އެކުވެރި ޤައުމު ތަކުގެ ބައްދަލުވުމަށް ހުކުރު ދުވަހު ޒެލެންސްކީ އިނގިރޭސިވިލާތަށް

ރަޝިޔާ އިން ޔުކްރެއިންގައި ހިންގަމުން އަންނަ ހަނގުރާމައާ ދެކޮޅަށް، އެކުވެރި ޤައުމު ތަކުގެ ބައްދަލުވުމުގައި ބައިވެރިވެ ވަޑައިގަތުމަށް ޔުކްރެއިންގެ ރައީސް ވުލޮޑިމިއަރ ޒެލެންސްކީ އިނގިރޭސިވިލާތަށް ވަޑައިގަންނަވާނެ ކަމަށް ހާމަ ކޮށްފި އެވެ.

މިކަން ހާމަ ކުރައްވާފައި ވަނީ ފްރާންސްގެ ރައީސް އިމަނުއެލް މެކްރޮން އެވެ. މެކްރޮން ވިދާޅުވެފައިވާ ގޮތުގައި، ހުކުރު ދުވަހު އިނގިރޭސިވިލާތުގެ ލަންޑަންގައި އޮންނަ "ކޯލިޝަން އޮފް ދަ ވިލިން" ގެ ބައްދަލުވުމުގައި ޒެލެންސްކީ ބައިވެރިވެ ވަޑައިގަންނަވާނެ އެވެ.

މި ބައްދަލުވުމަކީ ރަޝިޔާ އިން ޔުކްރެއިންއާ ދެކޮޅަަށް ހިންގަމުން އަންނަ ހަނގުރާމައިގައި ޔުކްރެއިން އަށް ލިބޭ އެހީތެރިކަން އިތުރު ކުރުމަށް ބާއްވާ މުހިންމު ބައްދަލުވުމަކަށް ވާނެ އެވެ. މީގެ ކުރިން ވެސް މި ކޯލިޝަންގެ ބައްދަލުވުންތައް ވަނީ ބާއްވައިފަ އެވެ.

ސްލޮވޭނިއާގައި އޮތް ނޫސްވެރިންގެ ބައްވަލުވުމެއްގައި ވާހަކަ ދައްކަވަމުން މެކްރޮން ވިދާޅުވީ، އެ ބައްދަލުވުން ކުރިއަށް ދާނީ ބައެއް ބައިވެރިން ސީދާ ހާޒިރުވެގެން ކަމަށާއި، އަނެއް ބައި މެމްބަރުން ބައިވެރި ވާނީ އޮންލައިންކޮށް ކަމަށެވެ. "ކޯލިޝަން އޮފް ދަ ވިލިން" ގެ ނަމުގައި އުފައްދާފައިވާ މި ކޯލިޝަން އަކީ ފްރާންސް އާއި އިނގިރޭސިވިލާތް ގުޅިގެން މިއަހަރުގެ ފެބްރުވަރީ މަހު އުފެއްދި އިއްތިހާދެކެވެ.

މި އިއްތިހާދުގެ މައިގަނޑު މަޤްޞަދަކީ ޔުކްރެއިން އަށް ދެވޭނެ އަސްކަރީ އެހީތެރިކަން ކަނޑަ އެޅުމާއި، މުސްތަޤުބަލު ގައި ހަނގުރާމަ ހުއްޓުމަކަށް އައުމަށް ފަހު، ރަޝިޔާ އިން އަލުން ހަމަލާ ދިނުން ހުއްޓުވުމަށް ކުރެވި ދާނެ ކަންކަން ރޭވުމެވެ. މިކަމާ ގުޅޭ ގޮތުން ފާއިތުވި މަސް ތަކުގައި ތަފާތު ފެންވަރު ތަކުގައި މަޝްވަރާތައް ކުރެވިފައިވެ އެވެ.

މީގެ އިތުރުން، ޔުކްރެއިންގެ ރައީސް ޒެލެންސްކީ ވަނީ ފާއިތުވި ހަފްތާގައި އެމެރިކާގެ ރައީސް ޑޮނަލްޑް ޓްރަމްޕާ އެކު ބޭއްވުނު ބައްދަލުވުން ކާމިޔާބު ބައްދަލުވުމެއްގެ ގޮތުގައި ސިފަ ކުރައްވާފައި އެވެ. އެ ބައްދަލުވުމުގައި އައު ވައިގެ ދިފާއީ ނިޒާމުތައް ހޯދުމާ ގުޅޭ ގޮތުން ކުރި އެރުންތަކެއް ލިބިފައިވާ ކަމަށް ޒެލެންސްކީ ވިދާޅުވި އެވެ.