މިސުރާއި ސައުދީ ޗެމްޕިއަނުން ވޯލްޑްކަޕް ފައިނަލް ކުޅޭ ސްޓޭޑިއަމް ހުޅުވައިފި

އަންނަ ނޮވެމްބަރު މަހު ގަތަރުގައި ބާއްވާ ވޯލްޑްކަޕް ފުޓްބޯޅަ މުބާރާތުގެ ފައިނަލް މެޗު ކުޅޭ ސްޓޭޑިއަމް ރަސްމީކޮށް ހުޅުވައިފި އެވެ.

ގަތަރުގެ ވެރިރަށް ދޯހާގައި އަލަށް އާބާދުކުރަމުން އަންނަ ލުސައިލް ސިޓީގައި ގާއިމްކޮށްފައިވާ ލުސައިލް ސްޓޭޑިއަމް ރަސްމީކޮށް ހުޅުވީ ގަތަރުގެ ޗެމްޕިއަން އަލް ހިލާލާއި މިސުރުގެ ޗެމްޕިއަން ޒަމާލިކް ރޭ ކުޅުނު ސުޕަކަޕް މެޗުންނެވެ. ފުރިހަމަ ވަގުތުގައި އެއްވަރުވި މެޗުން އަލްހިލާލް މޮޅުވީ ޕެނަލްޓީ ޖަހައިގެންނެވެ. މި މެޗަށް ފަހު ގަތަރުން ބުނީ ސަރަހައްދީ ސުޕަކަޕް ފަދަ މުހިންމު މެޗުތައް ވޯލްޑްކަޕަށް ތައްޔާރުކުރާ ސްޓޭޑިއަމުތަކުގައި ކުޅުމުގެ ފުރުސަތު އަބަދުވެސް އޮންނާނެ ކަމަށެވެ. އަދި ވޯލްޑްކަޕަށް ފަހު ގަތަރުގެ ސްޓޭޑިއަމްތަކުގައި މިފަދަ މެޗުތައް ކުޅުވަން ހުޅުވާލާނެ ކަމަށެވެ.

ގާތްގަނޑަކަށް 675 މިލިއަން ޑޮލަރު ހަރަދުކޮށްގެން ތައްޔާރުކުރި ސްޓޭޑިއަމުގެ ޖާގައަކީ 80000 އެވެ. ރޭގެ މި މެޗު ކުޅުނުއިރު މިތަނުގައި މަދުވެގެން 77000 މީހުން ތިބޭނެ ކަމަށް ގަތަރުގެ ކަމާބެހޭ ފަރާތްތަކުން ބުނެ އެވެ. މި މެޗު ބެލުމަށް އަވައްޓެރި ސައޫދީ އަރަބިއާ އާއި ޔޫއޭއީން ވެސް މީހުން އައިކަމަށް ގަތަރުން ބުނެ އެވެ.

ލުސައިން ސްޓޭޑިއަމަކީ ވޯލްޑްކަޕަށް ގަތަރުން ތައްޔާރުކުރި އެންމެ ބޮޑު ސްޓޭޑިއަމްވެސްމެ އެވެ. އަދި މުބާރާތަށްފަހު މިތަނުގައި ސްކޫލްތަކާއި ފިހާރަތަކާއި ކެފޭތަކާއި ކުޅިވަރާއި ސިއްހީ ވަސީލަތްތައް ގާއިމްކުރާނެ އެވެ. މިއީ މުބާރާތަށް ފަހު ގަތަރުން ދެމެހެއްޓެނިވި ތަރައްގީ އަށް އިސްކަދޭ މިނަވަރު ދައްކައިދިނުމަށް ނިންމާފައިވާ ނިންމުމެކެވެ.

ނޮވެމްބަރު 20 އިން ޑިސެމްބަރު 18 އަށް ބާއްވާ މުބާރާތުގެ ފައިނަލް މެޗުގެ އިތުރުން މި ސްޓޭޑިއަމުގައި އިތުރު ނުވަ މެޗެއް ވެސް ކުޅޭނެ އެވެ.