ކ. މާލެ
|
17 ސެޕްޓެންބަރ 2022 | ހޮނިހިރު 15:11
ޝީއާއި ޕޫޓީން އެއް މާލަމަކުން އެންމެ ފަހުން ބައްދަލު ކުރައްވާފައި ވަނީ ޔޫކްރައިން ހަނގުރާމައިގެ ކުރިން
ޔޫކްރެއިން-ރަޝިއާ ހަމަނުޖެހުން
ދުނިޔެއަށް ހަމަޖެހުން ގެންނަން ރަޝިއާއާއެކު މަސައްކަތް ކުރާނަން: ޝީ
 
ޗައިނާއާއި ރަޝިއާއިން ދަމަހައްޓަމުން ދަނީ އިސްތިރާޖީ ގޮތުން މުހިންމު ގުޅުމެއް ކަމަށް ޝީ ވަނީ ވިދާޅުވެފައި
 
ޔޫކްރައިންގައި ރަޝިއާއިން ކުރަމުންދާ ހަނގުރާމަ ކުށްވެރިކުރަނިވި ރޫޙެއްގައި ޗައިނާއިން މިހާތަނަށްވެސް ވާހަކަދައްކާފައެއް ނުވޭ
 
ހަމަނުޖެހުން ގެއްލިފައިވާ ދުނިޔެއަށް ސުލްހަ ގެނެސްދިނުމަށް ރަޝިއާއާއެކު މަސައްކަތް ކުރަން ޗައިނާ އޮތީ ތައްޔާރަށް ކަމަށް ވިދާޅުވި

ހަމަނުޖެހުމާއި ނުތަނަވަސްކަމުގައި އޮތް އަދުގެ ދުނިޔެއަށް ހަމަޖެހުން ގެނެސް، ހެޔޮ ފާލަކަށް ކަންކަން އެޅުވުމަށްޓަކާ ރަޝިއާއާއެކު މަސައްކަތް ކުރުމަށް ޗައިނާ އޮތީ ތައްޔާރަށް ކަމަށް، ޗައިނާގެ ރައީސް ޝީ ޖީންޕިންގް، ރަޝިއާގެ ރައީސް ވްލޭޑްމިއަރ ޕޫޓިންއަށް، ބުރާސްފަތި ދުވަހު ދަންނަވައިފިއެވެ.

ފެބުރުއަރީ 24 ވަނަ ދުވަހު ރަޝިއާއިން ޔޫކްރައިންގައި ވަރުގަދަ ހަނގުރާމައެއް ފެށިފަހުން ފުރަތަމަ ފަހަރަށް އެއް މާލަމެއްގައި ޕޫޓިންއާ ބައްދަލު ކުރައްވާ، ވާހަކަފުޅުދައްކަވަމުން ޝީ ވަނީ، އެއް-ފަރާތެއްގެ ނުފޫޒު އޮތް ތަނަކަށް ދުނިޔެ ހެދުމަށް އެމެރިކާއިން ކުރަމުންދާ މަސައްކަތްތައް ފެއިލް ވާނެ ކަމަށް ޕޫޓިން ވިދާޅުވި ފަހުން، "ޒަމާންވީ އެކުވެރިޔާއާ" ބައްދަލުވެވަޑައިގަތުމުން އިންތިހާއަށް އުފާ ކުރައްވާ ކަމަށް ވިދާޅުވެފައެވެ.

ޗައިނާއާއި ރަޝިއާއިން ދަމަހައްޓަމުން ދަނީ އިސްތިރާޖީ ގޮތުން މުހިންމު ގުޅުމެއް. ދުނިޔޭގެ ތާރީޚު ނުދެކޭ ފަދަ ބަދަލުތަކަކާ ކުރިމަތިލާން ޖެހިފަ އޮތް މި ދަނޑިވަޅު، ޒިންދާރުކަން ދައްކުވައިދީ، އިސް ދައުރެއް އަދާކޮށް، ހަމަނުޖެހުން ގެއްލިފައިވާ ދުނިޔެއަށް ސުލްހަ ގެނެސްދިނުމަށް ރަޝިއާއާއެކު މަސައްކަތް ކުރަން ޗައިނާ މިއޮތީ ތައްޔާރަށް.
ޝީ ޖީންޕިންގް؛ ޗައިނާގެ ރައީސް

ވެރިކަމުގެ 3 ވަނަ ދައުރަކަށް އަމާޒު ހިއްޕަވާފައިވާ ޝީ މިސްރާބު ޖައްސަވާފައި ވަނީ ޗައިނާ ދުށް އެންމެ ނުފޫޒު ގަދަ ލީޑަރު ކަމަށްވާ މާއޮ ޒޭޑުންގ އަށްފަހު ޗައިނާގެ ވެރިކަމުގައި ހުންނެވި އެންމެ ބާރުގަދަ ލީޑަރަށް ވެވަޑައިގަތުމަށެވެ. ޕޫޓިންއާ ބައްދަލު ކުރައްވާ ޝީ ދެއްކެވި ވާހަކަފުޅުގައި، ޔޫކްރައިންގެ ނަންވެސް ވިދާޅުވެފައި ނުވާ ކަމަށް މައުލޫމާތު ލިބެއެވެ.

ބައްދަލުކުރެއްވުމާ ބެހޭ ގޮތުން ޗައިނާއިން ނެރުނު ބަޔާނުގައިވެސް ޔޫކްރައިންގެ ވާހަކައެއް ނެތެވެ. ނަމަވެސް، ރަޝިއާގެ އަސާސީ މަސްލަހަތާ ގުޅިފައިވާ ކަންކަމުގައި، ޗައިނާއަށް ވަރުގަދައަށް އެއްބާރުލުން ދިނުމަށް ޗައިނާ ތައްޔާރު ކަމަށް ވަނީ ފާހަގަ ކޮށްފައެވެ.

