ޔުނައިޓެޑުގެ ދަނޑު ބޭރުގައި ހަރުކޮށްފައި ހުރި ރޮނާލްޑޯގެ ޕޯސްޓަރުތައް ނައްޓާލައިފި

ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ފެންނަ ގޮތަށް ހަރުކޮށްފައިވާ ޕޯސްޓަރުތައް ނައްޓާލައިފިއެވެ.

މި ޕޯސްޓަރުތައް ނައްޓާލާފައިވަނީ ދާދި ފަހުން ރޮނާލްޑޯ ޕިއަސް މޯގަން އަށް ދިން އިންޓަވިޔުއެއްގައި ޔުނައިޓެޑުގެ އިސްވެރިންނާއި، ކޯޗު އެރިކް ޓެން ހާގާއި، ޔުނައިޓެޑަށް ބަހުގެ ހަމަލާތަކެއް ފޮނުވާލާފައިވާ ދަނޑިވަޅެއްގައެވެ.

ޔުނައިޓެޑުގެ ދަނޑު ބޭރުގައި ހުރި ޕޯސްޓަރުގައި ފެންނަނީ ރޮނާލްޑޯގެ އިތުރުން އެ ކުލަބުގެ ހަތް ނަންބަރު ޖާޒީގައި ކުޅެފައިވާ ބައެެއް އެހެން ކުޅުންތެރިންނެވެ. އެ ޕޯސްޓަރަކީ އެ ކުޅުންތެރިންނަށް ޚާއްސަކޮށްގެން ހަރުކޮށްފައިވާ ޕޯސްޓަރެކެވެ.

ބޭރުގެ ބައެއް މީޑިއާތަކުގައި ރިޕޯޓުކޮށްފައިވާ ގޮތުން އެ ޕޯސްޓަރުތައް ނައްޓާލުމުގެ މަސައްކަތްކޮށްފައިވަނީ ބުދަ ދުވަހުގެ ވަގުތެއްގައެވެ. އަދި އެ މަންޒަރު ފެންނަ ފޮޓޯތައް ސޯޝަލް މީޑިއާގައި ވަނީ ދައުރުވާން ފަށާފައެވެ. އެ ޕޯސްޓަރުގައި ވަނީ ރޮނާލްޑޯގެ އިތުރުން ޑޭވިޑް ބެކަމް، ބްރަޔަން ރޮބްސަން އަދި އަންހެން ޓީމުގެ އެލާ ޓޫންއެވެ. އެ ވާހަކަ ގެނެސްދީ ސްކައި ސްޕޯޓްސް ނިއުސް އިން ކޮށްފައިވާ ޓުވީޓެއް ޕިއަސް މޯގަން އިން ވަނީ ރީޓުވީޓުކޮށް "ސޯ ޕްރިޓީ" ޖަހާފައެވެ.

ބޭރުގެ ބައެއް މީޑިއާތަކުގައި ރިޕޯޓުކޮށްފައިވާ ގޮތުން އެ ޕޯސްޓަރުތައް ނައްޓާލީ އެ ތަނުގައި ރަގްބީ ލީގު ވޯލްޑް ކަޕްގެ ޕޯސްޓަރުތައް ހަރުކުރުމަށެވެ. ރަގްބީ ލީގު ވޯލްޑް ކަޕްގެ އަންހެން އަދި ފިރިހެން ފައިނަލް ކުޅުމަށް ހަމަޖެހިފައިވަނީ އަންނަ ހޮނިހިރު ދުވަހު ޔުނައިޓެޑުގެ ދަނޑުގައެވެ. މީޑިއާތަކުގައި ރިޕޯޓުކޮށްފައިވާ ގޮތުން އެއީ އެ މުބާރާތް އޮންނަ ކޮންމެ ފަހަރަކު ވެސް ކަންތައް ކުރަމުން އަންނަ ގޮތް ކަމަށެވެ.

ރޮނާލްޑޯގެ އިންޓަވިޔުގެ ސަބަބުން ޔުނައިޓެޑުން ވަނީ ބަޔާނެއް ވެސް ނެރިފައެވެ.