ފުޓްބޯޅައިގެ ތާރީހުގައި ހަތަރު ފަހަރު ވޯލްޑްކަޕް މުބާރާތް ކާމިޔާބު ކޮށްފައިވާ ޖަރުމަނުން، އަންނަ އަހަރު އުތުރު އެމެރިކާގައި ބޭއްވުމަށް ހަމަޖެހިފައިވާ ފީފާ ވޯލްޑްކަޕްގެ ޖާގައެއް ހޯދައިފި އެވެ.

ޔޫރަޕްގެ ކޮލިފައިންގެ ގްރޫޕް އޭގައި ހޯމަ ދުވަހުގެ ރޭ ސްލޮވޭކިޔާއާ ދެކޮޅަށް ކުޅުނު މެޗު 6-0 ގެ ތަފާތު ބޮޑު ނަތީޖާއަކުން ކާމިޔާބު ކޮށްގެން ޖަރުމަނުން ވަނީ މި ޖާގަ ކަށަވަރުކޮށްފަ އެވެ.

2014 ވަނަ އަހަރުގެ ވޯލްޑްކަޕްގެ ޗެމްޕިއަންކަން ވެސް ހޯދާފައިވާ ޖަރުމަނުން ވަނީ މެޗުގެ ފުރަތަމަ ހާފުން ފެށިގެން މޮޅުކުޅުމެއް ދައްކާފަ އެވެ. މެޗުގެ 18 ވަނަ މިނިޓުގައި ނިކް ވޮލްޓެމޭޑް ވަނީ ލަނޑެއް ޖަހާ ޖަރުމަނަށް ކުރި ހޯދައިދީފަ އެވެ. މި ލަނޑާއެކު ވޮލްޓެމޭޑް ވަނީ އެންމެ ފަހުން ކުޅުނު ތިން މެޗުގައި ހަތަރު ލަނޑު ޖަހާފަ އެވެ. އޭގެ ފަހުން މެޗުގެ 29 ވަނަ މިނިޓުގައި ގޮރެޓްޒްކާ ދިން ޕާހަކުން ނަބްރީ ވަނީ ލަނޑެއް ޖަހާ ދެ ޓީމުގެ ދެމެދުގައިވާ ފަރަގު ބޮޑުކޮށްފަ އެވެ. ފުރަތަމަ ހާފުގެ ކުޅުން ނިމުމުގެ ކުރިން ލެރޯއި ސާނޭ ވަނީ އިތުރު ދެ ލަނޑު ޖަހާ މެޗުގެ ނަތީޖާ 4-0 އަށް ބަދަލުކޮށްފަ އެވެ.

ދެވަނަ ހާފުގައި ޖަރުމަނުން ވަނީ ބަދަލު ކުޅުންތެރިންގެ ގޮތުގައި ރިޑްލް ބާކޫ އާއި އަސާން ވެޑާއޮގޯ ކުޅެން އެރުވާފަ އެވެ. ބާކޫ އާއި ވެޑާއޮގޯ ވަނީ މެޗުގައި ޖަރުމަނުން ޖެހި ފަސްވަނަ ލަނޑާއި ހަވަނަ ލަނޑު ކާމިޔާބުކޮށްދީފަ އެވެ.

ޖަރުމަނުން މި މެޗު ކާމިޔާބު ކުރުމާއެކު އެ ޓީމަށް ވަނީ ގްރޫޕް އޭގައި ކުޅުނު ހަ މެޗުން ޖުމްލަ 15 ޕޮއިންޓާއެކު އެއްވަނަ މަގާމް ލިބިފަ އެވެ. ދެވަނައިގައި އޮތް ސްލޮވޭކިޔާއަށް 12 ޕޮއިންޓް ލިބިފައިވާއިރު، އެ ޓީމަށް އަދި ވޯލްޑްކަޕްގެ ޖާގައެއް ހޯދުމުގެ ފުރުސަތު އެބައޮތެވެ. ޔޫރަޕްގެ ޕްލޭއޮފް މެޗުތަކުން މޮޅުވެގެން ސްލޮވޭކިޔާއަށް އަންނަ އަހަރު އުތުރު އެމެރިކާގައި ބާއްވާ ވޯލްޑްކަޕްގެ ޖާގައެއް ހޯދުމުގެ ފުރުސަތު އެބައޮތެވެ.

އަންނަ އަހަރުގެ ވޯލްޑްކަޕް އޮންނާނީ އެމެރިކާ، ކެނެޑާ އަދި މެކްސިކޯގައެވެ. މިއީ ތިން ގައުމެއްގައި ވޯލްޑްކަޕް ބާއްވާ ފުރަތަމަ ފަހަރެވެ.