް ބޭނުންވާ ތަމްރީނު ދިނުމުގައި ކޮވިޑުގެ ސަބަބުން ދަތިތަކަކާއި ކުރިމަތިލާން ޖެހުނުކަމަށް ވިދާޅުވިއެވެ.
މި ފަރުވާއަށް އާސަންދައިގެ ޚިދުމަތް މިހާތަނަށް ހަމަޖެހިފައި ނުވާއިރު، އެޚިދުމަތް ހޯދުމުގެ މަސައްކަތް މިހާރު އޭޑީކޭއިން އަންނަނީ ކުރަމުންނެވެ. މިހާރުވެސް ގިނަ ބަލިތަކަކަށް ފަރުވާދެމުންދާ އޭޑީކޭ ހޮސްޕިޓަލުގެ އަމާޒަކީ ފަސޭހަކަމާއެކު ރައްޔިތުންނަށް ބޭނުންވާ ސިއްހީ ފަރުވާތައް ލިބޭނެ އިންތިޒާމުތައް ހަމަޖައްސައިދިނުމެވެ.
