ސިޔާސީ ނިންމުންތަކަށް އެއްބަސްނުވާ ސިވިލް މުވައްޒަފުންނަށް އުދަނގޫތައް ކުރިމަތިކުރުވާ: ސޮބްރީ

މިސަރުކާރުގައި ސިޔާސީ ނިންމުންތަކަށް އެއްބަސްނުވާ ސިވިލް މުވައްޒަފުންނަށް އުދަނގޫތައް ކުރިމަތިކުރުވާ ކަމަށާއި، މިނިސްޓްރީ އޮފް ސޯޝަލް އެންޑް ޑިވެލޮޕްމަންޓްގައި ވެސް އޮތީ އެފަދަ ސަގާފަތެއް ކަމަށް ނޭޝަނަލް ޑްރަގް އެޖެންސީ (އެންޑީއޭ)ގެ ކުރީގެ ސީނިއާ އެގްޒެކިއުޓިވް ޑިރެކްޓަރު އަދި އެމްޑީޕީގެ މަސްތުވާތަކެއްޗާއި ދެކޮޅަށް މަސައްކަތް ކުރާ ކޮމިޓީގެ މުގައްރިރު މުހައްމަދު ސޮބްރީ (ސަބާ) ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި ސޮބްރީ މިހެން ވިދާޅުވީ ސޯޝަލް މިނިސްޓްރީ (ކުރީގެ ޖެންޑާ މިނިސްޓްރީ) ގައި 17 އަހަރު ދުވަހު ޚިދުމަތް ކުރި ސޯޝަލް ސަރވިސް ކޯޑިނޭޓަރު އައިޝަތު ޝޫޒާ މަސައްކަތްތަކުން އެކަހެރިކޮށް، އޭނާއަށް ދީފައިވަނީ އަނިޔާތަކާއި ގުޅިގެންނެވެ.

ސޮބްރީ ވިދާޅުވީ ސޯޝަލް މިނިސްޓްރީގައި އެއްވެސް ކަހަލަ ރަނގަޅު ސިޔާސަތެއް ޕްލޭނެއް ނެތް ކަމަށާއި، ކަންކަން ތަންފީޒު ކުރުމުގައި އުސޫލާ އެއްގޮތަށް އަމަލުކުރާ ގާބިލް ސިވިލް މުވައްޒަފުންނަށް އުދަނގޫތައް ކުރިމަތިކުރުވަމުންދާ ކަމަށެވެ. އެއްވެސް ސަރުކާރެއްގައި ފަންނީ މަސައްކަތް ކުރާ ސިވިލް މުވައްޒަފުންނަށް ސިޔާސީ މުވައްޒަފުން ގޮތް ނުކިޔާކަން ފާހަގަކުރައްވައި ސޮބްރީ ވިދާޅުވީ މިސަރުކާރުގައި އެގޮތަށް ވެސް ބެލުމެއް ނެތް ކަމަށެވެ. އަދި ފަންނީ ނިންމުންތަކަށް ސިޔާސީ ގޮތް ކިޔަން ނުޖެހޭ ކަމަށް ސޮބްރީ ވިދާޅުވިއެވެ.

ސޮބްރީ ވިދާޅުވީ މި ސަރުކާރުގެ ސިޔާސީ ބޭފުޅުން މަސައްކަތް ކުރަނީ ޒިންމާ އެކަހެރި ކުރުމަށްފަހު ޕާޓީ ޕްރޮމޯޓްކޮށް، ސަރުކާރުގެ އެކްޝަން ދިފާއު ކުރުމަށް ކަމަށާއި، އެގޮތަށް ޓެކްނިކަލް މުވައްޒަފުން މަސައްކަތް ނުކުރާނެ ކަމަށެވެ.

ސޮބްރީ ވިދާޅުވީ ސޯޝަލް މިނިސްޓްރީއަކީ މުޅި މުޖުތަމައުއާ ގުޅިފައިވާ މިނިސްޓްރީއެއް ކަމަށާއި، ނަމަވެސް އެ މިނިސްޓްރީގައި މަސައްކަތް ކުރަމުންދާ ގިނަ މުވައްޒަފުން އެހެން ދިމަދިމާލަށް ފޮނުވަމުންދާ ކަމަށެވެ. އަދި ޒިންމާތަކުން އެކަހެރި ކުރަމުންދާ ކަމަށާއި، މިއީ ކަންބޮޑުވާ މައްސަލައެއް ކަމަށް އޭނާ ވިދާޅުވިއެވެ.

ސޯޝަލް މިނިސްޓްރީގައި މަސައްކަތް ކުރަމުންދިޔަ ޝޫޒާ، ހެލްތް މިނިސްޓްރީ ނޭޝަނަލް މެންޓަލް ހެލްތް ޑިޕާޓްމަންޓަށް ބަދަލުކުރުމާއި ގުޅިގެން 3 އޮކްޓޫބަރު 2024 ވީ ބުރާސްފަތި ދުވަހު ބޭއްވި ފެއަރވަލްގައި އޭނާ ބުނެފައިވަނީ މިނިސްޓްރީން ކުރިމަތިވެފައިވަނީ ކެއްނުކުރެވޭ ވަރުގެ ނަފްސާނީ އަނިޔާ ކަމަށެވެ. އަންހެނުންނާއި ކުޑަކުދިންނާއި އުމުރުން ދުވަސްވީ މީހުންނާއި ނުކުޅެދުންތެރިކަން ހުންނަ މީހުންނާއި ނިކަމެތިންގެ ހައްގުތައް ހޯދައިދޭން އައި މިނިސްޓްރީން އަންހެނެއްގެ ހައްގު ނިގުޅައިގަނެފައިވާ ކަމަށް ޝޫޒާ ބުނެފައިވެއެވެ. ނަމަވެސް އެމިނިސްޓްރީން ވަނީ މިކަންކަން ދޮގުކޮށްފައެވެ.