ރޮނާލްޑޯ ނެތި ޕޯޗުގަލް، 9-1 އިން މޮޅުވެ ވޯލްޑްކަޕަށް ކޮލިފައިވެއްޖެ

ވާރލްޑް ކަޕް 2026 ގެ ކޮލިފިކޭޝަން ގްރޫޕް އެފްގެ ފަހު މެޗުގައި ޕޯޗުގަލް އިން އަރްމީނިއާ އަތުން ތާރީހީ ނަތީޖާއެއް ހޯދައި، އަންނަ އަހަރު އުތުރު އެމެރިކާގައި ބާއްވާ ވާރލްޑް ކަޕުން ޖާގަ ކަށަވަރު ކޮށްފި އެވެ. ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ސަސްޕެންޝަނުގައި ހުރި އިރު، ޕޯޗުގަލް އިން އަރްމީނިއާ ބަލިކުރީ 9-1 ގެ ބޮޑު ތަފާތަކުންނެވެ.

އާދީއްތަ ދުވަހުގެ ރޭ ކުޅުނު މި މެޗަކީ ޕޯޗުގަލް އަށް ވަރަށް މުހިންމު މެޗަކަށް ވީ އިރު، މީގެ ތިން ދުވަސް ކުރިން ޕޯޗުގަލް ވަނީ އަޔަލެންޑް އަތުން 2-0 އިން ބަލިވެފަ އެވެ. އެ މެޗުގައި ރޮނާލްޑޯ އަށް ރަތް ކާޑު ދެއްކުމުން، އަރްމީނިއާ މެޗުގައި އޭނާ ނުކުޅެވުނެވެ. ނަމަވެސް ޓީމުގެ ކެޕްޓަން ނެތި ކުޅުނު މި މެޗުގައި ޕޯޗުގަލް އިން ދެއްކީ ފުރިހަމަ ކުޅުމެކެވެ.

މި މެޗުގައި ޕޯޗުގަލްގެ ލަނޑުތައް ޖެހި ބްރޫނޯ ފެނާންޑޭސް އާއި ޖޮއާއޯ ނެވޭސް، ކޮންމެ ކުޅުންތެރިއަކު ހެޓްރިކެއް ހެދިއެވެ. މީގެ އިތުރުން ރެނާޓޯ ވެއިގާ، ގޮންޒާލޯ ރާމޯސް އަދި ފްރާންސިސްކޯ ކޮންސެސާއޯ ވެސް ލަނޑު ޖަހައިފައިވެ އެވެ. އަރްމީނިއާގެ ހަމައެކަނި ލަނޑު ޖެހީ އެޑުއާޑް ސްޕޭޓްސިޔަން އެވެ.

މި މެޗުގައި ނެވޭސް އާއި ބްރޫނޯ ހެދި ހެޓްރިކްތަކަކީ، ގައުމީ ޓީމަށް އެ ކުޅުންތެރިން ހެދި ފުރަތަމަ ހެޓްރިކެވެ. މި ދެ ކުޅުންތެރިން ވެސް ވަނީ މި މެޗުގައި ވަރަށް ފުރިހަމަ ކުޅުމެއް ދައްކައި، ޕޯޗުގަލް އަށް ވޯލްޑްކަޕަށް ދިއުމުގެ ޖާގަ ހޯދައިދިނުމުގައި މުހިންމު ރޯލެއް އަދާކޮށްފަ އެވެ.

ޕޯޗުގަލް އިން ގްރޫޕް އެފްގެ އެއް ވަނަ ހޯދީ ކުޅުނު ހަ މެޗުން 13 ޕޮއިންޓް ހޯދައިގެންނެވެ. މި ގްރޫޕުން ޕްލޭއޮފްގެ ޖާގަ ހޯދީ އަޔަލެންޑް އެވެ. އަޔަލެންޑް އިން ރޭ ހަންގޭރީ ބަލިކުރީ 3-2 އިން ފޯރިގަދަ މެޗަކުންނެވެ. ހަންގޭރީން އަމިއްލަ ދަނޑުގައި ލީޑުގައި އޮއްވައި، އަޔަލެންޑުން ފަހަތުން އަރައި މޮޅުވީ ފަހު ވަގުތު ދެ ގޯލު ޖަހައިގެންނެވެ.

ޕޯޗުގަލްގެ އިތުރުން ޔޫރަޕުން އަންނަ އަހަރުގެ ވާރލްޑްކަޕަށް ކޮލިފައި ވެފައިވަނީ، އިންގްލެންޑް، ފްރާންސް، ކްރޮއޭޝިއާ އަދި ނޯވޭ އެވެ.