ސެމީ ފައިނަލް މެޗަށް ފްރާންސްގެ ރައީސް ޤަތަރަށް

ފީފާ ވޯލްޑް ކަޕްގައި ފްރާންސާއި މޮރޯކޯ ބައްދަލުކުރާ ސެމީ ފައިނަލް މެޗު ބައްލަވާލެއްވުމަށް ފްރާންސްގެ ރައީސް އެމަނުއެލް މެކްރޯން ޤަތަރަށް ވަޑައިގަތުމަށް ނިންމަވައިފިއެވެ.

ފްރާންސްގެ ސްޕޯޓްސް މިނިސްޓަރު އަމެލީ އޯދެއާ ކަސްޓޭޜާ ވަނީ ފްރާންސްގެ މެޗު ބައްލަވާލެއްވުމަށް އެގައުމުގެ ރައީސް ޤަތަރަށް ވަޑައިގަތުމަށް ނިންމާފައިވާކަން ހާމަކޮށްފައެވެ. އެންމެ ފަހުގެ ޗެމްޕިއަން ފްރާންސުން މިފަހަރުގެ މުބާރާތާއި ކުރިމަތިލީ އަނިޔާގެ ސަބަބުން ޓީމުގެ މުހިންމު ކުޅުންތެރިންތަކެއް ނުލައެވެ. ނަމަވެސް ފްރާންސުން އަންނަނީ މި މުބާރާތުގައި މޮޅު ކުޅުމެއް ދައްކަމުންނެވެ. މުބާރާތުގައި ބަލިވީ އެންމެ މެޗަކުންނެވެ. އެއީ ޓިއުނީޝިޔާ އާއި ދެކޮޅަށް ކުޅުނު ގްރޫޕް ސްޓޭޖުގެ ފަހު މެޗުންނެވެ.

ފްރާންސުން މުބާރާތުގެ ސެމީ ފައިނަލުގެ ޖާގަ ކަށަވަރުކުރީ ކުއާޓާ ފައިނަލުގައި އިންގްލެންޑުގެ މައްޗަށް ކުރިހޯދައިގެންނެވެ. ފްރާންސް މޮޅުވީ 2-1ންނެވެ. ފްރާންސާއި މޮރޯކޯ ވާދަކުރާ ސެމީ ފައިނަލް މެޗު އޮންނާނީ ބުދަ ދުވަހުގެރޭ ރާއްޖެ ގަޑިން ދަންވަރު 12 ޖަހާއިރުއެވެ.

މީގެ ކުރިންވެސް ފްރާންސްގެ ރައީސް އޮފީހުން ވަނީ ޓީމު ސެމީ ފައިނަލަށް ދަތުރުކޮށްފިނަމަ އެމަނުއެލް މެޗު ބައްލަވާލެއްވުމަށް ވަޑައިގަންނަވާނެކަމުގެ އިޝާރާތެއް ކޮށްފައެވެ.