އެތުލެޓިކޯ މެޑްރިޑްވެސް ބަލިކޮށް ކްލަބް ބުރޫޖް ގްރޫޕްގެ އެއްވަނާގައި

ޔުއެފާ ޗެމްޕިއަންސްލީގުގައި ސްޕެއިންގެ އެތުލެޓިކޯ މެޑްރިޑްވެސް ބަލިކޮށް, ބެލްޖިއަމްގެ ކްލަބް ބުރޫޖް ގްރޫޕްގެ އެއްވަނަ ދަމަހައްޓައިފިއެވެ.

މި ފުޓުބޯޅަ މެޗުން ބަލިވުމުން އެތުލެޓިކޯ މެޑްރިޑް އޮތީ ތިން މެޗުން ތިން ޕޮއިންޓާއެކު ގްރޫޕްގެ ފުލުގައި, ހަތަރު ވަނާގައެވެ. ދެވަނާގައި އޮތް ޕޯޓޯއާއި, ތިންވަނާގައި އޮތް ބަޔާ ލެވަކޫސެން ވެސް އޮތީ ތިން ޕޮއިންޓާއެކުއެވެ. އެއްވަނާގައި ކްލަބް ބުރޫޖް އޮތީ ނުވަ ޕޮއިންޓާއެކުއެވެ. ތިންވަނަ މެޗުގައި އެތުލެޓިކޯ މެޑްރިޑްގެ މައްޗަށް ކްލަބް ބުރޫޖް ކުރި ހޯދީ 2-0 ނެވެ. މެޗުގައި ކްލަބް ބުރޫޖްގެ ފުރަތަމަ ލަނޑު 36 ވަނަ މިނެޓުގައި ޖެހީ ކަމާލު ސޮވާހުއެވެ. ދެވަނަ ލަނޑު ފެރަން ޖުޓްގުލާ ޖެހީ ދެވަނަ ހާފްގައެވެ. އެތުލެޓިކޯގެ ގިނަ ކުޅުންތެރިން ކައިރިން ނެއްޓުމަށްފަހު, ފުރަތަމަ ލަނޑު ޖަހަން ފުރުޞަތު ފަހިކޮށްދިނީވެސް އޭނާއެވެ.

76 ވަނަ މިނެޓުގައި އެތުލެޓިކޯ މެޑްރިޑަށް ލިބުނު ޕެނަލްޓީ ވެސް ކާމިޔާބެއް ނުކުރެވުނެވެ. މިސީޒަންގައި ފުރަތަމަ އެގާރައިގައި ހިމެނިގެން ނުކުތް ދެވަނަ މެޗުގައި ގްރިޒްމަން ފޮނުވާލި ޕެނަލްޓީ ދިޔައީ ހުރަސް ދަނޑިމަތިން ބޭރަށެވެ. މިގްރޫޕްގައި ޕޯޓޯ ވަނީ 2-0 ން ބެޔާ ލެވަކޫސެން ބަލިކޮށްފައެވެ.