މެކްރޮންއާ ބައްދަލު ކުރެއްވުމަށް ހޯމަ ދުވަހު ޒެލެންސްކީ ފްރާންސް އަށް ވަޑައިގަންނަވަނީ

ޔުކްރެއިންގެ ރައީސް ވުލޮޑޮމިއަރ ޒެލެންސްކީ، ހޯމަ ދުވަހު ފްރާންސް އަށް ވަޑައިގަންނަވާ ގޮތަށް ހަމަޖެހިއްޖެ އެވެ.

ފްރާންސްގެ ރިޔާސީ ގަނޑުވަރުން ހާމަ ކޮށްފައިވާ ގޮތުގައި، ހޯމަ ދުވަހު ޒެލެންސްކީ ފްރާންސްގެ ވެރި ރަށް ޕެރިހަށް ވަޑައިގަންނަވާނެ އެވެ. އަދި އެ ދަތުރުފުޅުގައި ޒެލެންސްކީ އާއި ފްރާންސްގެ ރައީސް އިމަނުއެލް މެކްރޮންއާ ބައްދަލު ކުރައްވާނެ ކަމަށް ވެސް ހާމަ ކޮށްފައިވެ އެވެ.

ޒެލެންސްކީ ފްރާންސް އަށް ވަޑައިގަންނަވަނީ، 2022 ވަނަ އަހަރުން ފެށިގެން ކުރިއަށް ދަމުން އަންނަ ރަޝިޔާ-ޔުކްރެއިން ހަނގުރާމައިގެ އެންމެ ދަތި ސިޔާސީ އަދި ހަނގުރާމައިގެ ބިރުވެރި ކަމުގެ ޙާލަތުގެ ތެރޭގައި އޮއްވާ އެވެ.

ޒެލެންސްކީ އާއި މެކްރޮންގެ ބައްދަލުވުމުގައި ދެ ރައީސުން ވެސް، ހަނގުރާމައިގެ ދެމެހެއްޓެނިވި ސުލްޙަވެރި ކަމެއް ހޯދުމަށް މަޝްވަރާ ކުރައްވާނެ އެވެ. އެ މަޝްވަރާ ތަކުގައި އެމެރިކާގެ ފަރާތުން ހުށަހަޅާފައިވާ ސުލްޙައިގެ ޕްލޭން އާއި، ޖެނީވާގައި ކުރިއަށް ދިޔަ މަޝްވަރާތަކާ ގުޅޭ ގޮތުން ވެސް ދެ ރައީސުން ވާހަކަ ދައްކަވާނެ އެވެ.

އެންމެ ފަހުން ޒެލެންސްކީ ފްރާންސް އަށް ވަޑައިގެންފައި ވަނީ ނޮވެމްބަރު މަހުގެ 17 ވަނަ ދުވަހު އެވެ. މިއީ ނޮވެމްބަރު މަހުގެ ތެރޭގައި ޒެލެންސްކީ ފްރާންސް އަށް ވަޑައިގަންނަވާ ދެ ވަނަ ފަހަރެވެ. މިހާ ކުރު މުއްދަތެއްގެ ތެރޭގައި އަނެއްކާ ވެސް ޒެލެންސްކީ ފްރާންސް އަށް ވަޑައިގަންނަވާއިރު، އެކަމުން ދައްކުވައި ދެނީ ދެ ޤައުމުގެ ދެ މެދުގައި އޮތް ގާތް އަދި ވަރުގަދަ ކުޅުން ކަމަށް މާހިރުން ފާހަގަ ކުރެ އެވެ.

ޔުކްރެއިންއާ ދެކޮޅަށް ރަޝިޔާ އިން ހިންގަމުން އަންނަ ހަނގުރާމަ އަށް ތިން އަހަރު ވެފައިވާއިރު، މި ހަނގުރާމައިގެ ސަބަބުން ޔުކްރެއިން އަށް ވަނީ ބޮޑެތި ގޮންޖެހުން ތަކެއް ކުރިމަތިވެފަ އެވެ. ހަނގުރާމައިގެ ޙަރަކާތްތައް ދެމެހެއްޓުމަށް ބޭނުންވާ ހަތިޔާރާއި، އަދި އިޤްތިޞާދީ އެހީތެރިކަން ދެމެހެއްޓުމަށް ޔުކްރެއިން އިން މަސައްކަތް ކުރަމުން ދަނީ ބައިނަލްއަޤުވާމީ ބައިވެރިންގެ އެއްބާރުލުން ހޯދުމަށެވެ،

ފްރާންސް އަށް ޒެލެންސްކީ ވަޑައިގަންނަވާއިރު، މި ދަތުރުފުޅުގައި ފްރާންސް އިން ޔުކްރެއިން ދެމުން އަންނަ ހަތިޔާރާއި، އިޤްތިޞާދީ އެހީތެރިކަން ދެމެހެއްޓުމާާއި އަދި ސުލްޙައިގެ މަޝްވަރާ ތަކުގައި ޔުކްރެއިންގެ ހައްގުތައް ރައްކާތެރި ކުުރުމުގެ ގޮތްތަކަށް ވެސް މަޝްވަރާ ކުރާނެ ކަމަށް ވަނީ ބެލެވިފަ އެވެ.

މި ބައްދަލު ކުރެއްވުން ބޭއްވުމަށް ހަމަޖެހިފައި ވަނީ ބައިނަލްއަޤުވާމީ ސަރަހައްދުގައި ޔުކްރެއިން ހަނގުރާމައާ ގުޅޭ ގޮތުން ސިޔާސީ ޙައްލެއް ހޯދުމަށް ކުރަމުން އަންނަ މަސައްކަތް ވަރަށް ބޮޑަށް ހަލަބޮލިވެފައިވާ ވަގުތެއްގަ އެވެ. ޔޫރަޕިއަން ޔޫނިއަން އާއި އެމެރިކާ އިން ޔުކްރެއިން އަށް ދެމުން އަންނަ އެހީތެރިކަން ދެމެހެއްޓުމަކީ ޒެލެންސްކީގެ އެންމެ މުހިންމު އަމާޒުގެ ގޮތުގައި ފާހަގަ ކުރެވެ އެވެ.

ފްރާންސް އަކީ ވެސް ޔުކްރެއިން އަށް ވަރަށް ބޮޑު އެހީތެރިކަމަކާއި، އެއްބާރުލުމެއް ދެމުން އަންނަ ޤައުމަކަށްވާއިރު، ފްރާންސްގެ ރައީސް މެކްރޮން އަކީ ޔުކްރެއިންގެ ދިފާއުގައި ވަރަށް ގަދަ އަށް ވާހަކަ ދައްކަވާ ބޭފުޅެކެވެ. ރަޝިޔާއާ ދެކޮޅަށް ވާހަކަ ދައްކަވައި، އަދި ހަނގުރާމަ ނިންމުމުގައި ޔުކްރެއިންގެ ސަލާމަތާއި ރައްކާތެރިކަމަށް އިސްކަން ދޭން ޖެހޭ ކަމަށް މެކްރޮން އަންނަނީ ތަކުރާރުކޮށް ވިދާޅުވަމުންނެވެ.