ވެރާޓީ ހޯދުމަށް ބަޔާން އިން ކުރާ މަސައްކަތް އަދިވެސް ހުއްޓައެއްނުލާ!

ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ މިޑްފިލްޑަރު މާކޯ ވެރާޓީ ހޯދުމުގެ މަސައްކަތް އަދިވެސް ބަޔާން މިއުނިކުން ހުއްޓާނުލާކަމަށް ރިޕޯޓްތައް ބުނެފި އެވެ.

ބިލްޑް އިން ބުނީ ވެރާޓީ ހޯދުމަށް ބަޔާން އިން އަންނަނީ މަސައްކަތްކުރަމުން ކަމަށާއި، އެގޮތުން ވަރަށް އަވަހަށް އޭނާއަށް އެ ކްލަބުން ބިޑްކުރާނެ ކަމަށެވެ.

ބާސެލޯނާ އަދި ލިޔޯން އިންވެސް ހޯދުމަށް މަސައްކަތްކުރަމުން އަންނަ ވެރާޓީ ހޯދުމަށް ގިނަ ކްލަބްތަކުން އަންނަނީ މަސައްކަތްކުރަމުންނެވެ. އޭގެ ތެރޭގައި ޕްރިމިއާ ލީގުގެ ބައެއް ކްލަބްތައްވެސް ހިމެނެއެވެ.

އެހެންނަމަވެސް ޕީއެސްޖީގެ ކޯޗު ކާލޯ އެންޗޮލޮޓީ ވެރާޓީ ވިއްކާލަން ބޭނުންނުވާކަމަށާއި، ދިގު މުއްދަތެއްގައި ކްލަބުގައި ވެރާޓީ ބަހައްޓަން އެންޗޮލޮޓީ ބޭނުންވާކަމަށް ރިޕޯޓްތައް ބުނެއެވެ.

ޕީއެސްޖީއާ 2012 ވަނަ އަހަރު ގުޅުނު ވެރާޓީ ވަނީ އެ ކްލަބުގައި 2020 ވަނަ އަހަރުގެ ނިޔަލަށް މަޑުކުރަން ނިންމާފައެވެ. އެގޮތުން އެގޮތުން ދާދި ފަހުން ނޫސްވެރިންނާ ބައްދަލުކޮށް ވާހަކަދައްކަމުން ވެރާޓީ ބުނީ މީގެ ހަތަރު އަހަރު ކުރިން އޭނާ ޕީއެސްޖީ އަށް ބަދަލުވީ ދުނިޔޭގެ އެންމެ ޝަރަފުވެރި އެއް މުބާރާތް ކާމިޔާބުކުރުމުގެ އަޒުމުގައި ކަމަށާއި، އަދިވެސް އެ ހުވަފެން ހަގީގަތަކަށް ހަދަން އޭނާ ބޭނުންވާ ކަމަށެވެ.

ވެރާޓީ ވަނީ ޕީއެސްޖީއާއެކު ހޭދަކުރި ފަސް ސީޒަނުގައި 201 މެޗު ކުޅެދީ ހަ ލަނޑު ކާމިޔާބުކޮށްފަ އެވެ. މީގެ އިތުރުން އޭނާ ވަނީ އިޓަލީ ގައުމީ ޓީމަށް ކުޅުނު 21 މެޗުގައި އެއް ލަނޑު ކާމިޔާބުކޮށްފަ އެވެ. ވެރާޓީ ވަނީ ހަތަރު ލީގު ތަށި، ދެ ލީގް ކަޕް، ހަތަރު ފްރެންޗް ސުޕާކަޕް ކާމިޔާބުކޮށްފަ އެވެ. މީގެއިތުރުން އޭނާ ވަނީ ސެރީއާ ބީގެ ޕެސްކާރާއާ އެކުވެސް ގިނަ ކާމިޔާބީތައް ހޯދާފަ އެވެ.