ހާލާންޑްގެ ދެ ގޯލާއެކު މެންޗެސްޓަރ ސިޓީއަށް ފަސް ލަނޑުގެ މޮޅެއް!

ލަނޑު ޖެހުމުގައި މިސީޒަންގައި އެންމެ ރަނގަޅު ފޯމްގައި ހުރި ހާލާންޑްގެ ދެ ގޯލާއެކު މެންޗެސްޓަރ ސިޓީން ޗެމްޕިއަންސް ލީގުގައި އެފްސީ ކޯޕަންހޭގަން ކޮޅަށް ފަސް ލަނޑު ޖަހައިފިއެވެ.

ސިޓީގެ އިއްތިހާދު ސްޓޭޑިއަމްގައި 5-0 ން މޮޅުވި ފުޓުބޯޅަ މެޗުގައި ފުރަތަމަ ދެގޯލް ޖެހީ ހާލާންޑްއެވެ. ތިންވަނަ ގޯލަކީ ކޯޕަންހޭގަން ކުޅުންތެރިން އަތުން ބައިކޮޅަށް ވަތް ލަނޑެވެ. ހަތަރު ވަނަ ލަނޑު ޖެހީ ޕެނަލްޓީއަކުން ރިޔާދު މާރޭޒްއެވެ. މިއީ މިސީޒަންގައި އޭނާގެ ފުރަތަމަ ގޯލެވެ. ފަސްވަނަ ލަނޑު މާރޭޒް ތަނަވަސްކޮށްދިން ފުރުޞަތަކުން ޖެހީ އާޖެންޓީނާގެ ޒުވާން ފޯވާޑް އަލްވާރޭޒްއެވެ. މެޗުގެ ފުރަތަމަ ހާފް ނިމުމުގެ ކުރިން ސީޒަންގެ ހަތަރުވަނަ ހެޓްރިކަން ހަދަން ވެސް ހާލާންޑްއަށް ފުރުޞަތު ލިބުނެވެ. ސިޓީއަށް ކުޅުނު ފުރަތަމަ 12 މެޗުން ހާލާންޑް މިހާރު ވަނީ 19 ގޯލް ޖަހާފައެވެ. ދެވަނަ ހާފް ފަށައިގެން ފުރަތަމަ މިނެޓުގައި ގާޑިއޯލާ ވަނީ ހާލާންޑްގެ ބަދަލުގައި ކޯލް ޕަލްމާއަށް ފުރުޞަތު ދީފައެވެ. ދެވަނަ ހާފްގެ ކުރީކޮޅު ރިކޯ ލެވިސްއާއި, ވިލްސަންއަށް ވެސް ކޯޗު ޕެޕް ގާޑިއޯލާ ފުރުޞަތު ދިނެވެ.

މޮޅާއެކު ސިޓީ ގްރޫޕްގެ އެއްވަނާގައި އޮތީ ތިން މެޗުން ވެސް މޮޅުވެ ނުވަ ޕޮއިންޓާއެކުއެވެ. ހަ ޕޮއިންޓާއެކު ދެވަނާގައި އޮތީ ބޮރޫޝިޔާ ޑޯޓްމަންޑެވެ. ޑޯޓްމަންޑް ވަނީ ތިންވަނަ މެޗުގައި 4-1 ން ސްޕެއިންގެ ސެވިއްޔާ ބަލިކޮށްފައެވެ. ސެވިއްޔާއާއި ކޯޕަންހޭގަން ވެސް އޮތީ ޕޮއިންޓަކާ އެކުއެވެ.