ބިލިއާޑް އެސޯސިއޭޝަނުން ބާއްވާ ގައުމީ ބިލިއާޑް މުބާރާތުގެ މިއަހަރުގެ މިކްސް ޑަބަލްސް އިވެންޓުގެ ޗެމްޕިއަންކަން އަލީ ފަޔާޒްއާއި ދީނާ އަހުމަދު ހޯދައިފިއެވެ.

ގައުމީ ބިލިއާޑް ސެންޓަރުގައި ހުކުރު ދުވަހުގެ ރޭ ކުރިއަށްދިޔަ މިކްސް ޑަބަލްސް އިވެންޓުގެ ޗެމްޕިއަންކަން ފަޔާޒްއާއި ދީނާ ހޯދީ ފައިނަލްގައި ހުސައިން ފަޔާޒްއާއި އާމިނަތު ފާތީގެ ޕެއަރއާ ވާދަކޮށެވެ. ފައިނަލް މެޗު ފަޔާޒް އަދި ދީނާގެ ޕެއަރއިން ކާމިޔާބުކުރީ 7-6ންނެވެ. ފައިނަލްގެ ކުރިންވެސް މި ދެ ޕެއަރ ވަނީ މުބާރާތުގައި ބައްދަލުކޮށްފައެވެ. އެއީ ސެމީ ފައިނަލް މެޗުގައެވެ. ސެމީގައި ފަޔާޒްއާއި ދީނާގެ ޕެއަރ މޮޅުވީ 5-4ންނެވެ.

ހުސައިން ފަޔާޒްއާއި ފާތީގެ ޕެއަރއިން ފައިނަލްގެ ޖާގައެއް ހޯދީ ދެ ވަނަ ސެމީގައި ހަސަން ޝާޒް މުހައްމަދުއާއި އާމިނަތު އަޒްރާގެ މައްޗަށް 5-4ން ކުރިހޯދައިގެންނެވެ.

މިއަހަރުގެ މުބާރާތުގެ ސިންގަލްސް އިވެންޓުތަކާއި، ޑަބަލްސް އަދި މިކްސް ޑަބަލަސް ވަނީ ނިމިފައެވެ. މުބާރާތުގައި ދެން ކުރިއަށްދާނީ ރައީސުލްޖުމްހޫރިއްޔާގެ ވާދައިގެ ތައްޓަށް ކުޅޭ ޓީމު އިވެންޓެވެ. މި އިވެންޓުގެ މެޗުތައް ކުރިއަށްދާނީ ހޮނިހިރު ދުވަހުއެވެ. މި އިވެންޓުގައި ޖުމުލަ ފަސް ޓީމަކުން ވާދަކުރެއެވެ. އެއީ އެންމެ ފަހުގެ ޗެމްޕިއަން ކުލަބް އީގަލްސްއާއި ކަސްޓަމްސް ރެކްރިއޭޝަން ކުލަބާއި، އައިލެންޑަރސް ހޯޕް ސްޕޯޓްސް ކުލަބާއި، މާޒިޔާ ސްޕޯޓްސް އަދި ދިވެހި ސިފައިންގެ ކުލަބެވެ.

މުބާރާތް ކުރިއަށްދާނީ މި މަހުގެ 18 ވަނަ ދުވަހުގެ ނިޔަލަށެވެ.