ޞަރަހައްދުގެ ޤައުމުތައް ވާދަކުރާ ސާފް ޗެމްޕިއަންޝިޕްގައި ރާއްޖޭގެ 20 އަހަރުން ދަށުގެ ޓީމްގެ ނަތީޖާތަކަށް އަސަރުކުރި އެއް ސަބަބަކީ އުމުރުފުރައަށް ގެނައި ބަދަލުކަމަށް ކޯޗު އަހުމަދު ޝާކިރު (ޝާކިއްޓޭ) ބުނެފިއެވެ.
ޒުވާން ޓީމްތަކުގެ ނަތީޖާތައް ދަށްވުމުން އެކަމާ ގުޅޭގޮތުން ރާއްޖެ ޓީވީގެ "ކުޅިވަރު ފައިލް" ޕްރޮގްރާމްގައި ވާހަކަދައްކަމުން ޝާކިއްޓޭ ބުނީ ޚާއްޞަކޮށް ސާފް ޗެމްޕިއަންޝިޕްގެ ނަތީޖާތައް ދަށްވި އެއް ސަބަބަކީ އުމުރުފުރައަށް ގެނައި ބަދަލުކަމަށެވެ. ކުރިން 19 އަހަރުން ދަށަށް ބާއްވަމުން އައި މުބާރާތް މިއަހަރު ބޭއްވީ 20 އަހަރުން ދަށަށެވެ. އެއީ ކޯވިޑާ ގުޅިގެން މިދިޔަ ދެ އަހަރު މުބާރާތް ނުބޭއްވުމުން މެންބަރު ޤައުމުތަކާ މަޝްވަރާކޮށްގެން ސާފުން ނިންނި ނިންމުމެކެވެ. އެނިންމުމުގެ އަސަރު ރާއްޖެއަށް ބޮޑަށް ކުރީ 20 އަހަރުން ދަށުގެ ގިނަ ކުޅުންތެރިން ރާއްޖޭގެ ފުރަތަމަ ޑިވިޝަންގެ ކްލަބްތަކަށް ކުޅޭތީ, ޒުވާން ޓީމްގެ ޕްރެކްޓިސްއަށް އެކަށީގެންވާ ވަގުތު ނުލިބުމުންނެވެ.
23 ކުޅުންތެރިންގެ ތެރެއިން 22 ކުޅުންތެރިންނަކީ ފަސްޓްޑިވިޝަން ކްލަބްތަކުގައި ބަރާބަރަށް ޕްރެކްޓިސްކުރާ ކުޅުންތެރިން. ކްލަބްތަކުގެ ހާލަތު ހުރިގޮތުން, ލީގު މިދިޔަ ގޮތުން ކުޅުންތެރިން އަންޑަރ20 ޓީމްގެ ޕްރެކްޓިސްއަށް ރިލީޒްކުރަން ވަރަށް ބައިވަރު އުނދަގޫތަކެއް ކުރިމަތިވި. އެހެންވީމަ ހަޤީޤަތުގައި މި ކުޅުންތެރިން ގޮވައިގެން ޕްރެކްޓިސް ކުރުމަށް ވަރަށްބޮޑު ގޮންޖެހުންތަކަކާ ދިމާވި. ދިމާވެގެން މާކަ ރަނގަޅު ޕްރެކްޓިސްތަކެއް ކުރެވޭގޮތެއްނުވި.އަހުމަދު ޝާކިރު/ 20 އަހަރުން ދަށުގެ ޓީމްގެ ކޯޗު
ފުރަތަމަ ޑިވިޝަންގެ ބައެއް ޓީމްތައް ރެލިގޭޝަނުން ސަލާމަތްވާން, އަދި ބައެއް ޓީމްތައް ގަދަ ހައެއް ހޯދަން މަސައްކަތްކުރަމުން ދިޔައިރު ޒުވާން ޓީމްގެ ކުޅުންތެރިން ނުލައިފިއްޔާ ޕްރެކްޓިސްކުރަން ވެސް ޓީމްތައް ހަމަނުވާވަރުގެ ޓީމްތައް ހުރިކަން ޝާކިއްޓޭ ފާހަގަކުރިއެވެ. އެކަމަކު އެހާލަތު އޮތްއިރުވެސް ކްލަބްތަކުން ހަމަ ވަރަށްބޮޑަށް ކުޅުންތެރިން ރިލީޒްކުރިކަމަށާއި, އެކަމަކު މިކަހަލަ މުބާރާތަކަށްދާން ތައްޔާރުވާން ބޭނުންވާވަރަށް ޕްރެކްޓިސްއެއް ނުކުރެވުނުކަމަށް ޝާކިއްޓޭ ބުންޏެވެ.
ޝާކިއްޓޭ ބުނީ 19 އަހަރުން ދަށަށް މުބާރާތް އޮތްނަމަ ފުރަތަމަ ޑިވިޝަންގައި ކުޅޭ ކުޅުންތެރިންގެ އަދަދު މަދުވެ, ޒުވާން ޓީމަށް ޕްރެކްޓިސް ކުރަން ވަގުތު ލިބޭނެކަމަށެވެ. ސާފްގެ ނިންމުން އައީ ރާއްޖޭގެ ކަލަންޑަރު ހަދާ ސީޒަން ފެށިފަހުންކަން ވެސް އޭނާ ފާހަގަކުރިއެވެ. ރާއްޖެއަށް އެކަށީގެންވާ ވަރަށް މުބާރާތަށް ތައްޔާރު ނުވެވުމުގެ އިތުރުން ސަރަހައްދުގެ އެހެން ޤައުމުތައް, ޚާއްޞަކޮށް އިންޑިޔާ, ނޭޕާލް އަދި ބަނގްލަދޭޝްއިން ދުރާލާ ރަނގަޅަށް ތައްޔާރުވިކަން ޝާކިއްޓޭ ފާހަގަކުރިއެވެ.
މިއަހަރުގެ އޮގަސްޓްމަހު އޮތް 20 އަހަރުން ދަށުގެ ސާފް ޗެމްޕިއަންޝިޕްގައި ރާއްޖެއަށް ލިބުނީ އެއް ޕޮއިންޓެވެ. އެއީ ސްރީލަންކާއާ އެއްވަރުކޮށް ލިބުނު ޕޮއިންޓެވެ. ޗެމްޕިއަން އިންޑިޔާއާ ރަނގަޅު ވާދައެއްކޮށް ބަލިވީ 1-0 ނެވެ. ބަނގްލަދޭޝްއާއި ނޭޕާލުން ރާއްޖެ ކޮޅަށް ހަތަރު ލަނޑު ޖެހިއެވެ. 17 އަހަރުން ދަށުގެ ޓީމް ސެޕްޓެމްބަރު މަހު ކުޅުނު މުބާރާތުގައި ސްރީލަންކާ އަތުންނާއި ޕާކިސްތާން އަތުންވެސް ބަލިވީއެވެ.
