ގައުމީ ހޭންޑްބޯލް ޓީމުގެ ކޯޗަކަށް ސްޓޮމެނޮވިޗް

ރާއްޖޭގެ ގައުމީ ހޭންޑްބޯލް ޓީމުގެ ކޯޗުކަމަށް ބްރަޓިސްލާވް ސްޓޮމެނޮވިޗް ހަމަޖައްސައިިފިއެވެ.

މިއީ ހޭންޑްބޯލް ޓީމުގެ ކޯޗުކަމަށް ސްޓޮމެނޮވިޗް ހަމަޖެއްސި ދެވަނަ ފަހަރެވެ. މީގެ ކުރިން ސްޓޮމެނޮވިޗް ވަނީ 2019 ވަނަ އަހަރުވެސް ރާއްޖޭގެ ހޭންޑްބޯލް ގައުމީ ޓީމަށް އިރުޝާދު ދީފައެވެ.

ހޭންޑްބޯލް ޓީމުގެ ކޯޗުކަމަށް މިފަހަރު އޭނާ ހަމަޖެއްސީ އެއް އަހަރު ދުވަހުގެ މުއްދަތަކަށެވެ. ހޭންޑްބޯލް އެސޯސިއޭޝަނުން މައުލޫމާދޭގޮތުގައި، ކޯޗާއެކު އެންމެ ބޮޑު އެއް ޓާގެޓަކީ ޑިސިޕްލިން ރަނގަޅު ގައުމީ އަންހެން އަދި ފިރިހެން ޓީމެއް އެކުލަވާލުން ކަމަށެވެ. ސްޓޮމެނޮވިޗްއަކީ ކުރިން ހޭންޑްބޯޅަ ކުޅެފައިވާ ތަޖުރިބާކާރު ފަރާތެކެވެ. މީގެ އިތުރުން އޭނާއަކީ ޔޫރަޕުގެ ބައެއް ޓީމުތަކަށްވެސް އިރުޝާދުދީފައިވާ ކޯޗެއްކަން ފާހަގަކޮށް ހޭންޑްބޯލް އެސޯސިއޭޝަނުން ބުނީ، ސްޓޮމެނޮވިޗާއެކު ރާއްޖޭގެ ހޭންޑްބޯޅައަށް ކުރިއެރުން ލިބޭނެކަމަށެވެ.

މީގެ އިތުރުން ސްޓޮމެނޮވިޗް ރާއްޖޭގައި ހޭދަވާ އެއް އަހަރުގެ ތެރޭގައި ރާއްޖޭގެ ޒުވާން ޓީމުތަކަށްވެސް އޭނާގެ އިރުޝާދު ލިބިގެންދާނެ ކަަމަށްވެސް އެސޯސިއޭޝަނުން ފާހަގަކުރެއެވެ. އަންނަ އަހަރު އޮންނަ އިންޑިއަން އައިލެންޑް އޯޝަން ގޭމްސް (އައިއޯއައިޖީ)އާއި 2024 ވަނަ އަހަރު އޮންނަ ސައުތު އޭޝިއަން ގޭމްސްގައި ރަނގަޅު ނަތީޖާއެއް ހޯދުމަށް މަސައްކަތް ކުރާނެއެވެ.