20 އަހަރަށް ފަހު ރިޝްމާ ބާސްކެޓު ކުޅުން ހުއްޓާލައިފި

ގިނަ އަހަރުތަކެއް ވަންދެން ބާސްކެޓު ބޯޅަ ކުޅުމަށްފަހު، އަންހެން ބާސްކެޓު ކުޅުންތެރިޔާ ފާތިމަތު ރިޝްމާ (ރިޝްޓޯ) ބާސްކެޓު ކުޅުން ހުއްޓާލަން ނިންމައިފި އެވެ.

ޤައުމީ ކެރިއަރުގައި ވެސް، އަދި ކުލަބު ކެރިއަރުގައި ވެސް މޮޅު ކުޅުމެއް ދައްކާފައިވާ ރިޝްމާ ވަނީ ގާތް ގަނޑަކަށް 20 އަހަރަށް ވުރެ ދިގު މުއްދަތެއްގައި ބާސްކެޓު ކުޅެފަ އެވެ. ރިޝްމާ ވަނީ އެންމެ މޮޅު އަންހެން ބާސްކެޓު ކުޅުންތެރިޔާ އަށް ދެމުން އަންނަ އެވޯޑު ވެސް ގިނަ ފަހަރެއްގެ މަތިން ހޯދައިފަ އެވެ.

އެގޮތުން 2022 ވަނަ އަހަރު ސަރުކާރުން ދޭން ފެށި މޯލްޑިވްސް ސްޕޯޓްސް އެވޯޑްސްގެ އެންމެ މޮޅު އަންހެން ބާސްކެޓު ކުޅުންތެރިޔަކަށް ހޮވުނީ ރިޝްމާ އެވެ. މީގެ އިތުރުން މިއަހަރުގެ މޯލްޑިވްސް ސްޕޯޓްސް އެވޯޑްސްގެ އެންމެ މޮޅު އަންހެން ބާސްކެޓު ކުޅުންތެރިޔާގެ މަޤާމަށް ވެސް ރިޝްމާ ވަނީ ނޮމިނޭޓުވެފަ އެވެ. ރާއްޖޭގައި ކުރިއަށް ދިޔަ ސާބާ އަންހެން ބާސްކެޓު ބޯޅަ މުބާރާތުގައި ވެސް ރިޝްމާ ވަނީ ޤައުމީ އަންހެން ޓީމާ އެކު ވާދަކޮށްފަ އެވެ. އެ މުބާރާތުގައި ރާއްޖެ އިން ރިހި މެޑަލް ހޯދިއިރު، ރިޝްމާ ވަނީ ރަނގަޅު ކުޅުމެއް ވެސް ދައްކައިފަ އެވެ.

ބާާސްކެޓު ކުޅުން ހުއްޓާލަން ރިޝްމާ ނިންމާފައިވާކަން އިއުލާން ކުރީ ރާއްޖޭގައި ކުރިއަށް ދިޔަ ސުޕަ ކަޕްގެ ފައިނަލް މެޗަށްފަހު އެވެ. އެ މުބާރާތުގައި ފައިނަލްގައި ރާއްޖޭގެ ކުއީންސް ބާސްކެޓު ބޯޅަ ކުލަބު ކުޅުނުއިރު، ރިޝްމާ ވެސް ވަނީ ކުޅެފަ އެވެ. އެ މުބާރާތުގެ ފައިނަލްގައި ކުއީންސް ބާސްކެޓު ބޯޅަ ކުލަބު ވަނީ ސްރީ ލަންކާގެ އީގަލްސްއާ ވާދަކޮށް ބަލިވެފަ އެވެ. އެ މެޗަށްފަހު ރިޝްމާ ވަނީ ކުޅުން ހުއްޓާލަން ނިންމާފައިވާކަން ރަސްމީކޮށް އިއުލާން ކޮށްފަ އެވެ.

ރިޝްމާ ވަނީ އޭނާގެ ދިގު ކެރިއަރުގައި އެހީތެރިވި އެންމެހާ ފަރާތްތަކަށް ޝުކުރު އަދާ ކޮށްފަ އެވެ. އެގޮތުން ރިޝްމާގެ މަންމަގެ ނަން އޭނާ ވަނީ ވަކިން ޚާއްސަ ގޮތެއްގައި ފާހަގަ ވެސް ކޮށްފަ އެވެ.