ބާސެލޯނާގެ ޑި ޔޯން އާއި ޑިޕާއިއަށް ވެސް އަނިޔާވެ ކުޅުމާއި ދުރަށް

ބާސެލޯނާ އަށް ކުޅެމުން އަންނަ ނެދަލެންޑްސްގެ މިޑްފީލްޑަރު ފްރެންކީ ޑި ޔޯން އާއި ފޯވާޑް މެމްޕިސް ޑިޕާއި އަށް އަނިޔާާވެ ކުޅުމާ ދުރަށް ދާން ޖެހިއްޖެއެވެ.

އިންޓަނޭޝަލް ބްރޭކްގައި ބާސެލޯނާގެ ގިނަ ކުޅުންތެރިންނަށް ވަނީ އަނިޔާގެ މައްސަލަތަކާ ކުރިމަތިލާން ޖެހިފައެވެ. ޑި ޔޯން އާއި ޑިޕާއި މިވަގުތު ތިބީ ނެދަލެންޑްސްގެ ޤައުމީ ޓީމާއެކުއެވެ. ބާސެލޯނާ އިން ބުނެފައިވާ ގޮތުގައި މި ދެ ކުޅުންތެރިން ހެދި ޓެސްޓުތަކުން ދައްކާ ގޮތުގައި ފައިގެ ފަލަ މަސްގަނޑަށް ވަނީ އަނިޔާވެފައެވެ.

މީޑިއާ ތަކުގައި ރިޕޯޓުކޮށްފައިވާ ގޮތުގައި ހަފްތާއެއްގެ ތެރޭގައި އަނިޔާއިން ރަނގަޅުވެ ޑި ޔޯން އަށް ކުޅުމުގެ ތެރެއަށް އާދެވޭނެކަމަށް ލަފާކުރެވެއެވެ. ނަމަވެސް، ޑިޕާއި ގާތްގަނޑަކަށް މަސް ދުވަސް ވަންދެން ކުޅުމާ ދުރުގައި ހުންނަން ޖެހިދާނެ ކަމަށް ވެސް ރިޕޯޓުތައް ބުނެއެވެ.

މި ސީޒަންގައި ޑި ޔޯން ވަނީ ބާސެލޯނާ އަަށް، އަށް މެޗު ކުޅެދީ އެއް ލަނޑު ޖަހާފައެވެ. ޑިޕާއި ވަނީ މިހާތަނަށް ތިން މެޗު ކުޅެދީ، އެއް ލަނޑު ޖަހާފައެެވެ.