ޕެނަލްޓީ ޖަހަން ޖެހިއްޖެނަމަ އަދިވެސް އެއް ނަންބަރު ކުޅުންތެރިޔަކީ ކެޕްޓަން ރޮބާޓް ލެވަންޑޯސްކީ ކަމަށް، ޕޮލޭންޑުގެ ކޯޗު ޗެސްލޯ މިކްނިއޭވިޗް ބުނެފިއެވެ.

މިކްނިއޭވިޗް މިހެން ބުނީ ގްރޫޕް ސްޓޭޖުގެ ދެ ވަނަ މެޗުގައި ސައޫދީ އަރަބިއްޔާއާ ދެކޮޅަށް ނުކުތުމުގެ ކުރިން އޮތް ޕްރެސްގައި ވާހަކަ ދައްކަމުންނެވެ. މުބާރާތުގައި ޕޮލޭންޑުގެ ފުރަތަމަ މެޗުގައި މެކްސިކޯ އަތުން އެއްވަރުވީ ލެވަންޑޯސްކީގެ ޕެނަލްޓީ ނާކާމިޔާބު ވުމުންނެވެ. ލެވަންޑޯސްކީ ފޮނުވާލި ޕެނަލްޓީ މެކްސިކޯގެ ގޯލްކީޕަރު ވަނީ ހުޝިޔާރުކަމާއެކު މަތަކޮށްފައެވެ.

ޕްރެސްގައި ވާހަކަ ދައްކަމުން މިކްނިއޭވިޗް ބުނީ، އެ މެޗަށްފަހު އޭނާ ވަކިވަކިން ކޮންމެ ކުޅުންތެރިޔަކާ ވާހަކަދެއްކިކަމަށެވެ. ކުރިއަށް އޮތް ތަނުގައި ވެސް ޕެނަލްޓީއެއް ލިބިއްޖެ ނަމަ ޖަހާނީ ލެވަންޑޯސްކީ ކަމަށެވެ. ފޯވާޑެއްގެ ހައިސިއްޔަތުން ޕެނަލްޓީ ޖަހާނެތޯ ނޫންތޯ ނިންމާނީ ލެވަންޑޯސްކީ އަމިއްލައަށް ކަމަށްވެސް އޭނާ ބުންޏެވެ. އޭނާ ބުނީ އެހެން ކުޅުންތެރިޔަކަށް ފުރުސަތު ދޭނީތޯވެސް ނިންމާނީ ލެވަންޑޯސްކީ ކަމަށާއި، ނަމަވެސް ލެވަންޑޯސްކީ ފެންނަނީ ލަނޑު ޖެހުމަށް ވަރަށް ތައްޔާރަށް ހުރި މަންޒަރު ކަމަށެވެ.

އޭނާ ބުނީ ސައޫދީ މެޗަކީ ކިހާ މުހިންމު މެޗެއް ކަަމާއި، މުޅި މެޗުގެ މާނަ ވަރަށް ރަނގަޅަށް އެނގޭ ކަމަށެވެ. ޓީމު އޮތީ ހަމަޖެހިގެން ޕްރެޝަރެއް ނެތި ކަމަށެވެ. މީގެ އިތުރުން، މެޗަށް ފޯކަސްކޮށްގެން ތިބިކަން ފާހަގަ ކުރަމުން އޭނާ ބުނީ، ކޯޗިންގ ސްޓާފުންނާއި ކުޅުންތެރިން ވަރަށް ރަނގަޅަށް މެޗު އެނަލިސިސް ހަދާފައިވާނެ ކަމަށެވެ. އޭނާ ބުނީ ކޮންމެ ޓީމަކީވެސް ވަރުގަދަ ޓީމެއްކަން ނަތިޖާއިން ހާމަވާކަމަށެވެ.

އިތުރަށް ވާހަކަ ދައްކަމުން މިކްނިއޭވިޗް ބުނީ، އޭނާ ބްރެޒިލްގެ މެޗު ވަރަށް ރަނގަޅަށް ބެލި ކަމަށެވެ. މެޗުގެ ކުރިން ފޭވަރިޓުންނަކީ ބްރެޒިލް ކަމަށާއި، ނަމަވެސް ސާބިއާ އަތުން މޮޅުވުން ވެގެންދިޔައީ ބްރެޒިލަށް ވަރަށް އުނދަގޫ ކަމެއް ކަމަށެވެ. އޭނާ ބުނީ އެންމެ މުހިންމު ނަތީޖާއާއި، ލިބޭ ނަތީޖާތަކުގެ މައްޗަށް އެމީހުން ވާހަކަ ދައްކާ ކަމަށެވެ. އަދި މޮޅުވާ ބަޔަކަށް ތާރީޚުން ޖާގަ ލިބޭނެ ކަމަށާއި، ޕޮލޭންޑުގެ މަގުސަދަކީ އެ ޖާގަ ހޯދުން ކަމަށެވެ.

ޕޮލޭންޑުން ސައޫދީއާ ދެކޮޅަށް ކުޅޭނީ ހޮނިހިރު ދުވަހު ރާއްޖެ ގަޑިން 18:00ގައެވެ.