ޕީކޭގެ ބަދަލުގަ ބާސެލޯނާ އިން އެހެން ކުޅުންތެރިޔަކު ހޯދާނެ

ޖެރާޑް ޕީކޭގެ ބަދަލުގަ ބާސެލޯނާ އިން އެހެން ކުޅުންތެރިޔަކު ހޯދާނެ ކަމަށް އެ ކުލަބުގެ ކޯޗު ޒަވީ ހެނާންޑޭޒް ބުނެފިއެވެ.

އުމުރުން 35 އަހަރުގެ ޑިފެންޑަރު ވަނީ އޭނާ ފުޓުބޯޅަ ކުޅުމުން ރިޓަޔާ ކުރަން ނިންމާފައިވާ ކަން ހާމަކޮށްފައެވެ. ބާސެލޯނާގައި ޕީކޭގެ ފަހު މެޗަކަށް ވާނީ ހޮނިހިރު ދުވަހުގެ ރޭ ސްޕެނިޝް ލީގުގައި އެ ޓީމު ކުޅޭ މެޗެވެ. ޕީކޭ ވަނީ ބާސެލޯނާއާއެކު މިހާރު ހަދާފައިވާ އެއްބަސްވުން ޓާމިނޭޓު ކުރުމަށް ވެސް ނިންމާފައެވެ.

ބާސެލޯނާގެ ކޯޗު ޒަވީ ބުނީ ޕީކޭ ކުޅުން ހުއްޓާލަށް ނިންމުމާއެކު، ބާސެލޯނާ އިން އެހެން ޑިފެންޑަރަކު ހޯދާނެ ކަމަށެވެ. އަދި އެކަމަށް އަންނަ ޖެނުއަރީ ޓްރާންސްފާގައި މަސައްކަތް ކުރާނެ ކަމަށް ވެސް ޒަވީ ބުންޏެވެ. އޭނާ ބުނީ ޖެނުއަރީ ޓްރާންސްފާގައި ބާސެލޯނާ އިން އެންމެ އިސްކަމެއް ދޭނީ އެކަމަށް ކަމަށެވެ. ކުޅުން ހުއްޓާލުމަށް ޕީކޭ ނިންމިއިރު، އޭނާ އަކީ ބާސެލޯނާގައި އިސް ދައުރެއް އަދާ ކުރި ކުޅުންތެރިޔެކެވެ. މީގެ އިތުރުން ޕީކޭ ވަނީ ބާސެލޯނާއާއެކު ގިނަ ކާމިޔާބީތަކެއް ވެސް ހޯދާފައެވެ.

ސްޕެއިންގެ މީޑިއާ ރިޕޯޓުތައް ބުނާ ގޮތުގައި ބާސެލޯނާއިން ހޯދަން ބޭނުންވާ ޑިފެންޑަރުންގެ ތެރޭގައި އެތުލެޓިކް ބިލްބާއޯ އަށް ކުޅެމުން އަންނަ އިނިގޯ މާޓިނޭޒް ހިމެނެއެވެ. މާޓިނޭޒްގެ އިތުރުން އެހެން ކުޅުންތެރިން ވެސް އެ ލިސްޓުގައި ހިމެނޭއިރު. އެކަމުގެ މަސައްކަތް އެ ކުލަބުން ކުރާނީ މި މަހު އޮންނަ ފީފާ ވޯލްޑް ކަޕަށް ފަހު ކަމަށް ވެސް ރިޕޯޓުތައް ބުނެއެވެ.