ބުދަ ދުވަހުގެ ރޭގެ ވަގުތެއްގައި ހުޅުމާލެ ފޭސް 2ގައި ހުންނަ ހިޔާ ފްލެޓުގެ ބެލްކަންޏެއްގައި ކުޑަކުއްޖަކު އެކަހެރިކޮށް ތަޅުލާފައި ބެހެއްޓި މައްސަލައިގައި, ޖެންޑަރ މިނިސްޓްރީން ވަގުތުން މާހައުލަށް ޒިޔާރަތްކޮށް ކުއްޖާގެ ރައްކާތެރިކަން ކަށަވަރުކޮށް ފިޔަވަޅު އެޅި ކަމަށް ބުނެފިއެވެ.

އެ މިނިސްޓްރީން ބުނީ ކުޑަކުއްޖަކު ހިޔާ ފްލެޓެއްގެ ބެލްކަނީގައި އެކަނި ބަހައްޓާފައިވާ ވީޑިއޯއެއް ސޯޝަލް މީޑިއާގައި ދައުރުވަމުންދިއުމާ ގުޅިގެން، ކަމާގުޅޭ އިދާރާތަކާއެކު މިނިސްޓްރީގެ ޗައިލްޑް އެންޑް ފެމެލީ ޕްރޮޓެކްޝަން ސަރވިސްގެ އިޖްތިމާއީ ޚިދުމަތްތެރިން ވަގުތުން އެ މާހައުލަށް ޒިޔާރަތްކޮށް ކުއްޖާގެ ރައްކާތެރިކަން ކަށަވަރުކުރުމަށް އަޅަންޖެހޭ ފިޔަވަޅުތައް އަޅާފައި ވާކަމަށެވެ.  

އަދި މިކަމާގުޅިގެން ކުއްޖާ އަދި ކުއްޖާގެ އާއިލާއަށް ފޯރުކޮށްދޭންޖެހޭ ނަފްސާނީ އަދި އިޖްތިމާއީ އެހީތެރިކަން ފޯރުކޮށްދިނުމުގެ އިތުރުން، މައްސަލައާ ގުޅިގެން ކުރަންޖެހޭ އިތުރު މަސައްކަތްތައް ކުރަމުން ދާކަމަށްވެސް ބުނެފައި ވެއެވެ.