އޭޕެކް ސަމިޓުގެ ހަވާސާގައި ޕުޓިންއާއި ޝީ ބައްދަލުކުރައްވަނީ

މި އަހަރުގެ ފަހުކޮޅު ބޭއްވުމަށް ހަމަޖެހިފައިވާ އޭޝިއާ-ޕެސިފިކް އިކޮނޮމިކް ކޯޕަރޭޝަން (އޭޕެކް) ސަމިޓުގެ ހަވާސާގައި، ރަޝިޔާގެ ރައީސް ވްލަޑިމިއާ ޕުޓިންއާއި ޗައިނާގެ ރައީސް ޝީ ޖިންޕިންގ ބައްދަލުކުރައްވާ، ފުޅާ މަޝްވަރާތަކެއް ބޭއްވުމަށް އެއްބަސްވެވަޑައިގަނެފައިވާ ކަމަށް ކްރެމްލިނުން ހާމަކޮށްފި އެވެ. ރަޝިޔާގެ ރައީސްގެ މުޝީރު ޔޫރީ އުޝަކޮވް ނޫސްވެރިންނަށް މައުލޫމާތު ދެއްވަމުން ވިދާޅުވީ، ދެ ގައުމުގެ ރައީސުން މި ބައްދަލުވުން ބޭއްވުމަށް އެއްބަސްވެވަޑައިގެންނެވީ މިދިޔަ ހަފުތާގައި ކިރްގިސްތާނުގެ ވެރިރަށް ބިޝްކެކްގައި ބޭއްވި ޝެންގހާއީ ކޯޕަރޭޝަން އޯގަނައިޒޭޝަން (އެސްސީއޯ) ސަމިޓުގެ ހަވާސާގައި ބޭއްވި ބައްދަލުވުންތަކުގެ ތެރެއިން ކަމަށެވެ. މި އަހަރުގެ އޭޕެކް ސަމިޓް ބޭއްވުމަށް ހަމަޖެހިފައިވަނީ ނޮވެންބަރު މަހުގެ 18 އިން 19 އަށް ޗައިނާގެ ސިޓީއެއް ކަމަށްވާ ޝެންގޒެންގަ އެވެ.

އުޝަކޮވް ވިދާޅުވީ، އޭޕެކް ސަމިޓުގެ ތެރެއިން ޕުޓިންއާއި ޝީގެ އިތުރުން އެމެރިކާގެ ރައީސް ޑޮނަލްޑް ޓްރަމްޕް ބައިވެރިވެވަޑައިގަންނަވާ ތިން ގައުމުގެ ގުޅިފައިވާ ބައްދަލުވުމެއް ބޭއްވުމުގެ ފުރުސަތު އެބައޮތް ކަމަށެވެ. މީގެ އިތުރުން، 18 ވަނަ ބްރިކްސް ސަމިޓުގައި ބައިވެރިވެވަޑައިގެންނެވުމަށް ޕުޓިން އިންޑިޔާއަށް ކުރައްވާ ދަތުރުފުޅާ ގުޅޭގޮތުން ވާހަކަފުޅު ދައްކަވަމުން އުޝަކޮވް ވިދާޅުވީ، ރަޝިޔާގެ ރައީސް ބުރާސްފަތި ދުވަހުގެ ރޭގެ ވަގުތެއްގައި ނިއު ދެއްލީއަށް ފުރާވަޑައިގަންނަވާނެ ކަމަށެވެ.

ހުކުރު ދުވަހު ޕުޓިން އިންޑިއާއަށް ވަޑައިގަތުމަށްފަހު އެންމެ ފުރަތަމަ ބައްދަލުކުރައްވާނީ އިންޑިއާގެ ބޮޑުވަޒީރު ނަރެންދްރަ މޯދީއާ ކަމަށް އުޝަކޮވް ވިދާޅުވި އެވެ. އަދި، ސަމިޓުގެ ހަވާސާގައި ދެކުނު އެފްރިކާގެ ރައީސް ސިރިލް ރަމަފޯސާއާއި، މެލޭޝިއާގެ ބޮޑުވަޒީރު އަންވަރު އިބްރާހީމްގެ އިތުރުން އިތިއޯޕިއާގެ ބޮޑުވަޒީރު އަބީ އަހުމަދާއެކު ވެސް ޕުޓިން ބައްދަލުވުންތައް ބާއްވަވާނެ ކަމަށް އޭނާ ވިދާޅުވި އެވެ.

ބްރިކްސް ބިޒްނަސް ފޯރަމްގައި ޕުޓިން ބައިވެރިވެވަޑައިގަންނަވާނެ ކަމަށާއި، ނަމަވެސް މި ސަމިޓުގެ ހަވާސާގައި ޝީއާއެކު ރަސްމީ ބައްދަލުވުމެއް ބޭއްވުމަށް ހަމަޖެހިފައި ނުވާ ކަމަށް އުޝަކޮވް ވިދާޅުވި އެވެ. ނަމަވެސް، ރަސްމީ އެޖެންޑާގެ ބޭރުން ދެ ރައީސުން ބައްދަލުވެ، މުއާމަލާތް ކުރައްވާނެ ކަމަށް ގަބޫލުކުރައްވާ ކަމަށް އޭނާ ފާހަގަކުރެއްވި އެވެ.

ބްރިކްސްއަކީ "ވަރަށް މަގުބޫލު ބްރޭންޑެއް" ކަމަށާއި، އެއީ "ހަގީގީ މަލްޓިލެޓެރަލިޒަމް" ނުވަތަ ގިނަ ގައުމުތައް ބައިވެރިވާ ނިޒާމަކާ ގުޅިފައިވާ ޖަމާއަތެއް ކަމަށް އުޝަކޮވް ސިފަކުރެއްވި އެވެ. އަދި، ބްރިކްސްއަކީ މިހާރު ދުނިޔޭގެ ބާރުތައް ބެހިފައިވާ ނިޒާމުގެ މުހިންމު އެއް މަރުކަޒު ކަމަށާއި، ދުނިޔެ ހިންގުމުގެ ނިޒާމުގައި އެ ޖަމާއަތުގެ ނުފޫޒު ގަދަވެފައިވާ ކަމަށް ވެސް އޭނާ ވިދާޅުވި އެވެ. "ބްރިކްސްގެ ގައުމުތަކުން މަސައްކަތް ކުރަނީ މިނިވަން އަދި އަމިއްލަ ސިޔާސަތުތަކެއް ކުރިއެރުވުމަށް. އަދި، ބައިނަލްއަގުވާމީ ގާނޫނުތަކާއި އދ. ގެ އަސާސީ އުސޫލުތަކުގެ މައްޗަށް ބިނާކޮށް، ކުރިމަތިވާ ގޮންޖެހުންތަކަށް އެންމެން ގުޅިގެން ހައްލު ހޯދުމަށް އެ ގައުމުތަކުން އިސްކަންދޭ،" އުޝަކޮވް ވިދާޅުވި އެވެ.