އިންޑޮނޭޝިއާގެ ފުލުހުންނާއި ފުޓުބޯޅަ ސަޕޯޓަރުންނާ ދެމެދު ހިނގި ހަމަނުޖެހުމުގައި 129 މީހުން މަރުވެއްޖެ
މި ހާދިސާގައި ޖުމުލަ 129 މީހުން މަރުވެފައިވާއިރު، 180 މީހުންނަށް ވަނީ އަނިޔާވެފައި
އިންޑޮނޭޝިއާގެ ފުޓުބޯޅަ ސްޓޭޑިއަމްގައި ހިނގި ހަމަނުޖެހުމުގެ ތެރެއިން
އިންޑޮނޭޝިއާ ފުޓުބޯޅަ ލީގުގައި ކުޅުނު މެޗެއްގެ ތެރެއިން ސަޕޯޓަރުންތަކަކާއި ފުލުހުންނާއި ދެމެދު ހިނގި ހަމަނުޖެހުމެއްގައި 129 މީހުން މަރުވެއްޖެއެވެ.
މި ހަމަނުޖެހުން ހިނގަން ދިމާވި ސަބަބަކީ އަރެމާ އާއި ޕާސެބަޔާ ސުރަބަޔާ ދެމެދު ކުޅުނު މެޗުން އަރެމާ ބަލިވުމުންނެވެ. އެ މެޗު ސުރަބަޔާ އިން ކާމިޔާބުކުރީ 2-3 އިންނެވެ.
މެޗަށްފަހު އަރެމާގެ ސަޕޯޓަރުން ވަނީ ދަނޑަށް އަރައިގަތުމަށް މަސައްކަތްކޮށްފައެވެ. އެއާއެކު އެ މީހުން ހުއްޓުވުމަށް ފުލުހުން ވަނީ މަސައްކަތްކޮށްފައެވެ. ސަޕޯޓަރުން ހުއްޓުވުމަށް ފުލުހުން ކުރި މަސައްކަތުގެ ތެރެއިން ވަނީ ޓިއަރ ގޭސް ބޭނުންކޮށްފައެވެ. އަދި ޓިއަރ ގޭސް ބޭނުން ކުރުމުން، ސްޓޭޑިއަމުން ނުކުތުމަށް ސަޕޯޓަރުން އުޅުމުގެ ތެރޭގައި ތޮއްޖެހި، ނޭވާހާސްވެ ހިނގި މި ހާދިސާގައި އެތައް ބަޔަކު މަރުވެ، ގިނަ ބަޔަކު ވަނީ ޒަޚަމްވެފައެވެ. އޭގެ ތެރޭގައި ސަޕޯޓަރުންނާއި، ސަލާމަތީ ކަންކަން ބެލެހެއްޓުމުގައި ހަރަކާތްތެރިިވި ފުލުހުން ހިމެނޭ ކަމަށް ރިޕޯޓުތައް ބުނެއެވެ.
ރިޕޯޓުތައް ބުނާ ގޮތުގައި މަރުވި މީހުންގެ ތެރެއިން 34 މީހުން މަރުވެފައިވަނީ ފަރުވާ ދިނުމަށް ހޮސްޕިޓަލަށް ގެންދިޔަ ފަހުންނެވެ. ބާކީ ތިބި މީހުން މަރުވީ ހަމަނުޖެހުމުގެ ތެރެއިން ދަނޑުގައެވެ. މަރުވި މީހުންގެ ތެރޭގައި ފުލުހުންގެ ދެ އޮފިސަރަކު ވެސް ހިމެނޭ ކަމަށް ރިޕޯޓުތައް ވަނީ ބުނެފައެވެ. މި ހާދިސާގައި ޖުމުލަ 129 މީހުން މަރުވެފައިވާއިރު، 180 މީހުންނަށް ވަނީ އަނިޔާވެފައެވެ.
މިކަމާ ގުޅިގެން އެ ޤައުމުގެ ޗީފް ސެކިޔުރިޓީ އޮފިސަރު މަހްފޫދް ވިދާޅުވީ، ދަނޑުގެ ޖާގައަށް ވުރެ ގިނައިން މީހުން އެ މެޗަށް ވަދެފައިވާ ކަމަށެވެ. އޭނާ ވިދާޅުވީ އެ ދަނޑުގެ ޖާގަ އަކީ 38،000 މީހުން ކަމަށާއި، ނަމަވެސް 42،000 ޓިކެޓު އެ މެޗަށް ދޫކޮށްފައިވާ ކަމަށެވެ. މި ހަމަނުޖެހުމުގައި މީހުންގެ އިތުރުން ބައެއް މުދާތަކަށް ވެސް ވަނީ ގެއްލުން ލިބިފައެވެ. އޭގެ ތެރޭގައި 13 އުޅަނދެއް ހިމެނޭއިރު، 10 އުޅަނދަކީ ފުލުހުންގެ އުޅަނދެވެ.
މި ހާދިސާއާ ގުޅިގެން އެ ޤައުމުގެ ލީގު ވަނީ ހަފްތާއެއްގެ މުއްދަތަށް ސަސްޕެންޑުކޮށްފައެވެ. މީގެ އިތުރުން މި ހާދިސާއާ ގުޅިގެން އެ ޤައުމުގެ ސަރުކާރުން ވަނީ މައާފަށް ވެސް އެދިފައެވެ. އަދި މި މައްސަލަ ފުރިހަމައަށް ތަހުގީގު ކުރާނެ ކަމަށް ވެސް އެ ޤައުމުގެ ސްޕޯޓްސް އެންޑް ޔޫތު މިނިސްޓަރު ޒައިނުއްދީން އަމަލީ ވަނީ ވިދާޅުވެފައެވެ.
