ޔުއެފާ ޗެމްޕިއަންސް ލީގު ގްރޫޕް ޖީގައި މެންޗެސްޓަރ ސިޓީން ސެވިއްޔާ ބަލިކޮށްފިއެވެ.

މި ދެ ޓީމު ސެވިއްޔާގެ ދަނޑުގައި ކުޅުނު މެޗު ވެސް ކާމިޔާބުކުރީ ސިޓީންނެވެ. އެ މެޗު ސިޓީން 4-0 އިން ކާމިޔާބުކުރި އިރު، އަމިއްލަ ދަނޑުގައި ސެވިއްޔާ ބަލިކުރީ 1-3 އިންނެވެ.

މެޗުގެ ފުރަތަމަ ހާފުގައި ލަނޑު ޖަހާ ލީޑު ނެގީ ސެވިއްޔާ އިންނެވެ. އެއީ 31 ވަނަ މިނެޓުގައި ރަފާ މިރް ކާމިޔާބުކުރި ލަނޑުންނެވެ. މެޗުގެ ފުރަތަމަ ހާފު ނިމުނީ ސެވިއްޔާ އިން ކުރީގައި އޮވެގެންނެވެ. ސިޓީގެ ލަނޑުތައް ފެނުނީ ދެ ވަނަ ހާފުފައެވެ. ސިޓީ އަށް ނަތީޖާ ހަމަހަމަކޮށްދިނީ 52 ވަނަ މިނެޓުގައި ރިކޯ ލެވިސްއެވެ. އޭގެ ފަހުން 73 ވަނަ މިނެޓުގައި އެ ޓީމަށް ލީޑު ނަގައިދިނީ ހޫލިއަން އަލްވަރޭޒްއެވެ. އޭނާ މި ލަނޑު ޖެހީ ކެވިން ޑިބްރޭނާ ތަނަވަސްކޮށްދިން ފުރުސަތުންނެވެ. ސިޓީގެ ފަހު ލަނޑު 83 ވަނަ މިނެޓުގައި ރިޔާދް މާރޭޒް ޖެހީ އަލްވަރޭޒްގެ އެހީތެރިކަމާއެކުއެވެ.

މި ގްރޫޕްގައި ބޮރުޝިއާ ޑޯޓްމުންޑާއި ކޯޕަންހޭގަން ބައްދަލުކުރި މެޗު ނިމުނީ 1-1 އިން އެއްވަރުވެގެންނެވެ.

މި ގްރޫޕުން ދެ ވަނަ ބުރަށް ދިޔައީ ސިޓީ އާއި ޑޯޓްމުންޑެވެ. ކުޅުނު ހަ މެޗުން ސިޓީ އަށް 14 ޕޮއިންޓު ލިބުނުއިރު، ޑޯޓްމުންޑަށް ލިބުނީ ނުވަ ޕޮއިންޓެވެ. ތިން ވަނަ އަށް ދިޔަ ސެވިއްޔާ އަށް ލިބުނީ ފަސް ޕޮއިންޓެވެ. ތިން ޕޮއިންޓާއެކު ފުލުގައި އޮތީ ކޯޕަންހޭގަންއެވެ.