އެމްއެންޕީގެ ރިޔާސީ ޕްރައިމަރީ ޖެނުއަރީ 14 ގައި

މޯލްޑިވްސް ނޭޝަނަލް ޕާޓީ (އެމްއެންޕީ)ގެ ރިޔާސީ ޕްރައިމަރީ އަންނަ އަހަރުގެ ޖެނުއަރީ މަހުގެ 14 ވަނަ ދުވަހު ބޭއްވުމަށް އެޕާޓީގެ ޤައުމީ ހިންގާ ކައުންސިލުން ނިންމައިފިއެވެ.

އެމްއެންޕީގެ ޤައުމީ ހިންގާ ކައުންސިލްގެ ފުރަތަމަ ބައްދަލުވުން ވަނީ ބުދަ ދުވަހުގެ ރޭ ބާއްވާފައެވެ. އެމްއެންޕީން ބުނީ ގައުމީ ހިންގާ ކައުންސިލަށް ޕްރައިމަރީ ބާއްވާނެ ތާރީޚެއް ކަނޑައެޅުމަށް ދެ ހުށަހެޅުމެއް ހުށަހަޅާ މަޝްވަރާކޮށް، ހާޒިރުވި މެންބަރުންގެ އިއްތިފާގުން ފާސްވެފައިވަނީ 1 ޑިސެމްބަރުގައި ޕްރައިމަރީއަށް އިޢުލާނުކޮށް، 14 ޖެނުއަރީގައި ޕާޓީގެ ރިޔާސީ ޕްރައިމަރީ ބޭއްވުމަށްކަމަށެވެ.

އަންނަ އަަހަރު ބާއްވާ ރިޔާސީ އިންތިހާބުގައި ވާދަކުރާނެ އެމްއެންޕީގެ ކެންޑިޑޭޓަކު ކަނޑައެޅުމަށް އެތެރޭގެ ޕްރައިމަރީއެއް ބާއްވާނެކަމަށް އެޕާޓީން ހާމަކޮށްފައިވާއިރު އެ ކަމަށް އަދި މިހާތަނަށް ޝައުގުވެރިކަން ފާޅުކުރައްވާފައިވަނީ ޕާޓީގެ ރައީސް އަދި ރައްޔިތުންގެ މަޖިލީހުގެ ދަނގެތި ދާއިރާގެ މެންބަރު މުހައްމަދު ނާޒިމެވެ.

އެމްއެންޕީގެ އިތުރުން، މިހާރު ވެރިކަން ކުރާ މައި ޕާޓީ، އެމްޑީޕީ އާއި އިދިކޮޅު މައި ޕާޓީ ކަމަށްވާ ޕީޕީއެމްގެ އިތުރަށް އެމްޑީއޭ އިން ވެސް ވަނީ ރިޔާސީ އިންތިހާބުގައި ވާދަކުރުމަށް ނިންމާފައެވެ.

އެމްޑީޕީގެ ރިޔާސީ ކެންޑިޑޭޓް ވެސް ޕްރައިމަރީއަކުން ކަނޑައަޅާއިރު، އެ ކަމަށް މިހާރުގެ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ޝައުގުވެރިކަން ފާޅުކުރައްވާފައިވެއެވެ. ނަމަވެސް އެމްޑީޕީގެ ޕްރައިމަރީ ބާއްވާނެ ތާރީހެއް އަދި އެޕާޓީން ކަނޑައަޅާފައެއް ނުވެއެވެ.

ޕީޕީއެމްގެ ރިޔާސީ ޓިކެޓު ވަނީ ކުރީގެ ރައީސް އަބްދުﷲ ޔާމީނަށް ދީފައެވެ.