މިދިޔަ މަހު ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 80ށް ވުރެ ގިނަ މައްސަލަ ރިޕޯޓުކޮށްފައިވޭ
ކުޑަކުދިންނަށް އިހުމާލުވުމުގެ 26 މައްސަލައެއް ރިޕޯޓުކޮށްފައިވޭ
ޖުމްހޫރީ މައިދާނުގައި ކުޑަކުދިން ބެެލެނެވެރިންނާއި އެކު ކޮތަރު ބަލަން އައިސް އުފާވެރި ވަގުތުކޮޅެއް ހޭދަކޮށްލަނީ
މިދިޔަ މަހު ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 80ށް ވުރެ ގިނަ މައްސަލަ ރިޕޯޓުކޮށްފައިވާ ކަމަށް އިޖުތިމާއީ އަދި އާއިލީ ތަރައްގީއާ ބެހޭ ވުޒާރާއިން ބުނެފިއެވެ.
އާދިއްތަ ދުވަހު އެވުޒާރާއިން ނެރުނު ތަފާސްހިސާބުތައް ދައްކާ ގޮތުގައި، 2025 ވަނަ އަހަރުގެ އޮގަސްޓު މަހު ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 84 މައްސަލައެއް ރިޕޯޓުކޮށްފައިވެއެވެ.
އިޖުތިމާއީ އަދި އާއިލީ ތަރައްގީއާ ބެހޭ ވުޒާރާއިން ބުނީ، މި ބާވަތުގެ މައްސަލަތަކުގެ ތެރެއިން އެންމެ ގިނައިން ރިޕޯޓުކޮށްފައިވަނީ އިހުމާލުވުމުގެ މައްސަލަ ކަމަށެވެ. އެގޮތުން މި ބާވަތުގެ 26 މައްސަލައެއް ރިޕޯޓުކޮށްފައިވާ ކަމަށާއި، އޭގެ ތެރޭގައި ހިމެނެނީ ފިރިހެން ކުދިންނާއި ގުޅޭ 11 މައްސަލައަކާއި އަންހެން ކުދިންނާއި ގުޅޭ 15 މައްސަލައެއް ކަމަށް އެ ވުޒާރާއިން ބުނެއެވެ.
ދެވަނައަށް އެންމެ ގިނައިން ރިޕޯޓުކޮށްފައިވާ މައްސަލައަކީ ގެވެށި އަނިޔާގެ އަމަލެއް ކުރާތަން ކުއްޖަކަށް ދެއްކުން ނުވަތަ ފެނުމުގެ މައްސަލައެވެ. އެގޮތުން، މި ބާވަތުވެ 14 މައްސަލައެއް މިދިޔަ މަހު ރިޕޯޓުކޮށްފައިވާއިރު، އޭގެ ތެރޭގައި ހިމެނެނީ ފިރިހެން ކުދިންނާއި ގުޅޭ 09 މައްސަލައަކާއި އަންހެން ކުދިންނާއި ގުޅޭ 05 މައްސަލައެކެވެ.
މީގެ ތެރޭގައި ޖިންސީ ހާނިއްކައިގެ 13 މައްސަލަ، ނަފްސާނީ ހާނިއްކައިގެ 09 މައްސަލަ، ޖިސްމާނީ ހާނިއްކައިގެ 08 މައްސަލަ، އެހެން ކުދިންގެ ފަރާތުން ގަނާ ލިބުމުގެ 05 މައްސަލަ، ބިރުދެއްކުމުގެ ގޮތުން ކުރެވޭ ކަންކަން - ބްލެކްމެއިލް ކުރުމުގެ 04 މައްސަލަ، ފުރައްސާރައިގެ ޝިކާރައަކަށްވުމުގެ 02 މައްސަލަ، އެހެން ކުދިންގެ ފަރާތުން އިންޓަރނެޓް މެދުވެރިކޮށް ގަނާ ލިބުމުގެ 01 މައްސަލަ، ކުދިން ދޫކޮށްލާފައި ދިޔުމުގެ 01 މައްސަލަ އަދި ކުދިން ނަހަމަ ގޮތުގައި ބޭނުންކުރުމުގެ 01 މައްސަލަ ހިމެނޭ ކަމަށް އެވުޒާރާއިން ބުނެއެވެ.
ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ މައްސަލަތަކާއި ގުޅިގެން މިދިޔަ މަހު އެންމެ ގިނައިން ރިޕޯޓުކޮށްފައިވަނީ އަންހެން ކުދިންނާއި ގުޅުންހުރި މައްސަލަތައްކަން ފާހަގަކޮށް އިޖުތިމާއީ އަދި އާއިލީ ތަރައްގީއާ ބެހޭ ވުޒާރާއިން ބުނީ، އޭގެތެރޭގައި ހިމެނެނީ، އަންހެން ކުދިންގެ 44 މައްސަލައަކާއި ފިރިހެން ކުދިންގެ 40 މައްސަލައެއް ކަމަށެވެ.
މީގެ އިތުރުން މިދިޔަމަހު ކުޑަކުދިންގެ އަހުލާގީ މައްސަލަތަކާ ގުޅޭ 17 މައްސަލައެއް، ކުޑަކުދިންގެ ހައްގުތަކާ ގުޅުންހުރި 04 މައްސަލައެއް، އާއިލީ މައްސަލަތަކާ ގުޅޭ 22 މައްސަލައެއް، ވަކި ޖިންސަކަށް ވީތީ ކުރާ އަނިޔާ އަދި ގެވެށި އަނިޔާގެ ޖުމްލަ 45 މައްސަލައެއް، ނުކުޅެދުންތެރިކަން ހުންނަ ފަރާތްތަކާއި އުމުރުން ދުވަސްވީ މީހުނަށް އަޅައިލުމާއި އެހީތެރިވުމާއި ގުޅޭ 08 މައްސަލައެއް، އިޖުތިމާއީ އެހީތެރިކަން ފޯރުކޮށްދިނުމާއި ދުޅަހެޔޮކަން ކަށަވަރުކުރުމާ ގުޅޭ 04 މައްސަލައެއް އަދި ހެލްޕްލައިންއަށް ޖުމްލަ 2592 ކޯލު ލިބިފައިވާ ކަމަށް އިޖުތިމާއީ އަދި އާއިލީ ތަރައްގީއާ ބެހޭ ވުޒާރާއިން ބުނެއެވެ.
ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ ގިނަ މައްސަލަތަކެއް ކޮންމެ މަހަކު ވެސް އެވުޒާރާއަށް ހުށަހެޅި ނަމަވެސް އެކަށީގެންވާ ގޮތުގައި މައްސަލަތައް ބަލައި، އެ ރައްކާތެރިކަން ކަށަވަރު ކޮށްނުދެވޭ ކަމަށް ގިނަ އާއްމު ރައްޔިތުން ދަނީ ބުނަމުންނެވެ. މިފަހުން ޓިކްޓޮކްގައި ދިވެހި ކުޑަ ކުއްޖަކު ވިއްކުމަށް ގޮވާލި މައްސަލާގައި އެ ކުއްޖާގެ މަންމަ ތަކުރާރުކޮށް އެކަމުގެ ކަންބޮޑުވުންފާޅު ކުރިނަމަވެސް އެވުޒާރާގެ އެއްބާރުލުން ނުލިބޭ ކަމަށް އެއާއިލާއިން ބުނެފައިވެއެވެ.
