1990ގެ ވޯލްޑްކަޕުގައި ވިދާލި އިޓަލީގެ މަޝްހޫރު ފޯވަޑް ޝަލްވަޓޯރޭ ޝިލާޗީ އުމުރުން 59 އަހަރުގައި މިއަދު މެންދުރު މަރުވެއްޖެ އެވެ.

އަމިއްލަ ގައުމުގައި ކުޅެ އިޓަލީން ތިން ވަނަ ހޯދި އިޓާލިއާ 90ގެ ވޯލްޑްކަޕްގައި އޭނާ ޖެހި ގޯލުތަލުގެ ސަބަބުން ޝިލާޗީ މަޝްހޫރުވީ ޓޯޓޯ ޝިލާޗީގެ ނަމުންނެވެ. އެ ވޯލްޑްކަޕުގައި އެންމެ ފުރަތަމަ އޭނާ އިނީ ވެސް ބެންޗުގަ އެވެ. ވޯލްޑްކަޕަށް ނެގި ޓީމުގައި ހިމެނުނަސް އޭގެ ކުރިން އޭނާ އަކީ ކާކުކަން ވެސް ގިނަ ބަޔަކަށް ނޭނގެ އެވެ. މަޝްހޫރު އެތައް ފޯވަޑުންނެއް ތިބުމުން ޓީމުގައި އޭނާ، ވީ ހަތަރެއް ނުވަތަ ފަސް ވަނަ ފޯވަޑަށެވެ. އެކަމަކު ރޮބާޓޯ ބާޖިއޯ އާއި ރޮބާޓޯ މަންޗިނީ އާއި ޖިއާން ލޫކާ ވިއާލީ ފަދަ ފޯވަޑުންނަށް ގޯލު ނުޖެހުމުން ބަދަލު ކުޅުންތެރިއެއްގެ ގޮތުގައި ކުޅެން ނުކުމެ ޖަހަން ފެށި ގޯލުތަކާއެކު ފުރަތަމަ 11އިން ޖާގަ ކަށަވަރުކުރި އެވެ. އެންމެ ފަހަތަށްލައި އެ މުބާރާތުގައި ހަ ގޯލު ޖަހައި ރަންބޫޓު ވެސް ހާސިލްކުރި އެވެ. މޮޅު ކުޅުންތެރިޔާގެ މަގާމު ލިބުނީ ވެސް އޭނާ އަށެވެ. މިއީ ފަހުގެ ތާރީހުގައި ވޯލްޑްކަޕުގެ އެންމެ މުހިންމު ދެ މަގާމު އެއް ކުޅުންތެރިއަކު ލިބުނު ފަހަރުވެސްމެ އެވެ.

ޝިލާޗީ އަކީ އިޓަލީގެ ގައުމީ ޓީމަށް މާގިނަ މެޗުތަކެއް ކުޅެދިން ކުޅުންތެރިއެއްނޫނެވެ. އެންމެ 16 މެޗު ކުޅެނުއިރު އޭނާގެ ހުރިހާ މަޝްހޫރު ކަމެއް ގުޅިފައި އޮތީ ވެސް 90 ވަނަ އަހަރުގެ ވޯލްޑްކަޕާ އެވެ. ވޯލްޑްކަޕަށް ފަހު އޭނާ އަށް ގައުމީ ޓީމަށް ޖެހިފައިވަނީ ވެސް އެންމެ ގޯލެކެވެ. އަދި 1991ގެ ފަހުން ގައުމީ ޓީމުން ވެސް އޭނާއަށް ޖާގަ ނުލިބެ އެވެ.

އިޓަލީގެ މެސީނާ އަށް 1982އިން 89 އަށް ކުޅެދިނުމަށްގަހު އިޓަލީގެ މަޝްހޫރު ދެ ކުލަބު ކަމަށްވާ ޔުވެންޓަސް އާއި އިންޓަމިލާނުގައި އޭނާ ވަނީ ޔޫއޭފާ ކަޕް ކާމިޔާބުކޮށްފަ އެވެ. ކުޅުން ހުއްޓާލީ 1997ގަ އެވެ.

ޝިލާޗީ މަރުވުމުން މުޅި އިޓަލީގައި ދަނީ ހިތާމަ ފާޅު ކުރަމުންނެވެ. ބޮޑުވަޒީރު ޖިއޯޖިއޯ މެލޯނީ ވިދާޅުވީ ވަލިވެގެންދިޔައީ އެންމެންގެ ހިތްތަކުން ޖާގަ ހޯދި ތަރިއެއް ކަމަށެވެ.

އިޓަލީގެ ރައީސް އާއި ޔުވެންޓަސް އަދި އިންޓަމިލާނުން ވެސް ވަނީ މި ހިތާމައިގައި ބައިވެރިވަ ބަޔާން ނެރެފަ އެވެ.