އަމިއްލަ ދަނޑުގައި އިންޓަ މިލާން ބަލި ނުކުރެވޭނަމަ، ޔުއެފާ ޗެމްޕިއަންސް ލީގުގައި ކުރިއަށް ދިޔުން ހައްގު ނޫން ކަމަށް ބާސެލޯނާގެ ކޯޗު ޒަވީ ހެނާންޑޭޒް ބުނެފިއެވެ.

ޒަވީ މި ފަދައިން ބުނީ ޗެމްޕިއަންސް ލީގު ގްރޫޕް ސްޓޭޖުގައި ބާސެލޯނާގެ އަމިއްލަ ދަނޑުގައި އިންޓައާ އެއްވަރުވުމުންނެވެ. މެޗު އެއްވަރުވުމުން ބާސެލޯނާ އަށް ވަނީ ދެ ވަނަ ބުރުން ޖާގަ ހޯދުމަށް އުނދަގޫ ޙާލަތަކަށް ވެއްޓިފައެވެ.

މެޗަށްފަހު ޒަވީ ވަނީ ވަރަށް ބޮޑަށް ހިތްހަމަނުޖެހި ހުރެ ވާހަކަ ދައްކާފައެވެ. އޭނާ ބުނީ، މެޗުގެ ދެ ވަނަ ހާފުގައި ބާސެލޯނާ އަށް ބައިވަރު ގޯސްތަކެއް ހެދުނު ކަމަށެވެ. ޒަވީ ބުނީ އިންޓައިން ނަތީޖާ ހަމަހަމަ ކުރި ގޯލަކީ ވަރަށް ސާފުކޮށް ޑިފެންސް ލައިންގައި ހެދި ގޯހަކުން ޖެހި ލަނޑެއް ކަމަށެވެ. އޭނާ ބުނީ އެ ވާހަކަތައް ދައްކާފައި ވެސް ވާނެ ކަމަށެވެ.

ޒަވީ ބުނީ ފުޓުބޯޅައަކީ ގޯސްތަކާ އެކުވެގެން އަންނަ ކުޅިވަރެއް ކަމަށާއި، ހުރިހާ ވެސް ކަމަކީ ގޯސްތައް މަދު ކުރުން ކަމަށެވެ. ޒަވީ ފާހަގަ ކުރި ގޮތުގައި އިންޓައާ ދެކޮޅަށް ކުޅުނު މެޗުގައި އެ ޓީމަށް ކުރީ ބާސެލޯނާގެ ޑިފެންސުން ހެދި ސީރިއަސް ގޯސްތަކެއްގެ އަސަރެވެ. އިތުރަށް ޒަވީ ބުނީ ޗެމްޕިއަންސް ލީގުގައި އުނދަގޫ ހާލަތަކަށް އައިސްފައިވާ ކަަމަށާއި، ސްޕެނިޝް ލީގާ މެދު ވިސްނަން ޖެހޭނެ ކަމަށެވެ.

މީގެ އިތުރުން ޒަވީ ބުނީ ފުރަތަމަ ހާފުގައި ބާސެލޯނާ އިން ވަރަށް ރަނގަޅަށް ކުޅުނު ކަމަށެވެ. އެކަމުގެ އަސަރު އިންޓަ އަށް ވެސް ކުރިކަން ފާހަގަކޮށް އޭނާ ބުނީ، ފުރަތަމަ ހާފުގައި މެދު ތެރެއިން ވެސް ކުޅުނީ ވަރަށް ރަނގަޅަށް ކަމަށެވެ. ޒަވީ ބުނީ މިއީ ވަރަށް އުނދަގޫ ކަމެއް ކަމަށާއި، މިކަމުން އަރައި ގަނެ، ސެންތިއާގޯ ބާނެބައުގައި ރެއާލް މެޑްރިޑު ބަލި ކުރަން ޖެހޭ ކަމަށެވެ. އޭނާ ބުނީ ބާސެލޯނާގެ ސަޕޯޓަރެއްގެ ހައިސިއްޔަތުން އޭނާ ހުރީ ވަރަށް ދެރަވެސް ވެފައި އަދި ރުޅި ވެސް އައިސްފައި ކަމަށެވެ.

ބާސެލޯނާ އަށް ދެން އޮންނާނީ މި މަހުގެ 16 ވަނަ ދުވަހު ސްޕެނިޝް ލީގުގައި ރެއާލާ ދެކޮޅަށް ކުޅޭ މެޗެވެ.