އިނގިރޭސި ބޮޑުވަޒީރުކަމުގެ ރޭހަށް ފުރަތަމަ ކެންޑިޑޭޓު ޔަގީންވެއްޖެ

އިނގިރޭސި ހައުސް އޮފް ކޮމަންސްގެ ލީޑަރު، ޕެނީ މޯޑަންޓް ކޮންޒަރވޭޓިވް ޕާޓީގެ ލީޑަރޝިޕަށް ވާދަ ކުރައްވާ، ލިޒް ޓްރަސްއަށް ފަހު ބޮޑުވަޒީރަކަށް ބޭފުޅަކު ހޮވުމަށް ބާއްވާ ރޭހަށް ކުރިމަތިލައްވާނެކަން އިއުލާންކުރައްވައިފިއެވެ. ހުކުރު ދުވަހު ކުރެއްވި ކުރު ޓްވީޓެއްގައި ޕެނީ މޯޑަންޓް ވިދާޅުވީ ޕާޓީ އެއްބައިވަންތަ ކުރެއްވުމުގެ ގޮތުން، ސަޕޯޓަރުންގެ މަދަދާއެކު ޕާޓީގެ ލީޑަރު ކަމަށް ކުރިމަތި ލައްވަން ގަސްތު ކުރެއްވީ ކަމުގައެވެ.

ކުރިން އެތައް މިނިސްޓީރިއަލް މަޤާމުތަކެއް ވެސް ފުރުއްވާފައިވާ ޕެނީ މޯޑަންޓް އަކީ ބޮޑުވަޒީރުގެ ރޭހަށް މިފަހަރު ރަސްމީކޮށް ކުރިމަތިލެއްވި ފުރަތަމަ ބޭފުޅާއެވެ.

ލިޒް ޓްރަސް މަގާމަށް ހޮވިވަޑައިގެންނެވި ފަހަރު ވެސް ޕެނީ މޯޑަންޓް ވާދަކުރެއްވިއެވެ. ނަމަވެސް އެފަހަރު ލިބިވަޑައިގެންނެވީ ތިން ވަނައެވެ.

ބޮޑުވަޒީރު ކަމަށް ދެން ކުރިމަތިލައްވާނެ ކަމަށް ބެލެވޭ އަނެއް ދެ ބޭފުޅުންނަކީ ކުރީގެ ބޮޑުވަޒީރު ބޮރިސް ޖޯންސަން އާއި ކުރީގެ ރޭހުގައި ލިޒް ޓްރަސް އާ އެންމެ ގާތުން ވާދަ ކުރެއްވި ރިޝީ ސުނަކްއެވެ. ނަމަވެސް އެބޭފުޅުން  ކުރިމަތިލައްވާނެކަން އަދި ރަސްމީކޮށް އިއުލާނެއް ނުކުރައްވައެވެ.

ޕާޓީން ގޮތެއް ނިންމުން ހޯމަ ދުވަހާ ހަމަޔަށް މުއްދަތު އޮތް އިރު ކޮންޒަވޭޓިވް ޕާޓީގެ 360 އެމްޕީން ކޮންމެ ވެސް އެއް ބޭފުޅަކަށް ތާއީދުކުރައްވަން ޖެހެއެވެ. އަދި ރޭހުގެ ފުރަތަމަ ބުރަށް ނުކުންނެވޭނީ މަދުވެގެން 100 އެމްޕީންގެ ތާއީދު ލިބިވަޑައިގެންފި ނަމައެވެ. އެއަށް ފަހު އެންމެ ގިނަ އެމްޕީންގެ ތާއީދު ލިބިވަޑައިގަންނަވާ ދެބޭފުޅުންނަށް ޕާޓީގެ އާންމު މެންބަރުން އޮންލައިންކޮށް ވޯޓުލާނެއެވެ.

އިނގިރޭސި ބޮޑުވަޒީރުގެ މަގާމު ހުސްވެފައިވަނީ އެމަގާމުގައި ހުންނެވި ލިޒް ޓްރަސް، އެންމެ ސާޅީސް ފަސް ދުވަހަށް ފަހު މަގާމުން އިސްތިއުފާ ދެއްވުމުންނެވެ.