ކަން މިހެން އޮތް ނަމަވެސް، ޕޫޓިންގެ ވާހަކަފުޅުގައި ޔޫކްރައިންގެ މަސްރަހަށް އަލިއަޅުއްވާލެއްވިއެވެ. އެގޮތުން ޔޫކްރައިންގެ މަސްރަހުގައި ހިނގަމުންދާ ކަންކަމާ މެދު ޝީގެ ހިތްޕުޅުގައި ކަންބޮޑުވުންތަކަކާއި ސުވާލުތަކެއް އުފެދިފައި ވާނެ ކަމަށް ޤަބޫލު ކުރައްވާ ކަމަށް ޕޫޓިން ވަނީ ވިދާޅުވެފައެވެ. ޔޫކްރައިންގެ މަސްރަހާ ގުޅިގެން، ޗައިނާގެ ލީޑަރު ގެންގުޅުއްވާ ހަމަހަމަ އުސްލޫބަށް ޕޫޓިން ވަނީ ތަޢުރީފު ކުރައްވާފައެވެ.

އަދާ ޖެހުނުއިރުވެސް ޔޫކްރައިންގައި ރަޝިއާއިން ކުރަމުންދާ ހަނގުރާމަ ކުށްވެރިކުރަނިވި ރޫޙެއްގައި ޗައިނާއިން ވާހަކަދައްކާފައެއް ނުވެއެވެ. އަދި އެއީ ހަނގުރާމައެއް ކަމަށްވެސް ރިޢާޔަތް ކޮށްފައެއް ނުވެއެވެ. އޭގެ ބަދަލުގައި ޗައިނާއިންވެސް އެ ކަމަށް ރިޢާޔަތް ކުރަނީ، ރަޝިއާގެ ސަރުކާރުންވެސް މުޚާތަބު ކުރަމުން ދާ ފަދައިން، "ހާއްސަ އަސްކަރީ އޮޕަރޭޝަން" ގެ ނަމުންނެވެ.

ޝީ އާއި ޕޫޓީން އެއް މާލަމަކުން އެންމެ ފަހުން ބައްދަލު ކުރައްވާފައި ވަނީ ޔޫކްރައިން ހަނގުރާމައިގެ ކުރިންނެވެ. އެ ފަހަރު، 2 ޤައުމުގެ ލީޑަރުންވެސް ވަނީ، ހުޅަނގާ ދެކޮޅަށް ދެ ޤައުމު ގުޅިގެން މަސައްކަތް ކުރުމުގައި "ހައްދެއް ނެތް" މިންވަރަށް، އެއް ބަޔަކު އަނެއް ބަޔަކަށް އެއްބާރުލުން ދިނުމަށް އެއްބަސްވެވަޑައިގެން، އެކަން އިއުލާން ކުރައްވާފައެވެ.

ރަޝިއާއިން ޔޫކްރައިންގައި ކުރަމުންދާ ވަރުގަދަ ހަނގުރާމައާ ގުޅިގެން ދުނިޔޭގެ އިޤްތިޞާދަށް ވަރުގަދަ ލޮޅުމެއް އަރާފައި ވާ އިރު، ޗައިނާއަކީވެސް އެކަމާ އިންތިހާއަށް ކަންބޮޑުވާ ޤައުމެކެވެ. އަދި ހުޅަނގުން ކުރިމަތިކޮށްފާނެ ފިއްތުންތަކާއި އަޅާފާނެ ދަތިކުރުމުގެ ފިޔަވަޅުތަކަކަށް ބިރުން، ރަޝިއާއަށް އަސްކަރީ އެހީތެރިކަން ފޯރުކޮށްދިނުމަށްވެސް ޗައިނާއިން މަސައްކަތެއް ކޮށްފައި ނުވާ ކަން ފާހަގަ ކުރަން ޖެހެއެވެ.

ރަޝިއާގެ ރައީސް ވްލޭޑްމިއާ ޕޫޓިންގެ އަމުރުފުޅަކަށް އެ ގައުމުގެ އަސްކަރިއްޔާއިން ހާއްސަ އޮޕަރޭޝަނެއްގެ ނަމުގައި ފެބުރުއަރީ 24، 2022 ވަނަ ދުވަހު ޔޫކްރައިންއަށް އަރާ، ކުރަމުން ދާ ހަނގުރާމައާ ގުޅިގެން، ހުޅަނގުގެ ބާރުތަކުން ދަނީ ރަޝިއާއާ ދެކޮޅަށް، ދަތި ކުރުމުގެ ހަރުކަށި ފިޔަވަޅުތަކެއް ތަންފީޒު ކުރަމުންނެވެ. އޭގެ ރައްދުގައި، ރަޝިއާއިންވެސް ދަނީ ހުޅަނގަށް އެކި ގޮތް ގޮތުން ފިއްތުންތައް ކުރިމަތި ކުރުވަމުންނެވެ. ނަތީޖާއެއްގެ ގޮތުން، ހަނގުރާމައިގެ އަސަރު، ދުނިޔޭގެ އެކި ހިސާބުތަކުގައި ދިރިއުޅެމުންދާ އާންމު ރައްޔިތުންނަށްވެސް ދަނީ ފޯރަމުންނެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ފާޠިމަތު ޒުހައިރާ
0%
0%
0%
0%
0%
0%
ކޮމެންޓް
ގުޅުންހުރި