ފެނަބާޗޭގެ ކޯޗުކަމުން މޮރީނިއޯ ވަކިކޮށްފި

ތުރުކީގެ ކްލަބް ފެނަބާޗޭގެ ކޯޗުކަމުން ޕޯޗުގަަލްގެ މަޝްހޫރު ކޯޗު ހޯސޭ މޮރީނިއޯ ވަކިކޮށްފިއެވެ. މި ނިންމުން ނިންމާފައިވަނީ ޗެމްޕިއަންސް ލީގުގެ ޕްލޭއޮފްސްގައި ބެންފިކާ އަތުން ބަލިވި މެޗަށް ފަހުގައެވެ. މި ބައްޔާއެކު ފެނަބާޗޭ އަށް ވަނީ މި ސީސަންގެ ޗެެމްޕިއަންސް ލީގު ކުޅުމުގެ ފުރުސަތު ގެއްލިފައެވެ.

ފެނަބާޗޭ އިން ނެރުނު ބަޔާނުގައި ބުނެފައިވަނީ 2024-2025 ވަނަ އަހަރުގެ ސީޒަނުން ފެށިގެން ޓީމުގެ ހެޑް ކޯޗުގެ ގޮތުގައި މަސައްކަތްކުރި މޮރީނިއޯއާ ހެދި އެއްބަސްވުން އުވާލާފައިވާ ކަމަށެވެ. އަދި އޭނާ ޓީމަށް ކޮށްދިން މަސައްކަތްތަކަށް ޝުކުރު އަދާކޮށް، ކެރިޔަރުގެ ކުރިޔަށް އޮތް ތަނުގައި ކާމިޔާބީއަށް އެދިފައެވެ.

ޗެލްސީ، ރިއަލް މެޑްރިޑް، އިންޓަރ މިލާން، މެންޗެސްޓަރ ޔުނައިޓެޑް، ޓޮޓެންހެމް ހޮޓްސްޕަރ އަދި ރޯމާ ފަދަ ނަން މަޝްހޫރު ކްލަބްތަކުގައި ކޯޗުކަން ކޮށްފައިވާ މޮރީނިއޯ ފެނަބާޗޭއާ ގުޅުނީ 2024 ވަނަ އަހަރުގެ ޖޫން މަހުގައެވެ. ނަމަވެސް އޭނާގެ ކޯޗުކަމުގެ ދަށުން ފެނަބާޗޭއަށް ލީގު ޗެމްޕިއަންކަން ހޯދުމަށް ނުކުޅެދި، ގަލަޓަސަރާއިގެ ފަހަތުން ދެވަނައަށް ޖެހުނެވެ.

62 އަހަރުގެ މި ކޯޗަށް އިސްތަންބޫލްގައި ހޭދަކުރި ދުވަސްތަކުގައި ގިނަ މައްސަލަތަކަކާ ކުރިމަތިލާން ޖެހުނެވެ. މީގެ ތެރޭގައި އޭޕްރީލް މަހު ޓާކިޝް ކަޕްގެ ކުއާޓަރ ފައިނަލްގައި ގަލަޓަސަރާއިން 2-1 އިން ބަލިވުމަށްފަހު، އެ ޓީމުގެ ކޯޗު އޮކަން ބުރުކްގެ މޫނުގައި ހިފައި، ނޭފަތުގައި ޖެހުމުގެ ހާދިސާ ހިމެނެއެވެ.

މީގެ އިތުރުން ގަލަޓަސަރާއިއާ ދެކޮޅަށް ކުޅުނު އަނެއް ޑާބީ މެޗަށްފަހު ޓާކިޝް ރެފްރީންނާ ދެކޮޅަށް ދެއްކި ވާހަކަތަކާ ގުޅިގެން އޭނާއަށް ޖޫރިމަނާ ކުރެވުނެވެ. ހަތަރުވަނަ ރެފްރީ ވަކި އަތަކަށްޖެހިގެން ކަންތައް ކުރި ކަމަށް ތުހުމަތުކޮށް މޮރީނިއޯ ދެއްކި ވާހަކަތައް ވަނީ ކުޅިވަރުގެ އަޚްލާޤާ ޚިލާފު ވާހަކަތަކެއް ކަމަށް ކަނޑައަޅާފައެވެ.

2010 ވަނަ އަހަރު ފީފާ އިން ހޮވާ ދުނިޔޭގެ އެންމެ މޮޅު ކޯޗުގެ މަގާމު ހޯދާފަވާ މޮރީނިއޯ އަކީ، ކްލަބު ފުޓުބޯޅައިގައި ގިނަ ކާމިޔާބުތަކެއް ހޯދާފަވާ ކޯޗެކެވެ. އިންޓަރ މިލާން އަދި ޕޯޓާ އާއި އެކީ ޗެމްޕިއަންސް ލީގު ކާމިޔާބު ކުރުމުގެ އިތުރުން، މޮރީނިއޯ ވަނީ ޕޯޗުގަލް، އިޓަލީ، ސްޕެއިން އަދި އިނގިރޭސި ލީގު ކާމިޔާބު ކޮށްފައެވެ.