ޑިސެބިލިޓީ ސެކްޓަރު ކުރިއަރުވަން މި ވަރަށް މަސައްކަތް ކުރި ސަރުކާރެއް ނުދެކެން: އިފްހާމް
މި ސަރުކާރުން ދެމުން އަންނަ ޚިދުމަތްތަކުގެ ތެރޭގައި ތެރަޕީގެ ޚިދުމަތްތަކާއި ކޮމިއުނިޓީ ބޭސްޑް ރިހެބިލިޓޭޝަން ޕްރޮގްރާމްތައް ހިންގުން ހިމެނޭ
ޖެންޑަރ މިނިސްޓްރީގެ ސްޓޭޓް މިނިސްޓަރު އިފްހާމް ހުސައިން
ޑިސެބިލިޓީ ސެކްޓަރު ނުވަތަ ނުކުޅެދުންތެރިކަން ހުންނަ ފަރާތްތަކަށް ހިދުމަތް ދިނުމުގައި މި ސަރުކާރުން ކުރަމުން އަންނަ ވަރަށް މަސައްކަތް ކުރި ސަރުކާރެއް މިހާތަނަށް ފެނިވަޑައިނުގަންނަވާ ކަމަށް ޖެންޑަރ މިނިސްޓްރީގެ ސްޓޭޓް މިނިސްޓަރު އިފްހާމް ހުސައިން ވިދާޅުވެއްޖެއެވެ.
"ރާއްޖެ ޓީވީ" ގެ ފަލަސުރުޚީ ޕްރޮގްރާމުގައި އިފްހާމް ވިދާޅުވީ އޭނާ މި ދާއިރާގައި މަސައްކަތް ކުރައްވާތާ ވަރަށް ގިނަ ދުވަސްވެފައިވާ ކަމަށާއި އެއްވެސް ސަރުކާރަކުން ޑިސެބިލިޓީ ސެކްޓަރު ކުރިއަރުވަން މަސައްކަތް ނުކުރާވަރަށް މިއަދުގެ ސަރުކާރުން މަސައްކަތް ކުރަމުން އަންނަ ކަމަށެވެ. އަދި މި ސަރުކާރު އައި ފަހުން ދާއިރާ އަށް ބޮޑެތި ބަދަލުތަކެއް އައިސްފައިވާ ކަމަށް ވެސް އޭނާ ވިދާޅުވިއެވެ.
ކުރީ ސަރުކާރުތަކުން ނުކުޅެދުންތެރިކަން ހުންނަ ފަރާތްތަކާ މެދު ކަންކަން ކުރަމުން އައި ގޮތް ކިޔައިދެއްވަމުން އިފްހާމް ވިދާޅުވީ އިންތިޚާބުތަކާ ދިމާކޮށް އެކި ގެތަކަށް ދާން ދައުވަތު ދޭ ކަމަށެވެ. ނަމަވެސް މި ސަރުކާރުން މަސައްކަތް ކުރަނީ އެގޮތަށް ނޫން ކަމަށާއި ކުރިން ނުލިބޭ އެތައް ޚިދުމަތެއް ލިބެމުންދާކަމަށް އޭނާ ވިދާޅުވިއެވެ.
މި ސަރުކާރުން ނުކުޅެދުންތެރިކަން ހުންނަ ފަރާތްތަކަށް ދެމުން އަންނަ ޚިދުމަތްތަކުގެ ތެރޭގައި ތެރަޕީގެ ޚިދުމަތްތަކާއި ކޮމިއުނިޓީ ބޭސްޑް ރިހެބިލިޓޭޝަން ޕްރޮގްރާމްތައް ހިންގުން ހިމެނެއެވެ. މި ޕްރޮގްރާމުގައި ޖެންޑަރ މިނިސްޓްރީއާ އެކު މަސައްކަތް ކުރާ ސްޓޭކްހޯލްޑަރުން ތަމްރީންކޮށް، އެ ފަރާތްތައް މެދުވެރިކޮށް، ރަށްރަށުގައި ތިބޭ ނުކުޅެދުންތެރިކަން ހުންނަ ފަރާތްތަކުގެ މައުލޫމާތު ހިއްސާ ކުރާނެއެވެ. މީގެ ސަަބަބުން އެފަދަ ފަރާތްތަކުގެ ދިރިއުޅުން އިތުރަށް ފަސޭހަ ކުރެވެން އޮންނަ ގޮތްތައް ހޯދައިދިނުމަށް އިތުރަށް ފަސޭހަވެގެންދާނެ ކަމަށް އިފްހާމް ވިދާޅުވިއެވެ.
އިފްހާމް ވިދާޅުވި ގޮތުގައި ކޮމިއުނިޓީ ބޭސްޑް ރިހެބިލިޓޭޝަން ޕްރޮގްރާމުގެ ތެރެއިން މިހާތަނަށް ހަތަރު އަތޮޅެއްގައި 205 ފަރާތެއް ވަނީ ތަމްރީނުކޮށްފައެވެ.
ނުކުޅެދުންތެރިކަން ހުންނަ މީހުންގެ އިތުރުން އުމުރުން ދުވަސްވީ މީހުންނަށް ވެސް މި ސަރުކާރުން ގިނަ ކަންކަން ކޮށްދެމުން އަންނަ ކަން އިފްހާމް ފާހަގަކުރެއްވިއެވެ. އެގޮތުން، އެ ފަރާތްތަކުގެ ދަފްތަރެއް ހަދައި އެ ފަރާތްތަކުގެ ހާލު ބަލަމުންގެންދާ ކަމަށާއި އެހީތެރިކަން ފޯރުކޮށްދޭން ޖެހޭނަމަ އެ އެހީތެރިކަން ވެސް ފޯރުކޮށްދެމުން އަންނަ ކަން އޭނާ ފާހަގަކުރެއްވިއެވެ.
