125 މިލިއަން ރުފިޔާގެ ބާސްކެޓު އެރީނާގެ އަމަލީ މަސައްކަތް ވަރަށް އަވަހަށް ފެށޭނެ: މަޚްލޫފް
26 ސެޕްޓެމްބަރު 2022 | ހޯމަ 06:04މަޚްލޫފް ވިދާޅުވީ ރާއްޖޭގެ ބާސްކެޓު އާއިލާއާއި، ޚާއްސަކޮށް ކުޅުންތެރިންނަށް މަދުވަނީ ފެންވަރު ރަނގަޅު ވަސީލަތް ކަމަށް
މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަމަންޓް އަޙުމަދު މަޚްލޫފް
ރާއްޖޭގައި ޤާއިމު ކުރުމަށް ހަމަޖެހިފައިވާ ބާސްކެޓް އެރީނާގެ އަމަލީ މަސައްކަތް ވަރަށް އަވަހަށް ފެށޭނެ ކަމުގެ އުވާވެރި ޚަބަރު ޔޫތު މިނިސްޓަރު އަޙުމަދު މަޚްލޫފް ދެއްވައިފިއެވެ.
މަޚްލޫފް މިގޮތަށް ވިދާޅުވީ ރާއްޖޭގައި ފެށި ސާބާ ވިމަންސް ޗެމްޕިއަންޝިޕް ފެށުމުގެ ރަސްމިއްޔާތުގައި ބައިވެރިވެ ވަޑައިގެން ދެއްކެވި ވާހަކަފުޅުގައެވެ. މަޚްލޫފް ވިދާޅުވީ އެ ބާސްކެޓު އެރީނާ އަކީ ގާތްގަނޑަކަށް ޖުމުލަ 125 މިލިއަން ރުފިޔާ ޚަރަދުވާނެ ޕްރޮޖެކްޓެއް ކަމަށެވެ. މީގެ އިތުރުން އެ ޕްރޮޖެކްޓުގެ މަސައްކަތް ލަސްވެގެންދިޔައީ ކޯވިޑްގެ ދަތި ޙާލަތާ ގުޅިގެންކަން ފާހަގަކުރައްވައި މަޚްލޫފް ވިދާޅުވީ ދާދި އަވަހަށް އެ ޕްރޮޖެކްޓުގެ އަމަލީ މަސައްކަތް ވަރަށް އަވަހަށް ފެށޭނެ ކަމަށް އުންމީދު ކުރައްވާ ކަމަށެވެ.
މަޚްލޫފް ވިދާޅުވީ ރާއްޖޭގެ ބާސްކެޓު އާއިލާއާއި، ޚާއްސަކޮށް ކުޅުންތެރިންނަށް މަދުވަނީ ފެންވަރު ރަނގަޅު ވަސީލަތް ކަމަށެވެ. އެހެންކަމުން މި ސަރުކާރުގެ ކުޅިވަރި ސިޔާސަތުގެ ތެރެއިން އެކަމަށް ހައްލު ހޯދައިދޭނެ ކަމުގެ ޔަގީންކަން މިނިސްޓަރު ވަނީ ދެއްވާފައެވެ.
އިތުރަށް ވާހަކަ ދައްކަވަމުން މަޚްލޫފް ވިދާޅުވީ ރާއްޖޭގެ ކުޅިވަރު ކުރިއެރުވުމާއި، ކުޅުންތެރިންނަސް ފަހި ގޮތްތަކެއް ހޯއްދަވައިދެއްވުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ކުރައްވަމުން ގެންދަވާ މަސައްކަތަށް ޝުކުރު އަދާ ކުރާ ކަމަށެވެ.
ކުޅިވަރުތަކުގެ މެދުގައި އޮތް ތަފާތު ނައްތާލައި، ހުރިހާ ކުޅިވަރަކަށް ވެސް ހަމަހަމަ ފުރުސަތު ހޯދައިދިނުމަކީ މި ސަރުކާރުގެ އެންމެ ބޮޑު އެއް އަމާޒެވެ. އެ ވައުދުގެ ދަށުން ރާއްޖެއިން އަންނަނީ އެކި އެކި ކުޅިވަރު ތަކުގެ ބައިނަލްއަޤުވާމީ މުބާރާތްތައް ވެސް ރާއްޖޭގައި ބާއްވަމުންނެވެ.
މިހާރު ކުރިއަށްދާ ސާބާ ވިމަންސް ޗެމްޕިއަންޝިޕްގެ ފުރަތަމަ މެޗުގައި ރާއްޖެއިން ވަނީ ނޭޕާލް ބަލިކޮށްފައެެވެ.
