އއ އަތޮޅު ރަށެއްގެ ސްކޫލެއްގައި ހަނގާ ކުރުމުގެ ސިއްސައިގެން ދާވަރުގެ ބޮޑު މައްސަލައެއް، ޒިންމާ ނަގާނީ ކާކު؟

ޖުލައި މަހުގެ 11 ވަނަ ދުވަހު އއ އަތޮޅު ރަށެއްގެ ސްކޫލުގެ ގްރޭޑް 6،7،8 އަދި 9 ގެ ފިރިހެން ދަރިވަރުން ވަނީ ސްކައުޓް ކޭމްޕަކަށް ގޮސްފައެވެ. ގިނަ އަދަދެއްގެ ދަރިވަރުންނާއެކު ކޭމްޕް ނިންމާލުމަށްފަހު އެނބުރި ރަށަށް އައީ ޖުލައި 13 ވަނަ ދުވަހުއެވެ.

މި ކޭމްޕުގެ ތޭރޭގައި އެރަށު ދަރިވަރުންތަކެއް ވަނީ އެހެން ދަރިވަރުންތަކަކަށް އިންތިހާއަށް ހަނގާކޮށް، ހަނގާ ކުރުމުގެ ތެރެއިން ޖިންސީ ގޯނާވެސް ކޮށްފައެވެ.

އެކަމުގެ މައުލޫމާތު އެނގޭ މީހަކު ވަނީ އެ ޙާދިސާގައި އަނިޔާ ލިބުނު ދަރިވަރުންތަކެއްގެ ތަޖުރިބާ ރާއްޖެއެމްވީއަށް ކިޔާދީފައެވެ. އެގޮތުން އެކަން ހިނގާފައިވަނީ ދަރިވަރުން ކޭމްޕުގައި ނިދާފައި ތިއްބައެވެ.

ދަރިވަރުން ނިދާފައި ތިބީ ގްރޫޕުތަކަކަށް ބަހާލައިގެން އެކި ކޭމްޕުތަކުގައެވެ. އެގޮތުން ނިދާފައި ތިއްބައި ހަމަ ކޭމްޕުގައި ބައިވެރިވި ދަރިވަރުންތަކެއް ވަނީ އެހެން ދަރިވަރުންތަކެއް ތިބި ޓެންޓަކަށް ވަދެ އެކުދިންނަށް ހަނގާކޮށްފައެވެ.

އެކަމުގައި ބައިވެރިވި ކުދިން ވަނީ އަނިޔާ ލިބުނު ކުދިން ޓެންޓުގައި ނިދާފައި ތިއްބައި ގޮވާ ހޭލައްވައިގެން، އެކި ކަހަލަ މަލާމާތާއި ފުރައްސާރަ ކޮށްފައެވެ.

އަދި އެކުދިންގެ ސޯޓު ގަދަކަމުން ބާލައި، ބޭއަދަބީ ބަސްތައް ބޭނުންކޮށްގެން ހަނގާކޮށް، އެކުދިންނަށް ޖިސްމާނީ އަނިޔާވެސް ކޮށްފައިވެއެވެ.

އަދި އެކުދިންގެ މުޅި ގައިގައި ތެޔޮ އުނގުޅައި، އެތައް ގޮތަކުން އެ ކުދިންނަށް ޖެއްސުމާއި އަނިޔާ ކޮށްފައިވެއެވެ. އޭގެ ތެރެއިން ބައެއް ކުދިން މިހާރު ތިބީ ނަފްސާނީ ބޮޑު ބިރުވެރިކަމެއްގެ ތެރޭގައެވެ.

އެހެންނަމަވެސް މި ހުރިހާ ކަމެއް ހިނގާ ދިޔައިރުވެސް ޓީޗަރަކަށްވެސް އަދި އެހެން މީހަކަށްވެސް އެކަން ރޭކާނުލާތީ ރާއްޖެއެމްވީއާ ވާހަކަ ދެއްކި ބައެއް ބެލެނިވެރިންވެސް ވަނީ އެކަމުގެ ކަންބޮޑުވުން ފާޅުކޮށްފައެވެ.

ރާއްޖެއެމްވީއަށް އެނގިފައިވާ ގޮތުގައި ކޭމްޕު ނިންމައި އެނބުރި ރަށަށް ދިޔައިރުވެސް މިފަދަ ބޮޑު ކަމެއް ހިނގާ ދިޔަކަމެއް އެއްވެސް ބަޔަކަށް ނޭނގެއެވެ. ނަމަވެސް އޭގެ ތެރެއިން އަނިޔާވި ބައެއް ދަރިވަރުންގެ އުޅުމަށް އައި ބަދަލުތަކާއި، ދޭދޭ މީހުންގެ ތެރޭގައި ދެކެވުނު ވާހަކަތަކާއެކު އެންމެ ފަހުން މި މައްސަލަ މި ވަނީ ފެންމަތިވެފައެވެ.

އަނިޔާ ލިބުނު ބައެއް ކުދިންގެ ޖިންސީ ގުނަވަން ދުޅަވެ، ނަފްސާނީ ގޮތުން ބޮޑު ބިރުވެރިކަމަކާ ކުރިމަތިލަމުންދާކަމަށްވެސް އެކަމުގެ މައުލޫމާތު އެނގޭ ފަރާތަކުން ރާއްޖެއެމްވީއަށް ކިޔާދިނެވެ. އެގޮތުން އެފަދަ ކަމެއް ހިނގިކަން ބައެއްގެ ކައިރީގައި ކިޔާދީފިނަމަ، އަނިޔާކުރާނެ ކަމުގެ އިންޒާރުވެސް ވަނީ ދީފައެވެ.

 އަނިޔާ ލިބުނު ކުދިންގެ ތެރޭގައި ގްރޭޑް 7 ގައި ކިޔަވަމުންދާ ދަރިވަރުންވެސް ހިމެނެއެވެ.

މިހާރު މި މައްސަލަ ފެންމަތިވުމުން ޖެންޑަރ މިނިސްޓްރީއާއި ސްކޫލުގެ ސަމާލުކަމަށްވެސް ވަނީ އެކަން އައިސްފައެވެ. މައުލޫމާތު ލިބޭ ގޮތުގައި މިކަމާ ގުޅިގެން މިހާރު އެކި މީހުންގެ ބަޔާން ނެގުމަށްވެސް ދަނީ ތައްޔާރުވަމުންނެވެ.

އަދި އެކަމުގައި އެރަށު ޓީޗަރުންގެ ދަރިންވެސް ބައިވެރިވެފައިވާތީ އެ ކުދިންގެ ނަންތައް ފޮރުވުމަށް މަސައްކަތް ކުރަމުންދާކަމަށް ބައެއް ބެލެނިވެރިން ކިޔާދިނެވެ.

މިކަމުގައި ބެލެނިވެރިން ބޭނުންވަނީ އިންސާފެވެ. ފޮރުވުމެއް ނެތި އެކަމުގައި ބައިވެރިވި ކުދިންގެ މައްސަލަ ބަލައި އަޅަންޖެހޭ ފިޔަވަޅުތައް އެޅުމެވެ. އަދި، ވަކި މީހެއްގެ ދަރިއަކަށްވީތީ ކަންކަން ނުފޮރުވައި، އިންސާފުން މި މައްސަލަ ބެލުމަކީ ބެލެނިވެރިން އެދޭ އެދުމެކެވެ.