އެެންމެ ފަހުގެ 2 ވޯލްޑްކަޕަށް ވެސް ކޮލިފައި ނުވި އިޓަލީ، ޕްލޭ އޮފް ގައި މިފަހަރު ނޮދަން އަޔަލެންޑާ ދެކޮޅަށް

ފުޓްބޯޅައިގެ ތާރީހުގައި އެންމެ ކާމިޔާބު ގައުމުތަކުގެ ތެރޭގައި ހިމެނޭ އިޓަލީ އަށް އަންނަ އަހަރު އުތުރު އެމެރިކާގައި ބާއްވާ ފީފާ ވޯލްޑްކަޕަށް ކޮލިފައިވުމަށް ދަތިކަމެއް ކުރިމަތިވެއްޖެ އެވެ. ޔޫރަޕްގެ ކޮލިފިކޭޝަން ޕްލޭއޮފް ބުރުގައި ކުޅެން ޖެހޭ ފުރަތަމަ މެޗުގައި އިޓަލީ އަށް ކުޅެން ޖެހިފައިވަނީ ނޮދަން އަޔަލެންޑާ ދެކޮޅަށެވެ.

އެންމެ ފަހުން ބޭއްވި ދެ ވޯލްޑްކަޕަށް ވެސް އިޓަލީ ކޮލިފައިނުވި އިރު، މި ފަހަރު ވެސް އެ ޓީމަށް ކުޅެން ޖެހިފައިވަނީ ޕްލޭއޮފް މަރުހަލާގަ އެވެ.

2018 ވަނަ އަހަރު ރަޝިއާ ގައި ބޭއްވި ވޯލްޑްކަޕް ގެ ކޮލިފިކޭޝަން ޕްލޭއޮފް ގައި އިޓަލީ ބަލިވީ ސްވިޑެން އަތުން 1-0 އިންނެވެ. އެއީ އިޓަލީގެ ފުޓްބޯޅައިގެ ތާރީހުގައި ވަރަށް ދެރަވާ ދުވަހެއްގެ ގޮތުގައި ފާހަގަކުރެވުނު ދުވަހެކެވެ. އަދި 2022 ވަނަ އަހަރު ގަތަރުގައި ބޭއްވި ވޯލްޑްކަޕްގެ ކޮލިފިކޭޝަން ޕްލޭއޮފް ގައި އިޓަލީ އަށް އިތުރު ހިތްދަތިކަމެއް ކުރިމަތިވި އެވެ. އެ ފަހަރު އިޓަލީ ބަލިވީ ނޯތު މެސެޑޯނިއާ ކައިރިން 1-0 އިންނެވެ.

މި ފަހަރުގެ ކޮލިފިކޭޝަން ގްރޫޕް ސްޓޭޖުން ޔޫރަޕުން 12 ޓީމެއް ވޯލްޑްކަޕަށް ސީދާ ކޮލިފައި ވެފައިވާއިރު، ބާކީ ހުރި ހަތަރު ޖާގައަށް ޕްލޭއޮފްގައި 16 ޓީމެއް ވާދަކުރާނެ އެވެ. ޕްލޭއޮފް ސެމީ ފައިނަލާއި ފައިނަލުގައި ކޮންމެ ޓީމެއް ވެސް ކުޅޭނީ އެއް ލެގުގެ މެޗުތަކެކެވެ.

ޕްލޭއޮފް ސެމީ ފައިނަލްގެ މެޗުތައް ހަތަރު ގްރޫޕަކަށް ބަހާލާފައިވާއިރު، ގްރޫޕް އޭގައި އިޓަލީ ހިމެނެ އެވެ. އިޓަލީ އާއި ނޮދަން އަޔަލެންޑް ބައްދަލުކުރާ މެޗުން މޮޅުވާ ޓީމަކަށް ފައިނަލުގައި ކުޅެން ޖެހޭނީ ވޭލްސް އާއި ބޮސްނިއާ ބައްދަލުކުރާ މެޗުން މޮޅުވާ ޓީމަކާއި ދެކޮޅަށެވެ. މި ހަތަރު ޓީމުގެ ތެރެއިން ފައިނަލުން މޮޅުވާ ޓީމަކަށް ވޯލްޑްކަޕަށް ދިއުމުގެ ފުރުސަތު ލިބިގެންދާނެ އެވެ.

ގްރޫޕް ބީގައި ހިމެނެނީ ޔުކްރޭން، ސްވިޑަން، ޕޮލޭންޑް އަދި އަލްބޭނިޔާ އެވެ. ޔުކްރޭން އާއި ސްވިޑަން ބައްދަލުކުރާ މެޗުން މޮޅުވާ ޓީމެއް ފައިނަލުގައި ނިކުންނާނީ ޕޮލޭންޑް އާއި އަލްބޭނިޔާ ބައްދަލުކުރާ މެޗުން މޮޅުވާ ޓީމަކާއި ދެކޮޅަށެވެ. ގްރޫޕް ސީގައި ހިމެނެނީ ތުރުކީ، ރުމޭނިއާ، ސްލޮވޭކިޔާ އަދި ކޮސޯވޯ އެވެ. ތުރުކީ އާއި ރުމޭނިއާ ބައްދަލުކުރާ މެޗުން މޮޅުވާ ޓީމެއް ފައިނަލުގައި ކުޅޭނީ ސްލޮވޭކިޔާ އާއި ކޮސޯވޯ ބައްދަލުކުރާ މެޗުން މޮޅުވާ ޓީމަކާއި ދެކޮޅަށެވެ.

ގްރޫޕް ޑީގައި ހިމެނެނީ ޑެންމާކް، ނޯތު މެސެޑޯނިޔާ، ޗެކް ރިޕަބްލިކް އަދި އަޔަރލޭންޑެވެ. ޑެންމާކް އާއި ނޯތު މެސެޑޯނިޔާ ބައްދަލުކުރާ މެޗުން މޮޅުވާ ޓީމެއް ފައިނަލުގައި ނިކުންނާނީ ޗެކް ރިޕަބްލިކް އާއި އަޔަރލޭންޑް ބައްދަލުކުރާ މެޗުން މޮޅުވާ ޓީމަކާއި ދެކޮޅަށެވެ.

ޕްލޭއޮފް ސެމީ ފައިނަލްގެ މެޗުތައް ބާއްވާނީ މާޗު މަހުގެ 26 ވަނަ ދުވަހު އެވެ. އަދި ޕްލޭއޮފް ފައިނަލްގެ މެޗުތައް ބާއްވާނީ މާޗު 31 ވަނަ ދުވަހު އެވެ. މި ދެ ދުވަހުގައި ޔޫރަޕުން ވޯލްޑްކަޕަށް ދާ ފަހު ހަތަރު ޓީމު ކަނޑައަޅާނެ އެވެ.