ޕެރިސް ސެއިންޓް ޖަރމަން (ޕީއެސްޖީ)އަށް ކުޅެމުން އަންނަ ބްރެޒިލްގެ ތަރި ނޭމާ ޖޫނިއަރ އެ ކުލަބު ދޫކޮށްލަން އުޅޭކަމަށް ދެކެވުނު ވާހަކަތަކަކީ ދޮގެއްކަމަށް ޕީއެސްޖީގެ ސްޕޯޓިންގ ޑިރެކްޓަރު ލުއިސް ކަމްޕޯސް ބުނެފިއެވެ.

ބޭރުގެ މީޑިއާއަކަށް ދިން އިންޓަވިޔުއެއްގައި ކަމްޕޯސް ބުނީ، ނޭމާ ޕީއެސްޖީ ދޫކޮށްލަން އުޅޭކަމަށް ބުނެ ބައެއް މީޑިއާތަކުގައި ވާހަކަ ފެތުރުނު ކަމަށެވެ. ނަމަވެސް އެއީ ތެދު ވާހަކެއް ނޫންކަމަށް އޭނާ ބުންޏެވެ. ކަމްޕޯސް ބުނީ ނޭމާ ބޭނުންވަނީ ޕީއެސްޖީގައި މަޑުކުރަންކަމަށާއި، އޭނާ ހުންނާނީ އެ ކުލަބުގައި ކަމަށެވެ. އަދި އެއާ އެއްގޮތަށް ކީލިއަން އެމްބާޕޭއާ ގުޅޭގޮތުންވެސް ބައެއް ދޮގު ވާހަކަތައް ފެތުރުނުކަމަށެވެ.

ކަމްޕޯސް ބުނީ ނޭމާއަކީ ޕީއެސްޖީގެ ޕްރޮޖެކްޓުގައި ހިމެނޭ މުހިންމު ކުޅުންތެރިއެއް ކަމަށާއި، ޕީއެސްޖީގެ ކުރިމަގުގައިވެސް ނޭމާއަކީ މުހިންމު ކުޅުންތެރިއެއްކަމަށެވެ. ނޭމާ އަންނަނީ މި ސީޒަންގައި ޕީއެސްޖީގައި މޮޅު ކުޅުމެއްް ދައްކަމުންނެވެ. ސީޒަންގެ މިހާތަނަށް ޕީއެސްޖީއަށް ކުޅެދިން 10 މެޗުން ނޭމާ ވަނީ 11 ލަނޑު ޖަހާފައެވެ.

ބާސެލޯނާ ދޫކޮށް 2017 ވަނަ އަހަރު ނޭމާ ޕީއެސްޖީއަށް ބަދަލުވީ ރެކޯޑު އަގަކަށެވެ. އޭގެ ފަހުން އޭނާ އަންނަނީ އެ ކުލަބުގައި މުހިންމު ދައުރެއް އަދާކޮށް، މޮޅު ކުޅުމެއް ދައްކަމުންނެވެ. ނޭމާ ވަނީ މިހާތަނަށް ޕީއެސްޖީއަށް ކުޅެދިން 154 މެޗުގައި 111 ލަނޑު ޖަހައި، ޕީއެސްޖީއާއެކު ޖުމުލަ 12 ތައްޓެއް ކާމިޔާބުކޮށްފައެވެ.