ގަމު ރީޖަނަލް ހޮސްޕިޓަލުން އިންތިޒާމްކޮށްގެން، ޕަބްލިކް ހެލްތާ ގުޅޭ ކޮންފަރެންސެއް ބާއްވަނީ
3 ޑިސެމްބަރު 2022 | ހޮނިހިރު 11:35މިއީ ގަމު ރީޖަނަލް ހޮސްޕިޓަލުން އަމިއްލައަށް އިންތިޒާމްކުރާ ކޮންފަރެންސެއް
ގަމު ރީޖަނަލް ހޮސްޕިޓަލް
ލ. ގަމު ރީޖަނަލް ހޮސްޕިޓަލުން އިންތިޒާމުކޮށްގެން, ޕަބްލިކް ހެލްތު ދާއިރާއާ ގުޅޭ ކޮންފަރެންސެއް ބާއްވަން ނިންމައިފިއެވެ.
ޕަބްލިކް ހެލްތު ދާއިރާގެ ގިނަ ބަޔަކު ބައިވެރިވާގޮތަށް ކުރިއަށްގެންދާ މި ކޮންފަރެންސް އޮންނާނީ 25 ޖެނުއަރީ 2023ން 29 ޖެނުއަރީ 2023އަށެވެ.
ގަމު ރީޖަނަލް ހޮސްޕިޓަލުގެ ޑެޕިއުޓީ ސީއީއޯ މުހައްމަދު ސިޔާމް "ރާއްޖެ އެމްވީ" އަށް ވިދާޅުވީ، މި ކޮންފަރެންސަކީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ސަރުކާރުން ޕަބްލިކް ހެލްތު ދާއިރާއަށް ދޭ އިސްކަން ފާހަގަކޮށް، ސަރުކާރުގެ އަމާޒަށް ވާސިލުވުމަށް އެއްބާރުލުން ދިނުމުގެ ގޮތުން އެ ހޮސްޕިޓަލުން އަމިއްލައަށް އިސްނަގައިގެން ބާއްވާ ކޮންފަރެންސެއް ކަމަށެވެ. މި ކޮންފަރެންސް އަންނަ އަހަރުން ފެށިގެން ކޮންމެ އަހަރަކު އެއްފަހަރު ބާއްވާގޮތަށް ނިންމާފައިވާ ކަމަށްވެސް އޭނާ ވިދާޅުވިއެވެ.
"ހޭހަން"ގެ ނަމުގައި ބާއްވާ މި ކޮންފަރެންސުގައި ލ އަތޮޅުގެ ހުރިހާ ހެލްތު ސެންޓަރުތަކުންނާއި، ކައުންސިލާއި، ރީޖަނަލް ހޮސްޕިޓަލްތަކާއި، ބައެއް އަތޮޅު ހޮސްޕިޓަލްތަކާއި ޕަބްލިކް ހެލްތު ދާއިރާގެ ޕްރައިވެޓް ބައެއް ތަންތަނުންވެސް ބައިވެރިވާނެއެވެ. އެގޮތުން، މި ކޮންފަރެންސްގައި 120-150 އާ ދެމެދުގެ އަދަދަކަށް، ޕަބްލިކް ހެލްތު ދާއިރާގެ ފަރާތްތަކުން ބައިވެރިވާނެކަމަށް އެ ހޮސްޕިޓަލުން ލަފާކުރެއެވެ.
ސިޔާމް ވިދާޅުވިގޮތުގައި، މި ކޮންފަރެންސްގެ މައިގަނޑު މަގުސަދަކީ، ލ އަތޮޅުގައި ގައިންގަޔަށް ނާރާ ބަލި ހުރި މިންވަރު ދެނެގަނެ އެ އަދަދުތައް މަދުކުރުމަށް މަސައްކަތްކުރުމެވެ. ފުރަތަމަ ކޮންފަރެންސްގައި ގަމު ހޮސްޕިޓަލުން ކަރުދާހެއް ހުށަހަޅާއިރު، ކޮންމެ އަހަރަކު އަދަދުތައް ދަށަށްދާވަރު ދެނެގަނެ އެކަމާ ގުޅޭގޮތުން ކޮންފަރެންސްގައި މައުލޫމާތު ހިއްސާކުރާނެއެވެ.
ޕަބްލިކް ހެލްތުގެ ދާއިރާގެ ގިނަ ބަޔަކު އެއްވާ މި ކޮންފަރެންސް ގައުމީ ފެންވަރުގައި ކުރިއަށްގެންދިއުމަށް، ކުރިއަށް އޮތް އަހަރުތަކުގައި އެހެން ހޮސްޕިޓަލުތަކުންވެސް ކަރުދާސްތައް ހުށަހެޅުމަށް ގަމު ރީޖަނަލް ހޮސްޕިޓަލުން އެދެއެވެ.
