ރާއްޖޭގައި ގެސްޓްރޮނޮމީ ޓުއަރިޒަމް ނުވަތަ ކަލިނަރީ ޓުއަރިޒަމަށް ފުރުސަތު އެބަ އޮތް ކަމަށް ޓުއަރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.

ހޮޓެލް އޭޝިއާ އެގްޒިބިޝަން ފެށުމުގެ ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ ވަނީ ރާއްޖޭގެ ފަތުރުވެރިކަމަކީ މުޅި ދުނިޔޭގައިވެސް އެ ދާއިރާއިން ފާހަގަކޮށްލެވޭފަދަ ފުރިހަމަ ޚިދުމަތެއް ފޯރުކޮށްދޭ ދާއިރާއެއް ކަމަށް ފާހަގަކުރައްވާފައެވެ. މިހާރު ދުނިޔޭގައި ކާބޯތަކެތި ތަޖުރިބާކުރުމަށް ދަތުރުކުރާ މީހުން ގިނަވެ، އެފަދަ ފަތުރުވެރިކަމަކަށް އޮތް ކުރިމަގު ރަނގަޅުވެފައިވާކަމަށް މައުސޫމް ވިދާޅުވިއެވެ. ރާއްޖޭގެ ފަތުރުވެރިކަމަށް 50 އަހަރު ފުރުމާ ގުޅިގެން ކުރިއަށްގެންދިޔަ ހަރަކާތްތަކުގެ ތެރޭގައި، ރާއްޖޭގައި ވަރަށް ކުޅަދާނަ ޝެފުން ތިބިކަން އެނގިގެން ދިޔަކަމަށާއި ކޮވިޑްގެ ތެރޭގައިވެސް ދިވެހިންގެ ކެއްކުމުގެ ހުނަރު ވަރަށް ބޮޑަށް ފާހަގަވިކަމަށް ޑރ. މައުސޫމް ވިދާޅުވިއެވެ. އެހެންކަމުން ފަތުރުވެރިކަމުގެ ދާއިރާގެ ޕާޓްނަރުންގެ އެއްބާރުލުމާއެކު، މިއީ ފަތުރުވެރިކަން އިތުރަށް ކުރިއެރުވިދާނެ ކަމެއް ކަމަށް މައުސޫމް ވިދާޅުވިއެވެ. އެގޮތުން އެކަށީގެންވާ އިންސާނީ ވަސީލަތްތަކާއި އެހެނިހެން ވަސީލަތްތައް ހޯދުމަކީ މުހިންމު ކަމެއް ކަަމަށް އެމަނިކުފާނު ވިދާޅުވިއެވެ.

މި އަހަރުގެ ހޮޓެލް އޭޝިއާ އެގްޒިބިޝަން އެންޑް އިންޓަނޭޝަނަލް ކަލިނަރީ ޗެލެންޖް 2022 ފެށީ މި މަހުގެ 9 ވަނަ ދުވަހުއެވެ. ހޮޓެލް އޭޝިއާ 2022އަކީ ރާއްޖެއާއި ރާއްޖެއިން ބޭރުގެ ކަލިނަރީ އިންޑަސްޓްރީގެ ފަންނުވެރިންނަށް ފުރުސަތު ހުޅުވާލައިގެން، އެމީހުންގެ ހުނަރުތަކާއި ޚިދުމަތްތައް އާންމުންނަށް ދައްކާލުމުގެ ފުރުސަތު ހޯދައިދީފައިވާ އިވެންޓެކެވެ. އަދި މި އިވެންޓުގެ ޒަރީއާއިން، ސަރަހައްދީ ކަލިނަރީ ކޮމިއުނިޓީ ތެރޭގައި އެކަކު އަނެކަކާއި ބައްދަލުވުމުގެ ފުރސަތުވެސް އެފަރާތްތަކަށް ލިބިގެންދާނެއެވެ. ހޮޓެލް އޭޝިއާ 2022އަކީ 150ށްވުރެ ގިނަ ކުންފުންޏާއި 500ށްވުރެ ގިނަ ކަލިނަރީ ކޮމްޕެޓިޝަން އެންޓްރީސް ހިމެނޭގޮތަށް ރާއްޖޭގައި ބާއްވާ ހަމައެކަނި އިންޓަރނޭޝަނަލް ހޮޓެލް ސަޕްލައިސް އެގްޒިބިޝަނެކެވެ.