މެޗަކުން ބަލިނުވެ ނެދަލޭންޑްސް ވޯލްޑްކަޕަށް

މެޗަކުން ބަލިނުވެ އަންނަ އަހަރު އުތުރު އެމެރިކާގައި ބާއްވާ ފީފާ ވޯލްޑްކަޕަށް ނެދަލޭންޑްސް ކޮލިފައިވެއްޖެ އެވެ.

ކޮލިފައިންގެ ފަހު މެޗުގައި ހޯމަ ދުވަހުގެ ރޭ ލިތުއޭނިޔާ އާއި ދެކޮޅަށް ކުޅުނު މެޗު ނެދަލޭންޑްސް ކަމިޔާބުކުރީ 4-0 ގެ ނަތީޖާއަކުންނެވެ.

ޔޫރަޕްގެ ކޮލިފައިންގެ ގްރޫޕް ޖީގައި ކުޅުނު މި މެޗުން ނެދަލޭންޑްސް މޮޅުވުމާއިއެކު އެ ޓީމަށް ވަނީ ގްރޫޕް ސްޓޭޖުގައި ކުޅުނު 8 މެޗުން ޖުމްލަ 20 ޕޮއިންޓާއެކު އެއްވަނަ މަގާމް ލިބިފަ އެވެ. ކޮލިފައިންގެ ދެ މެޗުން ޖަރުމަނު އެއްވަރު ވެފައިވާއިރު ހަ މެޗުން އެޓީމު ވަނީ މޮޅުވެފަ އެވެ.

މި ގްރޫޕްގައި ދެވަނައިގައި އޮތް ޕޮލެންޑަށް 17 ޕޮއިންޓް ލިބިފައިވާއިރު އެ ޓީމަށް ޖެހޭނީ ވޯލްޑްކަޕަށް ކޮލިފައިވުމަށް ޕްލޭއޮފް މެޗުތަކެއް ކުޅުމަށެވެ.

ނެދަލޭންޑްސްގެ ޔޯހަން ކްރައިފް އެރީނާގައި ކުޅުނު މި މެޗުގައި ނެދަލޭންޑްސް އިން ވަނީ ފެށުނީއްސުރެ ވަރުގަދަ ކުޅުމެއް ދައްކާފަ އެވެ. މެޗުގެ 16 ވަނަ މިނިޓުގައި ނެދަލޭންޑްސް އިން ވަނީ ލަނޑު ޖަހާ ކުރި ހޯދާފަ އެވެ. މި ލަނޑު އެ ޓީމަށް ކާމިޔާބު ކޮށްދީފައިވަނީ މެންޗެސްޓަރ ސިޓީގެ މިޑްފީލްޑަރ ތިޖާނީ ރޭންޑާރސް އެވެ.

މެޗުގެ ފުރަތަމަ ހާފު ނިމުނީ ނެދަލޭންޑްސް އަށް 1-0 އިން ކުރީގައި އޮވެގެންނެވެ. މެޗުގެ ދެވަނަ ހާފުގެ ކުޅުން ފެށުނުތާ 13 ވަނަ މިނިޓުގައި ނެދަލޭންޑްސް އަށް ލިބުނު ޕެނަލްޓީއަކުން ކޯޑީ ގެކްޕޯ ވަނީ އިތުރު ލަނޑެއް ޖަހާ ދެ ޓީމުގެ ދެމެދުގައިވާ ފަރަގު ބޮޑުކޮށްފަ އެވެ.

ނެދަލޭންޑްސް އިން މި މެޗުގައި ޖެހި ތިންވަނަ ލަނޑު މެޗުގެ 60 ވަނަ މިނިޓުގައި ޓޮޓްނަމް ހޮޓްސްޕަރގެ ޒަވީ ސައިމަންސް ކާމިޔާބުކޮށްދިންތާ ދެ މިނިޓު ފަހުން ޑޮންޔެލް މަލޭން ވަނީ އިތުރުން ލަނޑެއް ޖަހާ މެޗުގެ ނަތީޖާ 4-0 އަށް ބަދަލުކޮށްފަ އެވެ.

މި ގްރޫޕްގައި ހިމެނޭ ޕޮލެންޑް އިން ވަނީ މޯލްޓާ އާ ދެކޮޅަށް ކުޅުނު މެޗު 3-2 ގެ ނަތީޖާއަކުން ކާމިޔާބުކޮށްފަ އެވެ.

ނެދަލޭންޑްސް އަކީ ފުޓްބޯޅައިގެ ތާރީހުގައި ވަރަށް ވަރުގަދަ ޓީމެކެވެ. އެ ޓީމުން ވަނީ ވޯލްޑްކަޕް ގައި ތިން ފަހަރު ފައިނަލް ކުޅެފަ އެވެ. ނަމަވެސް ވޯލްޑްކަޕް ކާމިޔާބުކުރުމުގެ ފުރުސަތު އަދި އެ ޓީމަށް ނުލިބެ އެވެ. 2026 ވަނަ އަހަރުގެ ވޯލްޑްކަޕަކީ ނެދަލޭންޑްސް އަށް އެ ހުވަފެން ހަގީގަތަކަށް ހެދުމުގެ ފުރުސަތެއް ކަމަށް ބެލެވެ އެވެ.